2 | ‘Xoossaa Maxaafay Immiyo Minttettuwaa’

GEESHSHA MAXAAFAY HAGAADAN GEES: “Xoossaa maxaafai nuuyyo immiyo genccaaninne minttettuwan nuuni demmana giidi ufaissan naagi uttidoogee de7ana mala, Xoossaa maxaafan xaafettida ubbabai nuna tamaarissanau xaafettiis.”—ROOME 15:4.

Hegee Woygiyoogee?

Nuuni iita qofaa agganaadan maaddana danddayiya minttettiyaanne genccanaadan oottiya qofaa Geeshsha Maxaafay yootees. Nuuni unꞌꞌettanaadan oottiyaabay mata wode xayanaagaakka Geeshsha Maxaafay yootees.

Hegee Waati Maaddii?

Nuna ubbaakka issi issitoo ufayttennaadan oottiyaabay gakkees; shin guuggiyaa sahettiyaageeti ubbatoo qofan keehi unꞌꞌettana danddayoosona. Geeshsha Maxaafay waati maaddana danddayii?

Iita qofaa aggidi loꞌꞌobaa qoppanaadan maaddiya darobata Geeshsha Maxaafay yootees. (Piliphphisiyuusa 4:8) Geeshsha Maxaafay nuuni unꞌꞌettiyoogaa aggidi minttettettiyaabaanne woppissiyaabaa qoppanaadan maaddees.—Mazamure 94:18, 19.
Nuuni nuna pattennabadan qoppiyoogaa agganaadan Geeshsha Maxaafay maaddana danddayees.—Luqaasa 12:6, 7.
Nuuni nurkka deꞌennaagaanne nuna Medhdhida Xoossay nuuyyo siyettiya ubbabaa akeekiyoogaa daro Geeshsha Maxaafaa xiqiseti yootoosona.—Mazamure 34:18; 1 Yohaannisa 3:19, 20.
Nuna kase gakkida nuuni hassayiyo iitabaa Xoossay xayssanaagaa Geeshsha Maxaafay yootees. (Isiyaasa 65:17; Ajjuutaa 21:4) Nuuni unꞌꞌissiyaabaa qoppidi waayettiyo wode, ha hidootay nuuni genccanaadan maaddana danddayees.

Jeesiiko Geeshsha Maxaafay Waati Maaddiiddi Deꞌii?

Unꞌꞌettiyoogee Tana Qohido Ogiyaa

“Tawu layttay 25 gidiyo wode, unꞌꞌettaasinne wolqqaama guuggiyaa sahuwaa sahettaas. Tana kase gakkida azzanttiyaabata hassayada unꞌꞌettays. Tana kase gakkida iitabata qoppiyoogee taani unꞌꞌettanaadan oottidoogaa akeekanaadan dottoreti maaddidosona. Bessiya xaliya ekkiyoogaa bolli, taani iita qofaa qoppanaadan oottiyaabaa eranaadan, qassi hegaa agganaadan aakimiyaa maadoy koshshiis.”

Geeshsha Maxaafay Tana Maaddido Ogiyaa

“Taani keehi unꞌꞌettiyo wode yayyays, keehi hirggaysinne xiskkuwaa xayays. Taani darotoo qammi, aynne oottana danddayennabata qoppiyoogan unꞌꞌettays. Mazamure 94:19y yootiyoogaadan, nuuni keehi unꞌꞌettiyo wode Xoossay nuna minttetteesinne woppu oottees. Yaatiyo gishshawu, taani Geeshsha Maxaafaanne minttettiya xiqiseti xaafettido masttooshaa ta hiixaa matan wottays. Tawu xiskkoy xayiyo wode, Xoossaa qofay tana minttettanaadan Geeshsha Maxaafaappe amarida xiqiseta nabbabays.

“Xoossaa xeelliyaagan nuuni eriyoobaappe dummatiyaabaa qoppiyoogaa agganaadan Geeshsha Maxaafay yootees. Taani kase tana pattenna asadan xeellays, qassi harati tana siiqennabadan qoppays. SHin he qofay Xoossay nuussi huuphiyan huuphiyan qoppiya, siiqiyaanne qarettiya Aawa gidiyoogaa yootiya Geeshsha Maxaafaara maayettennaagaa akeekaas. Loddan loddan, iita qofay tana haarennaadan oottiyoogaa doommaas. Xoossay tana xeelliyoogaadan taanikka tana xeellana bessiyoogaa tamaaraas. Hegee taani tabaa iitabaa qoppiyoogaa agganaadan tana keehi maaddiis.

“Kase gakkida ta hassayiyo iitaba ubbaynne iita qofay muleera xayiyo wodiyaa yeemuwan naagays. Sinttappe guuggiyaa sahoy mule deꞌennaagaa erays. Hegee taani ha wodiyan genccanaadaaninne sinttappe taani unꞌꞌettenna wodiyaa hidootan naaganaadan maaddiis.”