Yihoowappe Nena Aybinne SHaakkoppo

1. Yihooway nuukko shiiqanawu koyiyoogaa waati eriyoo?

YIHOOWAY nuuni akko shiiqanaadan shoobbees. (Yaaq. 4:8) I nu Xoossa, nu Aawanne nu Dabbo gidanawu koyees. I nu woosaa zaareesinne meto wodiyan nuna maaddees. Qassi I ba dirijjitiyaa baggaara nuna tamaarisseesinne naagees. SHin nuuni Yihoowakko shiiqanawu waatana koshshii?

2. Nuuni Yihoowakko waani shiiqana danddayiyoo?

² Nuuni Yihoowa woossiyoogan, A Qaalaa nabbabiyoogaaninne hegaa wotti dentti qoppiyoogan Yihoowakko shiiqana danddayoos. Yaatiyoogan, A loytti siiqoosinne nashshoos. Bonchchoynne sabay awu bessees; qassi yaatanawu nuuni keehi koyoos. (Ajj. 4:11) Nuuni Yihoowa loytti eriyo wode, aaninne nuna maaddanawu I immido dirijjitiyan loytti ammanettoos.

3. Dabloosi nuna Yihoowappe shaakkanawu waani baaxetii, shin nu Xoossaanne A dirijjitiyaa mule aggennaadan nuna aybi maaddanee? (Mazamure 31:13, 14)

³ SHin Dabloosi nuna Yihoowappe shaakkanawu baaxetees, ubba qassi nuna metoy gakkiyo wode hegaadan oottees. I hegaadan waati oottii? Nuuni Yihoowaaninne A dirijjitiyan ammanettiyoogaa leddan leddan agganaadan oottanawu baaxetiyoogaana. SHin nuuni A hiillata eqettana danddayoos. Nu ammanoy mino gidikko, qassi Yihoowan loytti ammanettikko, nu Xoossaanne A dirijjitiyaa mule aggokko.—Mazamure 31:13, 14 nabbaba.

4. Ha huuphe yohuwan nuuni ay beꞌanee?

⁴ Ha huuphe yohuwan, Seexaanay nuna paacciyo heezzu ogeta beꞌana; hegeeti ubbay nuuni Yihoowaaninne A dirijjitiyan loytti ammanettennaadan oottana danddayoosona. Ha paaceti Yihoowappe nuna waatidi shaakkana danddayiyoonaa? Qassi nuuni Yihoowawunne A dirijjitiyawu ammanettidi deꞌanawu waatana danddayiyoo?

NUNA METOY GAKKIYO WODE

5. Metoy nuuni Yihoowaninne A dirijjitiyan loytti ammanettennaadan waati oottana danddayii?

⁵ Issi issitoo so asay eqettiyoogaa woy oosuwaappe yedetettiyoogaa mala metoy nuna gakkees. Hegaa mala metoti nuuni Yihoowa dirijjitiyan loytti ammanettennaadaainne Yihoowappe shaahettanaadan waati oottana danddayiyoonaa? Daro wodiyawu nuna metoy gakkikko, nuuni hidootaa qanxxananne unꞌꞌettana danddayoos. Seexaanay he wodiyaa goꞌettidi, Yihooway nuna siiqennabadan nuuni qoppanaadan oottees. Metoy nu bolli gakkanaadan oottiyay Yihoowa woy A dirijjitiya giidi nuuni qoppanaadan Dabloosi koyees. Gibxxen deꞌida amarida Israaꞌeelata hagaa malabay gakkiis. Aylletettaappe eta laꞌa kessanawu Yihooway Muusanne Aaroona sunttidoogaa eti koyro ammanidosona. (Kes. 4:29-31) SHin guyyeppe Paarooni eta barchcheyido wode, bantta metuwaa Muusenne Aaroona bolli gaasoyidi hagaadan giidosona: “Intte nuna kawuwaaninne a oosanchchatun ixissideta; qassi eti nuna worana mala, bisuwaa eta kushiyan wottideta.” (Kes. 5:19-21) Eti Xoossawu ammanettida ashkkaratu bolli gaasoyidosona. Hegee ayba azzanttiyaabee! Adussa wodiyawu nena metoy gakkikko, Yihoowanne A dirijjitiyaa ubbatoo waata ammanettana danddayay?

6. Metuwaa gencciyoogaa xeelliyaagan hananabaa yootiya Imbbaaqoomappe nuuni ay tamaariyoo? (Imbbaaqooma 3:17-19)

⁶ Neeyyo siyettiya ubbabaa woosan Yihoowawu yoota, qassi A maaduwaa koya. Hananabaa yootiya Imbbaaqooma daro metoy gakkiis. Issi wode, Yihooway A siiqiyoogaa I siriis. Hegaa gishshawu, I bawu siyettiya ubbabaa woosan Yihoowawu yootiis. I hagaadan giis: “Abeet GODAU, neeni tana maaddanaadan taani xeesiyo wode, aude gakkanaashin siyennan ixxuutee? . . . Mooruwaa xeellaidda neeni aissi co77u gaada danddayai?” (Imb. 1:2, 3) Yihooway ammanettidi awu oottiyaagee wozanappe woossido woosaa siyiis. (Imb. 2:2, 3) Imbbaaqoomi Yihooway ba asaa waati ashshidaakko wotti dentti qoppi simmidi, zaarettidi keehi ufayttiis. Yihooway A siiqiyoogaanne I ay metuwaakka genccanaadan maaddanaagaa ammanettiis. (Imbbaaqooma 3:17-19 nabbaba.) Nuuni ay tamaariyoo? Nena metoy gakkiyo wode, Yihoowa woossa qassi neessi siyettiyaabaa awu yoota. Yaatada I maaddanaadan oychcha. Neeni yaatiyo wode, genccanawu koshshiya wolqqaa Yihooway neessi immanaagaa ammanettana danddayaasa. Qassi, nena I maaddidoogaa akeekiyo wode, neeni kaseegaappe aaruwan an ammanettana.

7. SHerlli dabboy O ay ammanttanawu koyidee, qassi A Yihoowan ammanettiyoogaa aggennaadan maaddidabay aybee?

⁷ Yihoowakko shiiqada deꞌanaadan maaddiyaabata ubbatoo ootta. Yaatiyoogee, Papuwaa Niwu Giinin deꞌiya SHerllo giyo michchiyo metoy gakkido wode maaddiis.b SHerllintta soo asay hiyyeesa, qassi gidiya qumaa demmanawu issi issitoo metootoosona. I dabboy A Yihoowan ammanettennaadan oottanawu maliis. I hagaadan giis: “Xoossaa geeshsha ayyaanay nena maaddiyoogaa yootaasa, shin he maadoy anee? Intte soo asay haꞌꞌikka hiyyeesa. Sabbakiyoogan ne wodiyaa coo wurssaasa.” SHerlla hagaadan gaasu: “Taani ‘Xoossay tawu qoppiiyye qoppennee?’ gaada oychchaas. Yaatiyo gishshawu, taani sohuwaara Yihoowa woossaas, qassi tana qofissiya ubbabaa awu yootaas. Taani Geeshsha Maxaafaanne nu xuufeta ubbatoo nabbabays, qassi sabbakiyoogaanne shiiqota shiiqiyoogaa aggabeykke.” Yihooway eta soo asawu koshshiyaabaa kunttiyoogaa A sohuwaara akeekaasu. Eta soo asay namisettibeenna, qassi eti ufayttoosona. SHerlla hagaadan gaasu: “Yihooway ta woosaa zaariis.” (1 Xim. 6:6-8) Neeni Yihoowakko shiiqada deꞌanawu maaddiyaabata ubbatoo oottikko, neenikka metoy woy siree Yihoowappe nena shaakkanaadan paqqadakka.

AAWATETTAY DEꞌIYO ISHANTTA QOHOY GAKKIYO WODE

8. Yihoowa dirijjitiyan aawatettay deꞌiyo ishantta aybi gakkana danddayii?

⁸ Nu morkketi eraadoone malaban woy Intternneetiyan, Yihoowa dirijjitiyan aawatettay deꞌiyo ishantta xeelliyaagan worddobaa woy likke gidennabaa yootoosona. (Maz. 31:13) Nu ishanttuppe amaridaageeti danobaa oottida asadan oyqettidi qashettidosona. Kiitettida PHawuloosa wordduwan mootidi qachchido wode, koyro xeetu layttan deꞌida Kiristtaaneta hegaa malabay gakkiis. Eti waatidonaa?

9. Kiitettida PHawuloosi qashettido wode issi issi Kiristtaaneti waatidonaa?

⁹ Kiitettida PHawuloosi Roomen qashettido wode koyro xeetu layttan deꞌida amarida Kiristtaaneti A maaddiyoogaa aggidosona. (2 Xim. 1:8, 15) Aybissi? Daro asay PHawuloosi danobaa oottidabadan qoppido gishshawu, eti an yeellatidonaa? (2 Xim. 2:8, 9) Woy eti banttanakka yedetay gakkana giidi hirggidonaa? Eta gaasoy aybanne gidin, PHawuloosawu aybi siyettidaakko qoppa. I daro metuwaa gencciis, ubba eta gishshawu ba shemppuwaa daafabankka yeggiis. (Oos. 20:18-21; 2 Qor. 1:8) Maadoy koshshiyo wode PHawuloosa maaddennan aggida asata milatanawu mule koyokko! Aawatettay deꞌiyo ishantta yedetay gakkiyo wode nuuni qoppana koshshiyaabay aybee?

10. Aawatettay deꞌiyo ishantta yedetay gakkiyo wode nuuni ay hassayana koshshii?

¹⁰ Nuna yedetay aybissi gakkiyaakko, qassi hegaa gattiyay oonakko hassaya. Naaꞌꞌantto Ximootiyoosa 3:12y hagaadan gees: “Tumatettan Kiristtoos Yesuusan Xoossaa milatidi de7anau dosiya ubbai yedetettana.” Yaatiyo gishshawu, aawatettay deꞌiyo ishantta Seexaanay qohiyo wode nuuni maalaalettana koshshenna. He ishantti Yihoowawu ammanettiyoogaa agganaadan I koyees, qassi nunakka yashissanawu koyees.—1 PHe. 5:8.

11. Henesifooru hanotaappe nuuni ay tamaariyoo? (2 Ximootiyoosa 1:16-18)

¹¹ Ne ishantta ubbatoo maadda, qassi etappe mule shaahettoppa. (2 Ximootiyoosa 1:16-18 nabbaba.) PHawuloosi qashettido wode koyro xeetu layttan deꞌida Henesifooru haratuppe dummatiyaabaa oottiis. PHawuloosi “qasho keettan de7iyoogan i yeellatibeenna.” Henesifooru PHawuloosa koyi demmidi, koshshiyaaban A maaddanawu baaxetiis. Yaatiyoogan, I ba shemppuwaa daafaban yeggiis. Nuuni ay tamaariyoo? Yedetay gakkiiddi deꞌiyo nu ishantta maaddiyoogaa yashshay digganaadan nuuni oottana koshshenna. Nu ishantta maaddanawu nuussi danddayettida ubbabaa oottiyaageeta gidoos. (Lee. 17:17) Nuuni eta siiqananne maaddana koshshees.

12. Raashiyan deꞌiya nu ishanttuppenne michchonttuppe ay tamaariyoo?

¹² Raashiyan deꞌiya ishanttinne michchontti qashettida bantta mala Kiristtaaneta maaddanawu waatidaakko beꞌa. Amaridaageeti shilootan eqqido wode, daro ishanttinne michchontti eta kaafanawu pirdda keettaa yiidosona. Nuuni ay tamaariyoo? Aawatettay deꞌiyo ishanttu sunttay moorettikko, eti qashettikko woy yedetettikko yeellatoppa. Etawu woossa, eta so asaa yaratussi qoppiyoogaa bessa, qassi eta maaddiyo hara ogeta koya.—Oos. 12:5; 2 Qor. 1:10, 11.

HARATI NUNA BORIYO WODE

13. Harati nuna boriyoogee nuuni Yihoowaninne A dirijjitiyan loytti ammanettennaadan waati oottana danddayii?

¹³ Nuuni sabbakiyo woy Yihooway kessido kandduwaa maaraa kaalliyo gishshawu, ammanenna dabboti, nunaara oottiyaageeti woy nunaara tamaariyaageeti nuna borana danddayoosona. (1 PHe. 4:4) Eti hagaadan gaana danddayoosona: “Ubba asaadan nena dosays, shin ne haymaanootee laꞌatettaa diggees, qassi wodiyaadan hanenna.” Bohettidaageeta nuuni oyqqiyo ogiyaa xeelliyaagan issoti issoti nuna hagaadan giidi borana danddayoosona: “Neeni nena asa siiqiya ura woygada gaana danddayay?” Hegaa mala qofati Yihooway kessido maarati likkeeshsha giidi nuuni siranaadan oottana danddayoosona. Nuuni hagaadan qoppiyoogaa doommana danddayoos: ‘Yihooway taappe keehi darobaa koyii? A dirijjitee laꞌatettaa diggii?’ Hegaa mala hanotay nena gakkiiddi deꞌikko, Yihoowakkonne A dirijjitiyaakko shiiqada waanada deꞌana danddayay?

14. Yihooway kessido maaraadan nuuni deꞌiyo gishshawu harati nuna qilliicciyo wode nuuni waatana koshshii? (Mazamure 119:50-52)

¹⁴ Yihooway kessido maarata kaallanawu murtta. Harati boriyo wodekka, Iyyoobi Yihooway kessido maarata kaalliis. Iyyooba worddo laggetuppe issoy Iyyoobi Xoossay kessido maaraa kaallin aggin, hegee Xoossaa qofissenna giidi A ammanttanawu maliis. (Iyy. 4:17, 18; 22:3) SHin Iyyoobi he wordduwaa ammanibeenna. Yihooway kessido maarati likke gidiyoogaa Iyyoobi eriyo gishshawu, hegeeta kaallanawu murttiis. I ammanettennaadan harati oottana mala paqqadibeenna. (Iyy. 27:5, 6) Nuuni ay tamaariyoo? Harati boriyoogee, Yihooway kessido maaraa neeni siranaadan oottoppo. Ne deꞌuwan hanidabaa qoppa. Yihooway kessido maaray likke gidiyoogaa neeni ne deꞌuwan darotoo beꞌennan aggakka. He maarata mintti kaalliya dirijjitiyaa kaafanawu murtta. Simmi yaakko, daro asay nuna borikkokka, Yihoowawu haggaaziyoogaa mule aggokko.—Mazamure 119:50-52 nabbaba.

15. Birijito harati boridoy aybissee?

¹⁵ Hindde biittan deꞌiya, Birijito giyo michchee hanotaa qoppa. I ammanuwaa gishshawu eta soo asay O boriis. A 1997n xammaqettada daro takkennan, Yihoowa Markka gidenna I azinay oosuwaappe yedetettiis. Hegaa gishshawu, I hara kataman deꞌiya bantta soo asaakko Birjitonne bantta macca naata efiidi yan deꞌanawu qofaa qachchiis. SHin Birijito wolqqaama paacee gakkiis. I keettaawawu oosoy baynna gishshawu, bantta soo asawu koshshiyaabaa kunttanawu A kumetta gallassaa oottana koshshiis. Hegaa bollikka, iyyo matan deꞌiya gubaaꞌee A deꞌiyoosaappe 350 kilo meetire gidiyaagaa haakkees. I ammanuwaa gishshawu, azinantta soo asay O eqettidoogee azzanttiyaaba. Eti keehi eqettido gishshawu Birjiti soo asay guyye simmana koshshiis. He wode qoppennan I azinay hayqqiis. Guyyeppe, I macca naatuppe issinna 12 layttan kansseriyan hayqqaasu. Birijiti dabboti ha ubbabaa iini gaasoyidoogee hanotay yaa iitanaadan oottiis. Eti, A Yihoowa Markka gidennaakko ha iitabaa ubbay O gakkenna giidi yootidosona. A haꞌꞌikka Yihoowan ammanettiyoogaa aggabeykku, qassi A dirijjitiyaakko shiiqada deꞌawusu.

16. Birijita Yihoowakkonne A dirijjitiyaakko shiiqada deꞌido gishshawu waana anjjettadee?

¹⁶ Birijita, gubaaꞌee deꞌiyoosaappe keehi haakkada deꞌiyo gishshawu, woradaa xomoosiya ishay A ba heeran sabbakanaadaaninne ba keettan shiiqota kaalettanaadan minttettiis. Koyro heeran, hegee keehi deexxiyaabadan iyyo siyettiis. SHin he ishay zoridobaa A oosuwan peeshshaasu. A haratussi mishiraachuwaa yootawusu, ba son shiiqota shiiqawusu, qassi ba macca naatuura so asaa goynuwaa ubbatoo goynnawusu. Hegee ayba ayfe demissidee? Birijita darota Geeshsha Maxaafaa xannaꞌissiyoogaa doommaasu, qassi etappe daroti xammaqettidosona. A 2005n ubba wode aqinye gidada haggaaziyoogaa doommaasu. Yihoowaninne A dirijjitiyan ammanettidoogee A anjjettanaadan oottiis. I macca naati ammanettidi Yihoowawu haggaazoosona, qassi haꞌꞌi I heeran naaꞌꞌu gubaaꞌee deꞌees! Birijita metuwaa genccanaadaaninne so asay boriyoogaa danddayanaadan Yihooway wolqqaa immidoogaa ammanettawusu.

YIHOOWAWUNNE A DIRIJJITIYAWU AMMANETTADA DEꞌA

17. Nuuni ay oottanawu murttana koshshii?

¹⁷ Yihooway nuna maaddenna, qassi Yihoowa dirijjitiyan deꞌiyoogee nuuni keehi metootanaadan oottees giidi ammananaadan Seexaanay koyees. Aawatettay deꞌiyo ishanttu sunttay mooretikko, eta yedetay gakkikko woy eti qashettikko, nuuni yayyanaadan Seexaanay koyees. I harati nuna boranaadan oottiyoogan, Yihooway kessido maaratuuninne A dirijjitiyan loytti ammanettennaadan oottanawu koyees. Gidikkonne, nuuni A iita hiillaa loytti eriyo gishshawu cimettokko. (2 Qor. 2:11) Seexaanaa wordduwaa eqettanawu, qassi Yihoowawunne A dirijjitiyawu ammanettada deꞌanawu murtta. Yihooway nena mule aggennaagaa hassaya. (Maz. 28:7) Simmi yaakko, Yihoowappe nena aybinne shaakkoppo!—Roo. 8:35-39.

18. Nuuni kaalliya huuphe yohuwan ay xannaꞌanee?

¹⁸ Ha huuphe yohuwan Seexaanay goꞌettana danddayiyo paaceta beꞌida. SHin gubaaꞌiyan deꞌiyaageetuppe gakkiya paacee, nuuni Yihoowaninne A dirijjitiyan ammanettiyoogee paacettanaadankka oottana danddayees. Nuuni he paaceta waatidi xoonana danddayiyoo? Hegaa kaalliya huuphe yohuwan xannaꞌana.