3 | Geeshsha Maxaafan Etabay Odettido Asatubaappe Demmiyo Goꞌꞌaa

GEESHSHA MAXAAFAY . . . Nuugaadan siyettido, “nu mala” gidida ammanettida attuma asatubaanne macca asatubaa yootees.—YAAQOOBA 5:17.

Hegee Woygiyoogee?

Dumma dummabay etawu siyettido attuma asatunne macca asatu taarikiyaa Geeshsha Maxaafay yootees. Nuuni eta deꞌuwan hanidabaa nabbabiyo wode, nuugaara issi malabay siyettido ura taarikiyaa akeekana danddayoos.

Hegee Waati Maaddii?

Harati nuussi siyettiyaabaa akeekanaadan koyoos. Ubba qassi nuuni guuggiyaa sahuwan waayettiyo wode, hegee keehi koshshiyaaba. Nuuni Geeshsha Maxaafaa nabbabiyo wode, nuugaadan qoppidanne nuugaa malabay siyettido haratubaa tamaaroos. Yaatiyoogan, hegaadan siyettiyoynne unꞌꞌettiyay nu xalla gidennaagaa akeekoos.

Maaddiyaabi baynnabadan qoppidanne yibbaatida asati yootido daro qofay Geeshsha Maxaafan deꞌees. Neeni, ‘Taani hagaadan deꞌana danddayikke’ gaada qoppa eray? Muusessikka, Eelasaagaadaaninne Daawitaagaadan siyettiis.—Qoodaabaa 11:14; 1 Kawotu Maxaafaa 19:4; Mazamure 55:4.
Iyyo naꞌi baynna gishshawu I dawuttiyaa yiilloyin ‘keehi mishettida’ Haanno giyo maccaaseebaa Geeshsha Maxaafay yootees.—1 Sameela 1:6, 10.
Geeshsha Maxaafay nuugaadan awu siyettido Iyyooba giyo bitaniyaabaa yootees. I Yihoowa mintti ammaniya asa gidikkonne, issi wode keehi unꞌꞌettidi hagaadan giis: “Taani ta de7uwaa karaas; taani merinau de7anau koyikke.”—Iyyooba 7:16.

Qohiya qofaa aggida, Geeshsha Maxaafay yootiyo hageetubaa nabbabiyoogan, nuunikka unꞌꞌettiyoogaa genccanawu maaddiya minotettaa demmana danddayoos.

Keevena Geeshsha Maxaafay Waati Maaddiiddi Deꞌii?

Baypolar Disordder Giyo Harggee Tana Qohido Ogiyaa

“Tawu layttay 50 matido wode, baypolar disordder giyo guuggiyaa harggee tana oyqqidoogee erettiis. Taani deꞌuwan tana gakkiya ay metuwaakka xoonana danddayiyaabadan issi issitoo qoppays. SHin hara wode qassi, deꞌuwan deꞌiyoogee aynne goꞌꞌennabadan qoppays.”

Geeshsha Maxaafay Tana Maaddido Ogiyaa

“Aagaa malabay tawu siyettido kiitettida PHeexiroosabaa Geeshsha Maxaafay yootees. A mooroy I bana pattennabadan xeellanaadan oottiis. SHin PHeexiroosi ubbatoo hegaadan qoppiyoogaappe, baayyo qoppiyaageetuura laggetanawu koyiis. He harggee tawu iitiyo galla, taani mooridobaa qoppada unꞌꞌettaysinne tana pattennabadan xeellays. PHeexiroosaagaadan, taanikka hidootaa qanxxennaadan maaddiya laggetukko shiiqana koshshiyoogaa tamaaraas.

“Geeshsha Maxaafan deꞌiya tana keehi minttettida haray Kawuwaa Daawita taarikiyaa. I darotoo ba hanotan unꞌꞌettiisinne kase oottido mooruwaa gaasuwan zilꞌꞌettiis. Issi issitoo, taanikka aagaadan zilꞌꞌettanaadan oottiyaabaa haasayays woy oottays. Daawiti Mazamure 51n yootido qofay tana minttettiis. Paydo 3n, Daawiti hagaadan giis: ‘Ta mooruwaa taani erais; ta nagarai ubbatoo ta sinttaana.’ Taani keehi unꞌꞌettada tabaa loꞌꞌobaa qoppanawu metootiyo wode, tawu siyettiyaabaa hagee loytti qonccissees. SHin Daawiti paydo 10n, ‘Abeet Xoossau, geeshsha wozanaa ta giddon medhdha; ammanettiya ayyaanaa ta giddon ooraxissa’ giidoogeekka tawu siyettiyaabaara issi mala. Taanikka tabaa loꞌꞌobaa qoppanaadan maaddana mala hegaadan Xoossaa woossaas. Wurssettan, paydo 17n deꞌiya qofay tana minttettiis. Hagaadan gees: ‘Abeet Xoossau, “Nagara oottennan aggarkkinaashsha” giya, meqqida wozanaa neeni karakka.’ He xiqisee, Xoossay tana siiqiyoogaa taani ammanettanaadan oottiis.

“Geeshsha Maxaafan etabay odettido asatubaanne Xoossay ha wodiyan tawu immidobaa loytta qoppiyoogan ta hidootaa minttaas. Taani Geeshsha Maxaafaa hiraagay polettanaagaa mintta ammanays, qassi hegee taani hidootaa qanxxennaadan maaddiis.”