Haggaazuwaa Aassanau Haꞌꞌi Halcha
1. Godaa Kahuwaa bonchiyo wode ay oottana danddayiyoo, hegau waani giigettana danddayiyoo?
1 Godaa Kahuwaa bonchiyo wodee ‘Yihoowa daroppe galatanau’ hanotay injjetanaadan oottees. (Maz. 109:30) Wozuwaa Giigissidaagaa galatanau Laappune aginan ne haggaazuwaa aassana danddayay? Hegau halchiyo wodee haꞌꞌa.—Lee. 21:5.
2. Zillaytti Hosppune aginan kaafiya aqinyeti zaariyo saatiyaara gayttidaagan laamettidabau ishantti immido zaaroy aybee?
2 Kaafiya Aqinye Gidiyoogaa: Zillaytti Hosppuniyaa aginan kaafiya aqinyeti zaariyo saatiyaara gayttidaagan laamettidabay aassiyaageeta keehippe ufayssiis. Issi ishay hagaadan giis: “Taani naaꞌꞌantto xekka timirtte keettan tamaaraydda deꞌiyo gishshau, kumetta wodiyaa haggaaziya aqinye gidanau danddayabeykke. SHin Hosppuniyan 30 saatiyaa zaaranau qitsiyaa kunttada, 50 saatiyaa zaaranau baaxetana.” Kumetta gallassaa oottiya issi michiyaa, “Hasttamu saatee—hegee danddayettiyaaba!” yaagaasu. He erissoy gubaaꞌiyan odettido wode, kase aqinye gidada haggaazida, layttay 80ppe bolla gidido issi michiyaa hagaadan gaasu: “Hagee taani naagaydda takkido wode! Aqinye gidada oottido wodee ta deꞌuwan keehi loꞌꞌo gidida wode gidiyoogaa Yihooway erees!” Kaafiya aqinye gidanau danddayenna harati bantta haggaazuwaa aassanau halchana danddayoosona.
3. Laappuniyan, Hosppuniyaaninne Uddufuniyan kaafiya aqinye gidanau qoppanaadan oottiya gaasoti aybee?
3 Laappune aginay nuuni 30 woy 50 saatiyaa zaariyoogan haranttuwaa kaafiya aqinye gididi haggaazana danddayiyo wode gidiyo gishshau ufayssiya wode gidana. Hegaa bollikka, Qeera galla, Laappune 17ppe doommidi, Hosppune 5 gakkanaashin, nunaara Godaa Kahuwaa bonchanaadan dumma zamachan asaa shoobbana. Daroti bantta haggaazuwaa aassidi, Hosppuniyaaninne Uddufuniyan 50 saatiyaa zaariyoogan kaafiya aqinye gidanau danddayoosona.
4. Nuuni nu haggaazuwaa ayba ogiyan aassana danddayiyoo, ayba ayfiyaa demmiyoo?
4 Godaa Kahuwaa bonchiyo wode intte soo asay bantta haggaazuwaa waatidi aassana danddayiyaakko kaalliya So Asaa Goynuwaa omarssan aybissi tobbekketii? (Lee. 15:22) Intte oottiyoobaa Yihooway anjjanaadan woossite. (1 Yoh. 3:22) Nuuni nu haggaazuwaa aassiyo payduwan, Yihoowa kaseegaappe aaruwan galatiyoogaa xalla gidennan, kaseegaappe aaruwan ufayttiyaageeta gidoos.—2 Qor. 9:6.