Haggaazuwan Kaseegaappe Qara Gidiyoogaa—Eranau Koyiya Uraabaa Xaafi Oyqqiyoogaa

“Ne huuphiyaanne ne timirttiyaa naaga.” (1 Xim. 4:16) Kiitettida PHauloosi ayyaanaa kaaletuwan Ximootiyoosa zorido ha zoree nuuni ooratta gidin woy haggaazuwan meezee deꞌiyoogeeta gidin, mishiraachuwaa sabbakiyoogan kaseegaappe qara gidanau baaxetana koshshiyoogaa bessees. Nuna hegau maaddana mala “Haggaazuwan Kaseegaappe Qara Gidiyoogaa” yaagiya kaalli kaalli yiya ooratta huuphe yohoy Nu Kawotetta Haggaazuwan kiyees. He huuphe yohotun qara gidana koshshiyo issi ginaynne hegau maaddiya amarida qofay odettees. He aginan nuuni ubbay he odettida ginan loyttidi loohanaadan minettoos. He aginay wuri simmin, hegaadan oottiyoogan waani goꞌettidaakko nu qofaa yootiyo kifilee Haggaazuwaa SHiiquwan giigees. Ha aginan nuuni eranau koyiya uraabaa xaafi oyqqanaadan zoree imettiis.

Hegee Keehi Koshshiyoy Aybissee? Nuuni nu oosuwaa polanau sabbakiyoogaa xallay gidenna. Eranau koyiyaageeta zaaretti oychidi, nuuni zerido tumaa zerettaa haattaa ushshiyoogan eta tamaarissana bessees. (Maa. 28:19, 20; 1 Qor. 3:6-9) Yaatanau, he izaawuura gayttana, a qofissiyaabaa tobbananne kase haasayidobaa bolli gujjidi minttana koshshees. Yaatiyo gishshau, eranau koyiya ura demmiyo wode, abaa xaafi oyqqana koshshees.