1 | Woosaa “Inttena Hirggissiya Ubbabaa A Bolli Olite”

GEESHSHA MAXAAFAY HAGAADAN GEES: “[Xoossay] intteyyo qoppiyo gishshau, inttena hirggissiya ubbabaa a bolli olite.”—1 PHEEXIROOSA 5:7.

Hegee Woygiyoogee?

Xoossaa Yihooway nuuni nuna hirggissiya ubbabaa awu yootanaadan shoobbees. (Mazamure 55:22) Nuuni ay metuwaakka xeelliyaagan woossana danddayoos. Hegee nuna qofissiyaaba gidikko, Yihoowakka qofissees; ayssi giikko, Yihooway nuussi qoppees. Akko woossiyoogee nuuni sarotettaa demmanawu keehi koshshiyaaba.—Piliphphisiyuusa 4:6, 7.

Hegee Waati Maaddii?

Nuuni guuggiyaa sahuwan waayettiyo wode, nurkka attidabadan nuussi siyettana danddayees. Nuna gakkiya metuwaa hara asay ubbatoo muleera akeekenna. (Leemiso 14:10) SHin, nuuni nuna qofissidabaa Xoossawu wozanappe woosan yootiyo wode, I ubbatoo nu yootiyoobaa qaretan ezggeesinne nu hanotaa akeekees. Yihooway nuna beꞌees, nu waayiyaa akeekees, qassi nuna hirggissiya ubbabaa awu woosan yootanaadan koyees.—2 Hanidabaa Odiya 6:29, 30.

Yihoowa woossiyoogee, I nuuyyo qoppiyoogaa nuuni mintti ammanettanaadan oottees. Yihoowa hagaadan giidi woossida mazamuraawiyaagaadan nuunikka gaana danddayoos: ‘Ta metuwaa neeni beꞌadasanne ta tuggaa eradasa.’ (Mazamure 31:7) Yihooway nuna gakkiya metuwaa akeekiyoogaa eriyoogee, nuuni metuwaa genccanaadan maaddees. SHin, I nuna unꞌꞌissiyaabaa eriyoogaa xalla gidennan, darobaa oottees. I nuna gakkiya metuwaa oogaappenne aaruwan akeekees, qassi nuuni minttettiya qofaa Geeshsha Maxaafaappe demmanaadan maaddees.

Juuliyaana Geeshsha Maxaafay Waati Maaddiiddi Deꞌii?

Unꞌꞌettiyoogee Tana Qohido Ogiyaa

“Taani keehi unꞌꞌettays, qassi obseessiv-Komppelssiv disordder (OCD) giyo harggee tana sakkees. Issi issitoo taani coo unꞌꞌettays. Taani issitoo payya, qassi hegaappe simmin ayba gaasoynne baynnan keehi unꞌꞌettays. Ubba taani hara asaara deꞌiyo wode unꞌꞌettays. Asay tabaa ay qoppiishsha gaada taani keehi hirggays.

“Taani unꞌꞌettiyoogaa eriya ta laggeti, tana maaddanawu banttawu danddayettida ubbabaa oottoosona. Issi issitoo eti maaddennabaa yootiyoogaa erays. SHin eti tana maaddanawu koyiyo gishshawu taani eta keehi galatays.

“Issi issitoo taani unꞌꞌettiyoogeenne OCD giyo harggee, taani woossanawu metootanaadan oottees. Taani qofay shaahettennan Yihoowa woossanawu keehi metootays. Taani issibaa qoppaydda hegaa aggada sohuwaara harabaa qoppiyo gishshawu issi issitoo tawu kirqqi gees. Hegaadan haniyo wode, taani qoppiyoobaanne tawu siyettiyaabaa Yihoowawu yootiyoogee keehi metiyaaba.”

Geeshsha Maxaafay Tana Maaddido Ogiyaa

“Xoossay siyanaadan keehi adussidi woy malꞌꞌetti haasayidi woossana koshshennaagaa taani Geeshsha Maxaafan nabbabidobaappe akeekaas. Issi issitoo, taani tawu siyettiyaabaa Yihoowawu yootanawu metootiyo wode, ‘Yihoowa, hayyanaa tana maadda’ gaada qanttan woossays. Hegaa mala wodiyankka, Yihooway ta hanotaa akeekiyoogaanne he wode taani koyidobaa immiyoogaa eraas. Taani woossiyoogaa xalla gidennan, akkamettanawukka koyaas. Ta payyatettay kaseegaappe loꞌꞌanaadan he naaꞌꞌubati tana maaddido gishshawu, taani keehippe ufayttays. Saluwan deꞌiya ta Aaway tana maaddanaadan oychchiyoogee keehi baaxeyiyaaba gidikkonne, I tana siiqiyoogaanne tana maaddanawu koyiyoogaa eriyo gishshawu hegaadan oottays.”