Yihoowaara Dabbotaa Zaarettada Mintta

LAYTTAN LAYTTAN, alꞌꞌo dorssa gidida daroti Kiristtaane gubaaꞌiyaa simmoosona. Bohettidaageeti simmiyo wode “saluwan deꞌiyaageeti” keehi ufayttiyoogaa qoppa! (Luq. 15:7, 10) Neeni bohetta simmidaba gidikko, Yesuusi, kiitanchchatinne Yihooway ne zaarettada tumawu exatiyoogaa beꞌiyoogan keehi ufayttiyoogaa ammanettana danddayaasa. Gidikkonne, neeni Yihoowaara zaarettada dabbotaa minttiyo wode, metiyaabati gakkana danddayoosona. Etappe amaridaageeti aybee, qassi nena aybi maaddana danddayii?

METIYAABATI AYBEE?

Daro ishanttinne michchontti gubaaꞌiyaa simmidikka hidootaa qanxxiyoogaa aggibookkona. Kawuwaa Daawitawu aybi siyettidaakko neeni akeekennan aggakka. I oottido nagaraa gishshawu awu atto geetetti simminkka I, “Ta iitatettai tana gakkidi gooziis” yaagiis. (Maz. 40:12; 65:3) Issi uri Yihoowakko simmidikka, daro layttawu bana mooranchchadan xeellana woy yeellatana danddayees. Izabeela bohettada 20ppe dariya layttaa takkaasu.a A hagaadan gaasu: “Yihooway tawu atto gees gaada ammananawu taani keehi metootaas.” Neeni hidootaa qanxxikko, ayyaanaaban zaarettada shuggana danddayaasa. (Lee. 24:10) Hegaa malabay nena gakkennaadan baaxeta.

Harati qassi Yihoowaara zaarettidi dabbotaa minttanawu oottana koshshiya ubbabaa oottennan aggana danddayoos giidi hirggoosona. Bohetti simmida Antiwani hagaadan giis: “Taani kase Kiristtaane gidada deꞌiyo wode eriyo ubbabaa dogaas.” Issoti issoti hegaadan qoppiyo gishshawu, eti Yihoowawu oottana danddayiyo ubbabaa oottokkona.

Leemisuwawu, keettay wolqqaama gotiyan kolettido issi uri he keettaa zaarettidi keexxanawu koshshiya wodiyaanne wolqqaa qoppiyo wode keehi unꞌꞌettana danddayees. Hegaadankka, neeni Yihoowaara dabbotido dabbotay gita nagaraa ne oottido gishshawu moorettikko, zaarettada ayyaanaaban minniyoogee keehi baaxetana koshshiyaaba gaada qoppana danddayaasa. SHin maaduwaa demmana danddayaasa.

Yihooway nuna hagaadan shoobbees: “Haayite; nu giddon merettida metuwaa haasayidi giigissoos.” (Isi. 1:18, NW) Neeni ‘metuwaa haasayada giigissanawu’ minna oottadasa. Neeni minna oottido gishshawu Yihooway nena siiqees. Neeni Yihoowakko simmido gishshawu, Dabloosi worddanchcha gidiyoogaa qonccissanawu Yihooway nena goꞌettana danddayees!—Lee. 27:11.

Yaatiyoogan, kaseegaappe aaruwan Yihoowakko shiiqadasa; qassi ikka neekko shiiqanawu qaalaa geliis. (Yaaq. 4:8) Neeni zaarettada gubaaꞌiyaa simmidoogaa harati beꞌiyoogee loꞌꞌo. SHin neeni hegaappe aarobaa oottana koshshees. Neeni ne Aawaanne ne Dabbuwaa Yihoowa ubbatoo mintta siiqana koshshees. Hegaadan waata oottana danddayay?

NEENI OOTTANA DANDDAYIYOOBAA HALCHCHA

Neeni oottana danddayiyoobaa halchchanawu mala. Neeni Yihoowabaanne I sinttappe Gaannatiya ehaanawu gelido qaalaa xeelliyaagan tamaaridobata hassayennan aggakka. Leemisuwawu, ubbatoo sabbakiyoogaa, shiiqota shiiqiyoogaanne ishanttuuranne michchonttuura wodiyaa aattiyoogaa mala loꞌꞌo meezee neessi deꞌana koshshees. Neeni oottana danddayiyo kaallidi deꞌiya halchchota qoppa.

Ubbatoo Yihoowa haasayissa. Neeni kase oottidobaa gaasuwan ubbatoo nena mooranchchadan xeelliyoogee A woossanawu metootanaadan oottanaagaa ne Aaway erees. (Roo. 8:26) Gidikkonne, Yihoowaara dabbotanawu keehi koyiyoogaa yootiyoogan A ‘ubba wode woossa.’ (Roo. 12:12) Andire kasebaa hassayidi hagaadan giis: “Taani tana keehi mooranchchadan xeellaysinne yeellatays. SHin taani woossa simmiyo wode ubban, tawu loꞌꞌobay siyettees. Taani kaseegaappe aaruwan woppu gays.” Neeni woyga woossanaakko erennaba gidikko, ba nagaraappe simmida Kawuwaa Daawiti woossido Mazamure 51nne 65n deꞌiya woosaa beꞌa.

Ubbatoo Geeshsha Maxaafaa xannaꞌa. Yaatiyoogee neeni ayyaanaaban minnanaadaaninne kaseegaappe aaruwan Yihoowa siiqanaadan maaddana. (Maz. 19:7-11) Falepi hagaadan giis: “Ubbatoo Geeshsha Maxaafaa nabbabiyoonne xannaꞌiyo prograamee tawu baynna gishshawu, shuggaasinne Yihoowa azzanttaas. Taani he balaa zaarettada oottanawu koyabeenna gishshawu, ubbatoo buzo xannaꞌanawu kuuyaas.” Neenikka yaatana danddayaasa. Buzo xinaatiyawu haniya huuphe yohuwaa demmanawu maadoy koshshikko, kayma laggee maaddanaadan oychchana danddayaasa.

Ne ishanttuuranne michchonttuura dabbotaa zaarettada mintta. Gubaaꞌiyaa simmida amaridaageeti harati banttabaa iitabaa qoppoosona giidi hirggoosona. Larisa hagaadan gaasu: “Taani keehi yeellataas. Taani ta ishanttanne michchontta qohidabadaaninne azzanttidabadan tawu siyettiis. Tawu daro layttawu hegaadan siyettiis.” Neeni ayyaanaaban zaarettada minnanawu baaxetiyo wode, cimatinne hara kayma ishantti nena maaddanawu koyiyoogaa ammanetta. (“Cimati Ay Oottana Danddayiyoonaa?” giya saaxiniyaakka xeella.) Neeni simmidoogan eti ufayttoosonanne minnanaadan koyoosona!—Lee. 17:17.

Kaseegaappe aaruwan gubaaꞌiyaakko shiiqanawu waatana danddayay? Ne ishanttuuranne michchonttuura ubba shiiqota shiiqa, qassi etaara ubbatoo haggaaza. Hegee waati maaddanee? Felikisi hagaadan giis: “Gubaaꞌee taani simmanaadan koyiis. Gubaaꞌe tana siiqees. Taani zaarettada gubaaꞌiyaa yara gididabadan, Yihooway tawu atto giidabadaaninne Yihoowawu haggaazana danddayiyaabadan tawu siyettanaadan eti ubbay tana maaddidosona.”—“Neeni Ay Oottana Danddayay?” giya saaxiniyaakka xeella.

HIDOOTAA QANXXOPPA!

Seexaanay neeni Yihoowaara dabbotaa zaarettada minttanawu baaxetiyo wode wolqqaama metoy gakkanaadan oottiyoogan neeni shugganaadan oottanawu maliyoogaa aggenna. (Luq. 4:13) Haꞌꞌi kaseegaappe aaruwan Yihoowaara dabbotaa minttanawu giigetta.

Yihooway ba dorssata xeelliyaagan hagaadan giidi qaalaa geliis: “Taani bayidaageeta koyana; wora biidaageetakka zaarana; meqqidaageeta koolana; harggidaageetakka pattana.” (Hiz. 34:16) Yihooway ayyaanaaban shuggida hara daroti banaara zaaretti dabbotanaadan maaddiis. Neeni awudeegaappenne aaruwan aara dabbotaa minttada deꞌanaadan Yihooway nena maaddanawu koyiyoogaa ammanetta.