Ne Ammanoy Ay Keena Minoo?

1. Nuuni nuna oychchana danddayiyo oyshay aybee?

WORDDO haymaanootee xayiyoogaa, Maagooga Googi gattiyo qohuwaanne Armmageedoona olaa mala mata wode gakkanabaa xeelliyaagan issi issitoo neeni hirggaa eray? ‘He yashshiyaabati gakkiyo wode taani ammanettada deꞌanee,’ gaada nena oychcha eray? Neeni he oyshatubaa qoppikko, ha xinaatee ekettido waanna xiqisiyan Yesuusi yootidobaa pilggiyoogee nena maaddees. Yesuusi ba erissiyo ashkkaratussi hagaadan giis: “Intte wozanai hirggoppo; . . . ammanite.” (Yoh. 14:1) Sinttappe gakkanabay ayba gidikkonne nuuni woppu gaanaadan mino ammanoy nuna maaddana.

2. Nu ammanuwaa waati minttana danddayiyoo, qassi ha huuphe yohuwan beꞌanabay aybee?

² Nu ammanuwaa paacciyaabati nuna gakkiyo wode nuuni waatanaakko haꞌꞌi qoppikko, nu ammanuwaa minttanawu ay oottana koshshiyaakko erana. Nuuni hegaabaa qoppikko, nu ammanuwaa minttana koshshiyo ginaa akeekoos. Nuuni paaciyaa gencciyo wode ubban, nu ammanoy minni minni bees. Hegee sinttappe nuna gakkana paaceta nuuni genccanaadan maaddana. Yesuusi erissiyo ashkkarati ammanuwaa gujjana koshshiyoogaa bessiya oyddu hanotata ha huuphe yohuwan pilggana. Nuuni ha wodiyan hegaa mala metota waati genccana danddayiyaakko, qassi hegee sinttappe gakkanabawu nuuni giigettanaadan waati oottana danddayiyaakko beꞌana.

DEꞌUWAASSI KOSHSHIYAABAA XOOSSAY KUNTTANAAGAA NUUNI AMMANANA KOSHSHEES

3. Maatiyoosa 6:30, 33n Yesuusi yootidobay nuuni ay akeekanaadan maaddii?

³ Issi uri ba machcheessinne ba naatussi qumay, maayoynne keettay deꞌanaadan koyiyoogee wotti deꞌiyaaba. Ha wayssiya wodiyan yaatiyoogee issi issitoo metees. Nu ishanttuppenne michchonttuppe amaridaageeti bantta oosuwaappe kiyidosona, qassi eti hara ooso demmanawu keehi baaxetikkokka demmibookkona. Harati qassi Kiristtaanetussi hanenna oosuwaa oottennan ixxidosona. Hegaa mala hanotatun, nu soo asawu koshshiyaabaa Yihooway kunttanaagaa nuuni mintti ammanana koshshees. Maatiyoosa shemppo ichchashaappe laappunan Yesuusi ba erissiyo ashkkarata tamaarissidoban hegaa qonccissiis. (Maatiyoosa 6:30, 33 nabbaba.) Yihooway nuna aggennaagaa nuuni loytti ammanettiyo wode, Yihoowa haggaazuwan ubbatoo xeelaa wottana danddayoos. Nu deꞌuwaassi koshshiyaabaa kunttiyoogan Yihooway nuna maaddiyoogaa akeekikko, nuuni kaseegaappe aaruwan Yihoowakko shiiqananne nu ammanoy minnana.

4-5. Issi keettaa asay deꞌuwaassi koshshiyaabaa demmanawu metootidoogaa gaasuwan hirggido wode eta maaddidabay aybee?

⁴ Venezuweelan deꞌiya issi keettaa asay deꞌuwawu koshshiyaabaa waati demmanaakko hirggido wode, Yihooway eta waati maaddidaakko akeekite. Kase, Kasttirontta soo asay bantta gadiyaa oottidi banttawu gidiya miishshaa demmoosona. Guyyeppe, massaariyaa oyqqidi yiida asati eta biittaa ekkidi eta yedettidosona. Aaway Miguꞌeli hagaadan giis: “Nuuni haꞌꞌi deꞌiyo guutta gadee nubaa gidenna; qassi nuussi koshshiyaabaa kunttanawu he gadiyaa oottoos. Taani ubba galla Yihooway he gallassawu koshshiyaabaa immanaadan woossays.” He soo asawu deꞌoy wayssiyaaba gidikkonne, etassi galla galla koshshiyaabaa nu siiqo Aaway kunttanaagaa eti ammanettiyo gishshawu, Kasttiro soo asay shiiqota ubbatoo shiiqeesinne haggaazees. Eti bantta deꞌuwan Kawotettaabaa kaseyidosona, qassi etawu koshshiyaabaa Yihooway kunttiis.

⁵ He wayssiya wodiyan, Miguꞌelinne A machchiyaa Yura, banttawu koshshiyaabaa Yihooway waati kunttiyaakko akeekidosona. Etawu koshshiyaabata immanawu woy Miguꞌeli oosuwaa demmanaadan maaddanawu Yihooway issi issitoo ishanttanne michchontta goꞌettiis. Qassi hara wode, Yihooway etawu koshshiya issi issibaa macara biiruwaa baggaara kunttiis. Yihooway eta mule aggibeenna. Hegaappe denddidaagan, bantta soo asaa ammanoy minnidoogaa eti akeekidosona. Eta bayra naꞌiyaa Yoselina Yihooway banttana maaddido wode hanida issi issibata yoota simmada hagaadan gaasu: “Yihooway nuna waati maaddidaakko beꞌiyoogee minttettiyaaba. I ta dabbo gidiyo gishshawu I tana ubbatoo maaddanaagaa ammanettays.” A gujjada hagaadan gaasu: “Nu soo asay genccido metoti nuuni sinttappe gakkana wolqqaama paacetussi giigettanaadan oottidosona.”

6. Neeni miishshaa metootiyo wode ne ammanuwaa waata minttana danddayay?

⁶ Nena miishshay metii? Yaatikko, hagee neessi iita wode. SHin neeni ne ammanuwaa minttanawu ha wodiyaa goꞌettana danddayaasa. Yihoowa woossa, qassi Yesuusi Maatiyoosa 6:25-34 yootidobaa nabbabada hegaa wotta dentta qoppa. Ha wodiyan Yihoowa oosuwaa minni oottiyaageetussi koshshiyaabaa I kunttiyoogaa bessiya deꞌuwan hanidabata qoppa. (1 Qor. 15:58) Yaatiyoogee neegaadan metootida harata Yihooway maaddidoogaadan nenakka I maaddanaagaa ne mintta ammananaadan oottana. I neessi koshshiyaabaanne hegaa I waati kunttanaakko erees. Yihooway nena maaddiyoogaa neeni akeekikko, sinttappe nena gakkana wolqqaama paaceta genccanawu maaddiyaagaa keenaa ne ammanoy minnana.—Imb. 3:17, 18.

WOLQQAAMA METUWAA GENCCANAWU NUUSSI AMMANOY KOSHSHEES

7. Maatiyoosa 8:23-26y yootiyoogaadan, “wolqqaama gotee” erissiyo ashkkaratu ammanuwaa waati paaccidee?

⁷ Yesuusinne I erissiyo ashkkarati wolwoluwan biishin eti qoppennan wolqqaama gotee denddiis. Eti bantta ammanuwaa minttana koshshiyoogaa akeekanaadan eta maaddanawu Yesuusi he hanotaa goꞌettiis. (Maatiyoosa 8:23-26 nabbaba.) Wolqqaama beetay denddin haattay wolwoluwan kumiyo wode, Yesuusi woppu giidi xiskkiis. Erissiyo ashkkarati dagammidi A denttidi nuna ashsha giidi oychchido wode, Goday eta loddan hagaadan oychchiis: “Ha ammanoi paccidoogeetoo, aissi yayyeetii?” Yesuusanne aara deꞌiyaageeta Yihooway qohuwaappe ashshana danddayiyoogaa yayyida erissiyo ashkkarati akeekana koshshiis. Nuuni ay tamaariyoo? Wolqqaama gotiyaa woy an leemisettana danddayiya wayssiya ay metokka nuuni genccanaadan mino ammanoy nuna maaddana danddayees.

8-9. Aneli ammanoy waani paacettidee, qassi O aybi maaddidee?

⁸ Porto Riko biittan deꞌiya Anel giyo aqo oyqqabeenna michchiyaa wolqqaama paaciyaa genccidoogaa gaasuwan I ammanoy ay keena minnidaakko qoppa. “Wolqqaama gotee” qohidoogee iyyo paace gidiis. Mariya giyo wolqqaama gotee 2017 Aneli keettaa xayssido wode he paacee doommiis. He gotiyaa gaasuwan A ba oosuwaa xayaasu. Anela hagaadan gaasu: “He wayssiya gallassatun taani unꞌꞌettaas; shin Yihoowan ammanettanawu woossana koshshiyoogaanne unꞌꞌettiyoogee taani oottana koshshiyaabaa oottennaadan diggana bessennaagaa akeekaas.”

⁹ Anela ba metota genccanaadan azazettiyoogeekka O maaddidoogaa yootaasu. A hagaadan gaasu: “Yihoowa dirijjitiya kaaletuwaa kaalliyoogee taani woppu gaada deꞌanaadan tana maaddiis. Yihooway ishanttunne michchonttu baggaara tana maaddiis. Eti tana minttettidosonanne taassi koshshiyaabaa immidosona.” A gujjada hagaadan gaasu: “Taani oychchidoogaappe aarobaa Yihooway tawu immido gishshawu ta ammanoy kaseegaappe aaruwan minniis.”

10. Nena wolqqaama metoy gakkiiddi deꞌikko, neeni waatana danddayay?

¹⁰ Nena wolqqaama metoy gakkiiddi deꞌii? Meretay gattiyo daafabaa gaasuwan neeni waayettaydda deꞌennan aggakka. Woy caddi oyqqiya harggee neeni hidootaa qanxxanaadan oottido gishshawu ay oottanaakko erennan aggana danddayaasa. Neeni issi issitoo unꞌꞌettennan waaya aggana; shin hegee neeni Yihoowan ammanettiyoogaa digganaadan oottoppa. Wozanappe woossiyoogan akko shiiqa. Yihooway nena maaddido kase wodetubaa wotta dentta qoppiyoogan ne ammanuwaa mintta. (Maz. 77:11, 12) I nena mule aggennaagaa ammanettana danddayaasa.

11. Aawatettay deꞌiyoogeetuyyo azazettanawu nuuni murttana koshshiyoy aybissee?

¹¹ Neeni metota genccanaadan maaddana danddayiya harabay aybee? Azazettiyoogee maaddiyoogaa Anela yootaasu. Yihoowaynne Yesuusi ammanettiyoogeetun ammanetta. Aawatettay deꞌiyoogeeti nuuni erenna kaaletuwaa issi issitoo immana danddayoosona. Gidoppe attin, azazettiyaageeta Yihooway anjjees. Azazettiyoogee shemppuwaa ashshiyoogaa A Qaalaappenne ammanettida ashkkaratu hanotaappe akeekoos. (Kes. 14:1-4; 2 Odi. 20:17) He hanotata wotta dentta qoppa. Hegaadan wotti dentti qoppiyoogee Yihoowa dirijjitee immiyo kaaletuwaa ha wodiyankka sinttappekka neeni loytta kaallanaadan oottana. (Ibr. 13:17) Yaatiyo gishshawu, mata wode yaana gita waayiyaa nuuni aynne yayyokko.—Lee. 3:25.

NAAQUWAA GENCCANAWU NUUSSI AMMANOY KOSHSHEES

12. Luqaasa 18:1-8y ammanuwaa giddooninne naaquwaa gencciyoogaa giddon deꞌiya gaytotettaa waati qonccissii?

¹² Yesuusi naaqoy ba erissiyo ashkkaratu ammanuwaa paaccanaagaa erees. Naaquwaa genccanaadan eta maaddanawu, Luqaasa maxaafan deꞌiya leemisuwaa yootiis. Makkalanchcha daannay bawu pirddanaadan mintta woossida amꞌꞌeebaa Yesuusi yootiis. Amꞌꞌiyaa aggennan woossikko, I wurssettan O maaddanaagaa ammanettaasu. Wurssettan, daannay I woosaa zaariis. Hegaappe ay tamaariyoo? Yihooway suure pirddees. Hegaa gishshawu Yesuusi hagaadan giis: “Yaatin bana maaddana mala, gallassinne qammi baakko waassiya doorettida asaassi Xoossai pirddennee?” (Luqaasa 18:1-8 nabbaba.) Yesuusi gujjidi hagaadan giis: “Asa Na7ai yiyo wode, ha sa7an ammano demmanee?” Nuna naaqoy gakkiyo wode, nuussi amꞌꞌeegaa mala mino ammanoy deꞌiyoogaa nuuni danddayiyoogaaninne gencciyoogan bessana koshshees. Nuussi hegaa mala ammanoy deꞌikko, Yihooway nuna maaddanaagaa ammanettana danddayoos. Woosawu gita wolqqay deꞌiyoogaakka nuuni ammanana koshshees. Nuuni issi issitoo nu woosaa zaaruwaa qoppibeenna ogiyan demmana danddayoos.

13. Naaqettida issi keettaa asaa woosay waati maaddidee?

¹³ Dimokiratik Repablik Kongo biittan deꞌiya Vero giyo michchee hanotaa qoppa. Deretettan woppay xayido wode, Vera ammanenna ba azinaaranne layttay 15 gidido bantta naꞌeera bantta heeraa aggidi baqatidosona. He keettaa asay biiddi ogee gorddettidosaa gakkin wotaaddarati eta essidi woranawu yashissidosona. Vera yeekkiyoogaa doommido wode, I naꞌiyaa cenggurssaa xoqqu oottada woossiyoogaaninne Yihoowa sunttaa ba woosan zaara zaarada xeesiyoogan ba aayyiyaa woppu gaanaadan oottanawu malaasu. Naꞌiyaa woosaa wurssiyo wode, wotaaddaratu halaqay, “Bii naꞌee, nena woosaa oonee tamaarissiday?” yaagidi oychchiis. A hagaadan zaaraasu: “Maatiyoosa 6:9-13n deꞌiya leemisuwaa kaallada ta aayyiyaa tamaarissaasu.” Wotaaddaratu halaqay hagaadan giis, “Bii naꞌee, nena yelidaageetuura saruwan ba, ne Xoossay Yihooway nena naago!”

14. Nu ammanuwaa paaccana danddayiyaabay aybee, qassi genccanaadan nuna aybi maaddanee?

¹⁴ Woosay keehi maaddiyoogaa nuuni mule dogana bessennaagaa he hanotatuppe tamaaroos. Neeni ne woosaa zaaruwaa eesuwaara woy maalaalissiya ogiyan demmennaagee ne ammanuwaa paaccana danddayees. Yesuusa leemisuwan odettida amꞌꞌeegaadan, aggennan woossa, nu Xoossay nena mule aggennaagaa ammanetta; yaatikko I koshshiya wodiyaaninne ba koyido ogiyan ne woosaa zaarana. Yihooway ba geeshsha ayyaanaa immanaadan ubbatoo woossa. (2 Qor. 4:7) Yihooway neeni kase waayettido ubbabaa doganaadan oottiyoogan nena mata wode keehi anjjanaagaa hassaya. Wayssiyaabata neeni Yihooway maaddin gencciyo wode, neeni minnananne sinttappe gakkiya paaceta genccana.—1 PHe. 1:6, 7.

METUWAA GENCCANAWU NUUSSI AMMANOY KOSHSHEES

15. Maatiyoosa 17:19, 20y yootiyoogaadan, Yesuusi erissiyo ashkkarata ayba metoy gakkidee?

¹⁵ Yesuusi ba erissiyo ashkkarata metuwaa genccanawu ammanoy maaddiyoogaa tamaarissiis. (Maatiyoosa 17:19, 20 nabbaba.) Eti issi wode daydanttaa kessidaba gidikkonne, hara wode qassi kessana danddayibookkona. Ayssi danddayibookkonaa? Yesuusi eti ammanuwaa gujjana koshshiyoogaa yootiis. Etawu mino ammanoy deꞌiyaakko, deriyaa keena gita metota eti xoonanaagaa etassi odiis! Nuuni genccanawu danddayennaba milatiya metoti ha wodiyan nuna gakkana danddayoosona.

16. Danobaa oottiyaageeti Geydi keettaawaa wori simmin genccanaadan ammanoy O waati maaddidee?

¹⁶ Guwatimala giyo biittan deꞌiya michchee Geydi hanotaa qoppa. Eti gubaaꞌiyaa shiiquwaappe soo simmishin danobaa oottiyaageeti I keettaawaa Eda woridosona. Geyda keehi kayyottidaba gidikkonne genccanaadan I ammanoy O waati maaddidee? A hagaadan gaasu: “Ta toohuwaa Yihoowan wottanaadan woosay tana maaddees, hegee taani woppu gaanaadan oottees. Ta soo asaa baggaaranne gubaaꞌiyan deꞌiya ishanttunne michchonttu baggaara Yihooway taassi koshshiyaabaa kunttiyoogaa taani akeekaas. Yihoowayyo minnada oottiyoogee taani keehi azzanennaadaaninne wonttobawu likkiyaappe aattada hirggennan deꞌanaadan maaddiis. Ha hanotaappe denddidaagan, sinttappe gakkana danddayiya metoy ayba gidikkonne, Yihooway, Yesuusinne dirijjitee maaddin genccana danddayiyoogaa taani eraas.”

17. Deriyaa keena gita metoy nuna gakkiyo wode nuuni waatana danddayiyoo?

¹⁷ Neeni siiqiyo asi hayqqin kayyottaydda deꞌay? Geeshsha Maxaafay hayquwaappe denddidaageetubaa yootiyo taariketa nabbabiyoogan dendduwaa hidootan ne ammaniyo ammanuwaa minttanawu takki gaada qoppa. Intte soo asaappe issi uri bohettido gishshawu azzanaydda deꞌay? Xoossaa seeray ubbatoo loꞌꞌo gidiyoogaa akeekanawu xannaꞌa. Nena gakkiya metoy ayba gidikkonne, ne ammanuwaa minttanawu hegaa loꞌꞌo injjedan goꞌetta. Neessi siyettiyaabaa Yihoowawu yoota. Haratuppe shaahettoppa; qassi ne ishanttuuranne michchonttuura matattada deꞌa. (Lee. 18:1) Neeni ne bolli gakkidabaa qoppiyoogee yeekkanaadan oottiyaaba gidikkonne, neeni genccanaadan maaddiyaabata ootta. (Maz. 126:5, 6) SHiiqota shiiqiyoogaa, sabbakiyoogaanne Geeshsha Maxaafaa nabbabiyoogaa aggoppa. Qassi Yihooway sinttappe neeyyo immanawu qaalaa gelido ufayssiyaabata ubbatoo qoppa. Yihooway nena waati maaddiyaakko neeni akeekiyo wode, ne A ammaniyo ammanoy kaseegaappe aaruwan minnana.

“NUUSSI AMMANUWAA GUJJA”

18. Neeni ne ammanoy mino gidennaagaa akeekikko, ay oottana danddayay?

¹⁸ Nena kase gakkida paacee woy ha wodiyan gakkiya paacee, ne ammanoy mino gidennaagaa neeni akeekanaadan oottikko, hidootaa qanxxoppa. Hegaa ne ammanuwaa minttiyo injjedan xeella. Yesuusi kiittidoogeeti oychchidoogaadan neenikka oychcha; eti hagaadan giidosona: “Nuussi ammanuwaa gujja.” (Luq. 17:5) Qassi, nuuni ha huuphe yohuwan beꞌido asatu hanotaa wotta dentta qoppa. Miguꞌelanne Yuriigaadan, Yihooway nena maaddiyoogaa ubbatoo hassaya. Veri naꞌeegaadaaninne Aneliigaadan nena gita metoy gakkiyo wodekka minttada Yihoowa woossa. Geydiigaadan, Yihooway neessi koshshiya maaduwaa soo asaa baggaara woy ishanttunne michchonttu baggaara immana danddayoogaa akeeka. Ha wodiyan nena gakkiya metuwaa neeni genccanaadan Yihooway immiyo maaduwaa ekkanawu eeno giikko, sinttappe nena ayba metoy gakkikkonne neeni genccanaadan I maaddanaagaa loytta ammanettana.

19. Yesuusi ay ammanettidee, qassi neeni ay ammanettana danddayay?

¹⁹ Yesuusi ba erissiyo ashkkarati ammanuwaa minttana koshshiyo ginaa akeekanaadan eta maaddidaba gidikkonne, sinttappe gakkana paaciyaa eti Yihoowa maaduwan genccanaagaa Yesuusi mule siribeenna. (Yoh. 14:1; 16:33) Mino ammanoy zawi baynna asay sinttappe yaana gita waayiyaappe attanawu maaddanaagaa I erees. (Ajj. 7:9, 14) Neeni eta giddon deꞌanee? Neeni haꞌꞌi ne ammanuwaa minttanawu neessi danddayettida ubbabaa oottikko, Yihoowa maaduwan eta giddon deꞌana!—Ibr. 10:39.