Kawotettaa Oduwaa Paydo 38 Hidaariyan Asau Immana!
1. Hayqqidaageeta xeelliyaagan asay oychiyo oyshay awugee, ha oyshay Hidaariyan ayba ogiyan zaaruwaa demmanee?
1 Asaa ammanoy dumma dumma gidikkokka, hayqoy ubbaassikka morkke. (1 Qor. 15:26) Daroti hayqqidaageeti awan deꞌiyaakko, qassi etaara zaarettidi gayttana danddayiyaakko qoppoosona. Hegaa gishshau, alame yuushuwan deꞌiya Yihoowa Markkati Hayqqida asay denddanee? giya Kawotettaa Oduwaa paydo 38 issi aginau asau immana. Ha dumma zamachay Hidaare 1n doommees. Dumma zamachaappe simmin, Kawotettaa Oduwaa paydo 38 hara trakttetudan haggaazuwan goꞌettana.
2. Kawotettaa Oduwaa paydo 38 giigidoy ayba ogiyaanee?
2 Ayba Ogiyan Giigidee? Kawotettaa Oduwaa paydo 38y asay eranau koyanaadan denttettiya huuphe yohoy, qassi “Ne zaaroy awugee? Ee, denddana. Akkay, denddenna. Geella denddana danddayees” giya qofaa koyro sinttan bessana danddayiyo ogiyan dakkoyana mala maaddiya ogiyan giigiis. Nabbabiya uray Kawotettaa Oduwaa dooyiyo wode, Geeshsha Maxaafay huuphe yohuwan denddida oyshau immiyo zaaruwaanne hegaa ammaniyoogee nabbabiya uraa waatidi maaddiyaakko yootiyoobaa beꞌees. Qassi Geeshsha Maxaafay yootiyoobaa i ammanana danddayiyoy aybissakkokka beꞌana. Kawotettaa Oduwaa wurssetta sinttan, nabbabiya uray qoppanaadan oottiya oyshaynne gujjidi eranaadan shoobee deꞌees.
3. Kawotettaa Oduwaa paydo 38 waatidi asau immanee?
3 Waatidi Asau Immanee? Ha zamachay Godaa Kahuwaa wodenne awuraajjaa shiiquwaa wode asaa shoobbiyoogaa mala gidana. Hosppune 1, 2013n cimatuyyo xaafettida dabddaabbiyaa maaran, haggaazo moottaa ubbaa waatidi gattana danddayiyaakko cimati yootana. Haggaazo moottay guutta gidido gubaaꞌeti aaho haggaazo moottay deꞌiyo shooro gubaaꞌeta maaddana danddayoosona. Kawotettaa Oduwaa paydo 38 issi saaminttau gidiyaagaa xallaa ekkana koshshiyoogaa hassayite. Zamachaa wode sooppe soo biidi haggaazo moottaa ubbaa gatti simmidi, attidaagaa dabaaban markkattiyo wode asau immana danddayoos. He aginay wurennan he trakttiyaa asau immidi wurssikko, hara xuufiyaa immana koshshees. Aginan koyro Qeeraa gallassi nuuni Geeshsha Maxaafaa xinaatiyaa doomissanau maliyoogaappe, shoobiyaa woraqataa immana. Qeeraanne Woggaa gallassi hanotay injjetikko, maxeetiyaakka immana koshshees. Ha dumma zamachan loytti oottanau halchidetii?