Oyshaa Saaxiniyaa

◼ Dichaa bessiiddi deꞌiya xinaatiyaa ay keena wodiyau xannaꞌissana koshshii?

Dichaa bessiiddi deꞌiya, Geeshsha Maxaafaa tamaaree, Tumuppe Geeshsha Maxaafay Tamaarissiyoy Aybee? giyaanne ‘Xoossaa Siiquwan Deꞌa’ giya naaꞌꞌu maxaafata wurssanaashin xannaꞌissiyoogee loꞌꞌo. Tamaaree naaꞌꞌu maxaafata wurssanaappe kase xammaqettiyaaba gidikkokka, hegaadan oottana koshshees. I xammaqetti simminkka, saatiyaa, zaareto oyshaanne xinaatiyaa irpportte oottana danddayoos. Nunaara xannaꞌissiya uraykka saatiyaa irpportte oottana danddayees.—Laappune 2009 Nu Kawotetta Haggaazuwaa, sinttaa 2 xeella.

Nuuni eta xannaꞌissiyoogaa polanaappe kase, oorattati tuman minnidi eqqana koshshees. Eti banttana gakkana paaciyaa genccanaadan, Kiristtoosan ‘xaphuwaa yeddidi, ammanuwan minnana’ koshshees. (Qol. 2:6, 7; 2 Xim. 3:12; 1 PHe. 5:8, 9) Hegaa bollikka, harata loytti tamaarissanau, etau suure gidida, ‘tumaa eray’ deꞌana bessees. (1 Xim. 2:4) Naaꞌꞌu maxaafaa xannaꞌissidi wurssiyoogan, ‘deꞌuwau efiya ogiyan’ eti minnidi eqqanaadan maaddoos.—Maa. 7:14.

Cimati issi uri xammaqettanaadan maayanaappe kase, i Geeshsha Maxaafaa waanna timirtteta loytti akeekidoogaanne hegaara moggiya ogiyan deꞌiyoogaa erana koshshees. Cimati koyro maxaafaa xannaꞌidi wurssibeenna tamaariyaara tobbiyo wode, keehippe akeekancha gidana koshshees. Issi uri xammaqettanau gidaa kunttibeennaba gidikko, sinttappe xammaqettanau gidaa kunttanaadan koshshiya maaduwaa demmana mala cimati hanotaa giigissoosona.—Yihoowa SHeniyaa Oottanau Giigettidaageeta, sinttaa 217-218.

[Sinttaa 2n deꞌiyaagaa qonccissuwaa]

Oorattati tuman minnidi eqqana koshshees