Ufayssiya Ogiyan Giigida Ooratta Traktteta!
1. Ufayssiya ogiyan giigida, haggaazuwau maaddiya xuufeti awugeetee?
1 “Xoossaa Qaalay Tuma!” giya 2013 awuraajjaa shiiquwan ichashu ooratta traktteti kiyidosona. Qassi Hayqqida asay denddanee? yaagiya huuphe yohoy deꞌiyo Kawotettaa Oduwaa Paydo 38ykka mati kiyiis. Ha usuppun traktteti ufayssiya ooratta ogiyan giigidosona. Eti ooratta ogiyan giigidoy aybissee? Sooppe soo biidi ha traktteta asau immiyo wode, ha traktteti giigido ogiyaa waati loytti goꞌettana danddayiyoo?
2. Traktteti ooratta ogiyan giigidoy aybissee?
2 Ooratta Ogiyan Giigidoy Aybissee? Sooppe soo biidi muruta ogiyan asaa haasayissanau kaallidi deꞌiya oyddubata oottiyoogee loꞌꞌo: (1) Haasayaa doommanau, issi allaalliyaa xeelliyaagan keettaawau siyettiyaabaa eranau maaddiya oyshaa oycha. (2) Hegaara gayttida xiqisiyaa Geeshsha Maxaafaappe nabbaba. (3) Keettaway nabbabanaadan xuufiyaa imma. (4) Hara gallassi gayttiyo wode zaarana oyshaa oychada, awude gayttanaakko wodiyaa keera. Traktteti ooratta ogiyan giigidoogee ha oyddu maaraa loytti kaallanau maaddees.
3. Ooratti kiyida trakttetuppe issuwaa haggaazuwan asau waati immana danddayiyoo?
3 Waati Goꞌettanee? (1) Keettaawaa sarotoogaappe guyyiyan, dumma dumma qofaappe dooridi zaariyo, trakttiyau koyro sinttan deꞌiya oyshaa oychada i ba qofaa yootanaadan ootta. (2) Trakttiyaa dooyada “Geeshsha Maxaafay Yootiyoobaa” giyaagaa garssan deꞌiya qofaa tobba. Hanotay injjetiyaaba gidikko xiqiseta Geeshsha Maxaafaappe nabbaba. Bitaniyau wodee deꞌiyaaba gidikko, “Hegaa Ammaniyoogee Nena Goꞌꞌiyo Ogiyaa” yaagiyaagaa tobba. (3) Trakttiyaa immada i bau injjetiyo wode nabbabanaadan minttetta. (4) Appe shaahettanaappe kase, “Qoppana Koshshiyaabaa” giyaagaa garssan deꞌiya oyshaa bessada, Geeshsha Maxaafay hegau yootiyo zaaruwaa hara gallassi aara gayttada tobba.
4. Zaarettidi oychiyo wode ooratta traktteta waata goꞌettana danddayiyoo?
4 Zaarettidi oychiyoogeekka metiyaaba gidenna. Neeni koyro gallassi wurssettan denttido oyshaa zaaranau trakttiyau shemppoynne paydo xallay zokko baggan xaafettido xiqiseta goꞌetta. Wurssada baanaappe kase, Mishiraachuwaa giya brooshuriyaa misiliyaakko malaatada, he brooshuriyaanne he allaalliyaabaa loytti qonccissiya timirttiyaa bessada, brooshuriyaa keettaaway au imma. I ekkikko, hara gallassi simmada he brooshuriyan tobbanau keera. Yaatiyo wode xannaꞌissiyoogaa doommadasa. Woy qassi brooshuriyaa gishshaa hara trakttiyaa keettaawau immada aara he qofaa tobbanau zaarettada gayttiyo wodiyaa keerana danddayaasa.
5. Nu haggaazuwan trakttetu goꞌꞌay aybee?
5 Nuuni haggaazuwan 130ppe dariya layttau traktteta goꞌettida. Eta yesoynne eti giigido ogee dumma dumma gidikkokka, markkattanau keehi maaddidosona. Geeshsha Maxaafaa eraa kumetta saꞌaa gattanau traktteti giigido ha ooratta ogiyaa loytti goꞌettiyaageeta gidoos.—Lee. 15:7a.