Ne Sunttay Geeyo

1-2. Yihoowa Markkati keehi xoqqu ootti xeelliyo allaalleti aybee?

NUUNI keehi xoqqu ootti xeellana bessiyo allaallee deꞌees; hegeekka Yihooway ubbabaa haariyoogaanne A sunttay geeyiyoogaa. Nuuni Yihoowa Markkata gidiyo gishshawu ha ufayssiya allaalletubaa haratuura haasayiyoogaa dosoos. SHin, Xoossay ubbabaa haariyoogeenne A sunttay geeyiyoogee issoy issuwaara gayttenna allaalle giyoogee? CHii.

² Nuuni ubbay Xoossaa sunttay geeyana bessiyoogaa akeekida. Yihooway ubbabaa haariyo maatay woy I haariyo ogee aybippenne aaruwan loꞌꞌo gidiyoogee qonccana bessiyoogaakka tamaarida. Hegaa gishshawu, ha naaꞌꞌu allaalletikka keehi xoqqu ootti xeellana bessiyaabata.

3. Yihoowa sunttay aybiira gayttidabee?

³ Yihoowa sunttay I haariyo ogiyaa gujjin, nu Xoossaa xeelliya ubbabaara gayttidaba. Hegaa gishshawu, nuuni Yihoowa sunttay cashsha ubbaappe geeyiyoogee keehi koshshiyaaba giyoogee, Yihooway haariyo ogee aybippenne aadhdhiyoogee qonccana bessees giyoogaa. Yihoowa sunttay I ubbaa danddayiyaagaa gidiyoogaadan Ubbabaa Haariyo ogiyaara gayttidaba.—“Gita Allaalliyaa Giddon Deꞌiyaabati Aybee?” giya saaxiniyaa xeella.

4. Mazamure 135:13y Xoossaa sunttaabaa ay yootii, qassi ha huuphe yohuwan zaaruwaa demmana oyshati awugeetee?

⁴ Yihoowa sunttay daro ogiyan dumma. (Mazamure 135:13 nabbaba.) Xoossaa sunttaa keehi xoqqu ootti xeellanaadan oottiyay aybee? He sunttay koyro waani moorettidee? Xoossay ba sunttaa waati geeshshanee? Qassi nuuni A sunttawu exatiyoogaa waati bessana danddayiyoo? Haꞌꞌi ha oyshatu zaaruwaa pilggana.

KEEHI XOQQU OOTTI XEELLIYO SUNTTAA

5. Xoossaa sunttay geeyana koshshees giyoogaa siyidi issi issi asay woygi oychchana danddayii?

⁵ “Ne geeshsha sunttai anjjetto” woy geeyo. (Maa. 6:9) Hegee nuuni woossana koshshiya gitabatuppe issuwaa gidana bessiyoogaa Yesuusi yootiis. SHin Yesuusi giidobay woygiyoogee? Issibaa geeshshiyoogaa giyoogee xillo oottiyoogaa woy A mooriyaabaa diggirggiyoogaa giyoogaa. SHin issi issi asay ‘Yihoowa sunttay kasekka geeshsha, yaatin A sunttay geeyana koshshiyoy aybissee?’ giidi oychchana danddayees. Hegaa zaaranawu issi sunttay ay qonccissiyaakko nuuni qoppana koshshees.

6. Sunttay keehi koshshiyaaba gidanaadan oottiyay aybee?

⁶ Sunttay woraqatan xaafana woy xeegana danddayiyo qaala xalla gidenna. Geeshsha Maxaafay, “Lo77o sunttai daro duretettaappe aadhdhees” giyoogaa akeeka. (Lee. 22:1; Era. 7:1) Sunttay keehi koshshiyoy aybissee? Sunttay an xeegettiya uraabaa harati qoppiyoobaara gayttidaba gidiyo gishshataassa. Hegaa gishshawu, sunttay xaafettiyo ogee, woy qassi sunttay xeegettiyo ogee keehi qofissiyaaba gidenna; keehi qofissiyaabay asay he sunttaa beꞌiyo woy siyiyo wode he sunttaabaa qoppiyoobaa.

7. Asay Xoossaa sunttaa waati mooridee?

⁷ Asay Yihoowabaa wordduwaa yootiyo wode, eti asay abaa iitabaa qoppanaadan oottoosona. Asay hegaa mala iitabaa beꞌiyo wode Xoossan gaasoyeesinne A sunttaa moorees. Issi uri Xoossaabaa koyro iitabaa haasayidoynne abaa asay iitabaa qoppanaadan oottanawu malidoy Edene ataakiltte sohuwaana. Nuuni hegaappe tamaariyoobaa qoppa.

HE SUNTTAY KOYRO WAANI MOORETTIDEE?

8. Addaameenne Hewaana eriyoobay aybee, qassi nuuni oychchana danddayiyo hara oyshati awugeetee?

⁸ Addaameenne Hewaana Xoossaa sunttay Yihoowa gidiyoogaa eroosona; qassi abaa keehi koshshiya darobaakka eroosona. Leemisuwawu, I eta Medhdhidaagaa, etawu deꞌuwaa immidaagaa, deꞌanawu loꞌꞌiya sohuwaanne loꞌꞌo aqo deꞌuwaa etawu immidaagaa gidiyoogaa eroosona. (Doo. 1:26-28; 2:18) SHin eti Yihooway banttawu oottido ubbabaa muletoo qoppanee? Eti ubbatoo Yihoowa siiqiyoogaanne galatiyoogaa bessanee? Xoossaa morkkee eta paaccido wode hegaa zaaroy qoncce gidiis.

9. Doomettaabaa 2:16, 17⁠ynne 3:1-5y yootiyoogaadan, Yihooway koyro azinaassinne machcheessi yootidobay aybee, qassi Seexaanay eti Yihoowabaa suure qoppennaadan waati oottidee?

⁹ Doomettaabaa 2:16, 17; 3:1-5 nabbaba. Seexaanay shooshshan eqqidi Hewaano, “Xoossai tumu inttena, Gannatiyan de7iya mitta teeraa ubbaappekka mooppite giidee?” yaagidi oychchiis. Seexaanay Xoossaabaa worddotidi oychchiis; qassi Hewaana Xoossaabaa iitabaa qoppiyoogaa doommaasu. Eti issi mittaa teeraappe attin, mittaa teeraa ubbaappe maana danddayiyoogaa Xoossay etawu yootiis. Addaameenne Hewaana keehi daro qommo mittaa teeraappe maana danddayoosona. (Doo. 2:9) Ee, Yihooway tumukka keha. SHin Addaameenne Hewaana meennaadan digettido issi mittaa teeray deꞌiyoogaa Xoossay yootiis. Hegaa gishshawu, Seexaanaa oyshay eti Yihoowabaa suure qoppennaadan oottiis. Seexaanaa oyshay eti Xoossay keha gidenna giidi qoppanaadan oottiis. Hewaana, ‘Xoossay tana diggido loꞌꞌobay deꞌiishaa?’ gaada qoppennan aggukku.

10. Seexaanay Xoossaa sunttaa waati mooridee, qassi hegee ay kaalettidee?

¹⁰ Seexaanay he oyshaa oychchido wodekka Hewaana Yihoowawu azazettawusu. A Xoossay yootido qonccebay aybakko Seexaanaayyo yootaasu. A gujjadakka ubba he mittaa teeraa bochchana koshshennaagaa yootaasu. A Xoossaa azazuwaa azazettana xayikko, hayqqanaagaa erawusu. SHin Seexaanay, “CHii, intte ainnekka haiqqekketa” yaagiis. (Doo. 3:2-4) Seexaanay genttidi yootiyoogaa aggiis. I Yihooway worddotiis giidi Hewaanissi yootiyoogan, Xoossaa sunttaa mooriis. Yaatiyoogan, Seexaanay Dabloosa woy sunttaa mooriyaagaa gidiis. Hewaana keehi cimettaasu; A Seexaanaa ammanaasu. (1 Xim. 2:14) A Yihoowappe aattada Seexaanaa ammanaasu. Hegee Hewaana aybippenne iitabaa sohuwaara kuuyanaadan oottiis. A Yihoowawu azazettennan agganawu kuuyaasu. Yihooway meennaadan diggido mittaa teeraa A maasu. Yaatada, amaridaagaa Addaameyyo immaasu.—Doo. 3:6.

11. Addaameenne Hewaana ay oottana danddayiyoonaa, shin eti oottennan aggidobay aybee?

¹¹ Hewaana Seexaanaayyo yootana koshshishin aggidobaa ane qoppa. A hagaadan gaana danddayawusu shin gaada qoppa: “Neeni oonakko ta erikke, shin taani ta Aawaa, Yihoowa erays; qassi A siiqaysinne aani ammanettays. Addaamessinne taassi deꞌiya ubbabaa I immiis. Neeni abaa iitabaa yootiyoy aybissee? Hagaappe kichcha!” Ammanettiyoogaa bessiya hegaa mala qaalaa ba siiqiyo naꞌeeppe siyidaakko Yihooway ay keena ufayttanddeeshsha! (Lee. 27:11) SHin Addaameekka Hewaanakka Yihoowawu aggenna siiquwaa bessibookkona. Eti bantta aawawu hegaa mala siiquwaa bessibeennaagee A sunttay moorettiyo wode awu exatennaadan oottiis.

12. Hewaani qofan Seexaanay siriyaa waati zeridee, qassi Addaameenne Hewaana oottennan aggidobay aybee?

¹² Nuuni beꞌidoogaadan, Yihooway loꞌꞌo Aawa gidiyoogaa Hewaana siranaadan oottiyoogan, Seexaanay Yihoowa sunttaa mooriyoogaa doommiis. Yaatin, Addaameenne Hewaana Seexaanaa wordduwaa ammanidi Yihoowa sunttawu exatibookkona. Hegee eti Seexaanay yootiyoobaa siyidi bantta Aawaa bolli makkalanaadan oottiis. Ha wodiyankka, Seexaanay hegaa mala hiillata goꞌettees. I Yihoowa sunttaa mooriyoogan he sunttaa keehi borees. Seexaanaa wordduwaa ammaniya asay Yihooway kessido xillotettaa haaruwaa eqettees.

YIHOOWAY BA SUNTTAA GEESHSHANA

13. Hizqqeela 36:23y Geeshsha Maxaafaa waanna qofaa waati qonccissii?

¹³ Yihooway ba sunttay moorettiyo wode aynne oottennan coꞌꞌu gi xeellii? CHii! Kumetta Geeshsha Maxaafay Edene gannatiyan Yihoowa xeelliyaagan odettida iita wordduwaa geeshshanawu Yihooway oottidobaa yootees. (Doo. 3:15) Geeshsha Maxaafaa waanna qofaa qanttan hagaadan gaana danddayoos: Yihooway ba Naꞌay haariyo Kawotettaa baggaara ba sunttaa geeshshana, qassi saꞌan xillotettaanne sarotettaa zaarettidi ehaana. Yihooway ba sunttaa waati geeshshiyaakko nuuni akeekanaadan maaddiya qofaa Geeshsha Maxaafay yootees.—Hizqqeela 36:23 nabbaba.

14. Edenen makkalay denddin Yihooway oottidobay A sunttaa waatidi geeshshidee?

¹⁴ Yihooway ba halchchuwaa polennaadan teqqanawu Seexaanay bawu danddayettida ubbabaa oottiis. SHin Seexaanay diggana danddayibeenna. Geeshsha Maxaafay Yihooway oottidobaa yootees; qassi I oottidobay tumukka siiqiya Aawanne ooppenne aaruwan loꞌꞌo ogiyan Haariyaagaa gidiyoogaa qonccissees. Seexaanaynne aara exatidaageeti ubbay makkalidoogee Yihooway azzananaadan oottidoogee tuma. (Maz. 78:40) SHin A sunttaa mooranawu oosettidabaa Yihooway aadhdhida eratettan, danddayaaninne suure pirddan giigissiis. I ubbabaa danddayiyaagaa gidiyoogaakka daro ogiyan bessiis. Ubbaappe aaruwan, I oottiyo ubbabay siiquwaa qonccissees. (1 Yoh. 4:8) Yihooway ba sunttaa geeshshanawu oottiyoogaa mule aggibeenna.

15. Seexaanay ha wodiyan Xoossaa sunttaa waati mooriiddi deꞌii, qassi hegee ay kaalettidee?

¹⁵ Seexaanay ha wodiyankka Xoossaa sunttaa mooriiddi deꞌees. Xoossay wolqqaama, aadhdhida eranchcha, suure pirddiyaagaanne siiqiyaagaa gidiyoogaa asay siranaadan I oottiiddi deꞌees. Leemisuwawu, Yihooway Medhdhidaagaa gidenna giidi asaa ammanttanawu Seexaanay baaxetees. Xoossay deꞌiyoogaa asay ammanikkonne, Xoossaynne I kessido maarati laꞌatettaa diggoosonanne suure gidokkona giidi asay ammananaadan oottanawu Seexaanay malees. I Yihooway asaa siꞌooliyaa taman xuuggiya meqettaa iita Xoossa giidikka tamaarissees. He iita wordduwaa eti ammaniyo wode, Yihooway kessido xillotettaa maaraa xaasayanawu etawu deexxenna. Yihooway Seexaanaa xayssana gakkanaashin, I Yihoowa sunttaa mooriyoogaa aggenna; qassi Yihoowappe nena haassanawu I baaxetana. Awu ushachchanee?

HA GITA ALLAALLIYAN NEENI OOTTANA DANDDAYIYOOBAA

16. Addaameenne Hewaana oottibeennabaa neeni ay oottana danddayay?

¹⁶ Yihooway ba sunttaa geeshshanawu nagaranchcha asay maaddanaadan oottees. Hegaa gishshawu, Addaameenne Hewaana oottibeennabaa neeni oottana danddayaasa. Ha alamee Yihoowa sunttaa mooriyaanne cayiya asan kumikkonne, neeni Yihoowa sunttawu exatananne I geeshsha, xillo, loꞌꞌonne siiqo Xoossa gidiyoogaa asawu yootana danddayaasa. (Isi. 29:23) Neeni A haaruwawu exatana danddayaasa. Yihoowa haaro xallay polo xillotettaa haaro gidiyoogaanne mereta ubbawu sarotettaanne ufayssaa ehaanay he haaro xalla gidiyoogaa asay akeekanaadan maaddana danddayaasa.—Maz. 37:9, 37; 146:5, 6, 10.

17. Yesuusi ba Aawaa sunttay erettanaadan waati oottidee?

¹⁷ Nuuni Yihoowa sunttawu exatiyo wode, Yesuus Kiristtoosa leemisuwaa kaalloos. (Yoh. 17:26) Yesuusi Yihoowa sunttaa goꞌettiyoogaa xalla gidennan, Yihooway ay mala Xoossakko asaa tamaarissiyoogan ba Aawaa sunttay erettanaadan oottiis. Leemisuwawu, Yihooway meqettaa iita, laꞌatettaa diggiyaagaa, siiqennaagaanne qarettennaagaa giya Parisaawetuppe I dumma. Yesuusi ba Aaway bessiyaagaadan haniyaagaa, danddayanchcha, siiqiyaagaanne atto giyaagaa gidiyoogaa asay akeekanaadan maaddiis. Qassi Yesuusi galla galla ba deꞌuwan ba Aawaa eeshshata wottiyoobi baynna ogiyan qonccissiyoogan asay Yihoowa eranaadan maaddiis.—Yoh. 14:9.

18. Eqettiyaageeti Yihoowa xeelliyaagan odiyo iitabay tuma gidennaagaa bessanawu waatana danddayiyoo?

¹⁸ Yesuusaagaadan, Yihooway keehi siiqiyaanne keha Xoossaa gidiyoogaa nuuni eriyoobaa asaa tamaarissana danddayoos. Yaatiyoogan, eqettiyaageeti Yihoowa xeelliyaagan odiyo iitabay tuma gidennaagaa bessoos. Yihoowa sunttay asaa qofaaninne wozanan geeshsha gidanaadan oottiyoogan, nuuni he sunttaa geeshshoos. Nuuni Yihoowa leemisuwaa kaallanakka danddayoos. Nuuni nagaranchcha gidikkokka yaatana danddayoos. (Efi. 5:1, 2) Nuuni haasayiyoobaaninne oottiyooban tumuppe Yihooway ay mala Xoossakko asaa bessiyo wode, A sunttay geeyanaadan maaddoos. Nuuni Xoossaabaa asay tumaa eranaadan maaddiyoogan, moorettida A sunttay geeyanaadan oottoos.b Nagaranchcha asay Xoossaayyo ammanettana danddayiyoogaakka bessoos.—Iyy. 27:5.

19. Nuuni tamaarissiyo waanna halchchoy ayba gidana bessiyaakko akeekanaadan Isiyaasa 63:7y waati maaddii?

¹⁹ Yihoowa sunttay geeyana mala nuuni oottana danddayiyo harabay deꞌees. Geeshsha Maxaafaa tumaa nuuni harata tamaarissiyo wode, ubbabaa haarana bessiyay Xoossaa gidiyoogaanne hagee tuma gidiyoogaa darotoo mintti yootoos. SHin, Xoossaa higgiyaa harata tamaarissiyoogee keehi koshshiyaaba gidikkonne, nuuni halchchiyo waannabay eti nu Aawaa Yihoowa siiqanaadaaninne awu ammanettanaadan maaddiyoogaa. Hegaa gishshawu, Yihoowa giyo sunttan xeesettiyaagee ay mala Xoossakko yootiyoogan, nuuni ufayssiya A eeshshata qonccissana koshshees. (Isiyaasa 63:7 nabbaba.) Nuuni hegaadan tamaarissiyo wode, harati Yihoowa siiqanaadaaninne eti ayyo ammanettanawu koyiyoogaappe denddidaagan awu azazettanaadan maaddana.

20. Kaalliya huuphe yohuwan ay beꞌanee?

²⁰ SHin, nu eeshshaynne nu tamaarissiyoobay asay Yihoowa sunttaa eranaadaaninne akko shiiqanaadan oottiyoogaa waani ammanettana danddayiyoo? Kaalliya huuphe yohoy he oyshaa zaarees.