Neeni Keehi Azzanada Deꞌanawu Koyenna Wode

“Tawu aggennan hegaadan siyettiis. Hegaa gishshawu, taani hayqqiyaakko loꞌꞌo gaada kuuyaas” gaada, Brazile biittaa asa gidida Adriyaana yootaasu.

NEENI keehi azzanada deꞌanawu koyikke ga eray? Yaatikko, Andriyaanissi siyettidabaa neeni akeekana danddayaasa. A keehi unꞌꞌettaasu, azzanaasunne hidootaa qanxxaasu. Ubbatoo keehi azzananaadan oottiya harggee Adriyaano oyqqiis.

Cimida ba aawaanne aayyiyo xeelliya Jaappaane biittaa asa gidida Kaꞌorubaakka qoppa. I hagaadan giis: “He wode tawu oosoy keehi dariyo gishshawu taani keehi daafurays. Guyyeppe taassi qumaa koshshay xayiis; qassi taani maara xiskkikke. Taani hayqqiyaakko woppu gaana gaada qoppaas.”

Nayjeeriyaa biittaa asa gidida Ojebode, “Taani ubba wode keehi azzanada yeekkays, yaanin tana woriyo ogiyaa koyaas” yaagiis. Ojebode, Kaꞌorunne Adriyaana banttana woribeennaagee ufayssiyaaba. SHin layttan layttan shaꞌan qoodettiya asay bana barkka worees.

MAADUWAA AWUPPE DEMMUUTEE?

Bana barkka woriyaageetuppe daroti attumaageeta; hegeetuppe daroti harata maaduwaa oychchanawu keehi yeellatoosona. Hargganchchatussi aakimee koshshiyoogaa Yesuusi yootiis. (Luqaasa 5:31) Neeni keehi unꞌꞌettada nena woranawu qoppikko, harata maaduwaa oychchanawu yeellatoppa. Akkamettiyoogee loꞌꞌobaa qoppanaadaaninne genccanaadan banttana maaddidoogaa unꞌꞌettiya daroti akeekidosona. Ojebode, Kaꞌorunne Adriyaana akkamettidi maaduwaa demmidoogee eti haꞌꞌi genccanaadan oottiis.

Dottoreti unꞌꞌettidaageeta akkamanawu xaliyaa immana woy zorana danddayoosona. Unꞌꞌettidaageetu soo asaynne laggetikka eta hanotaa akeekananne eta danddayana, etassi qoppananne eta maaddana koshshees. Ba Qaalaa Geeshsha Maxaafaa baggaara maalaalissiya ogiyan maaddiya, Xoossaa Yihoowa mala loꞌꞌo dabboy baawa.

HEGEE MERINAWU XAYAANEE?

Unꞌꞌettiyaageeti adussa wodiyawu akkamettananne bantta kase meeziyaa laammana koshshennan waayi aggana. Gidoppe attin, neeni unꞌꞌettikko, Ojebodaagaadan, sinttappe ufayssiya wodee yaanaagaa hidootan naagana danddayaasa. I hagaadan giis: “Saꞌan ooninne ‘taani harggais’ geenna wodiyaabaa kasetidi yootiya, Isiyaasa 33:24y polettin beꞌanawu taani yeemottays.” “Sahoi” baynna “ooratta sa7aa” ehaanawu Xoossay gelido qaalan Ojebodaagaadan minetta. (Ajjuutaa 21:1, 4) Qaalaa gelido he odettidabay ayba sahoynne xayanaagaa bessees. Neeni azzanoy merinawu xayana. Ne azzanoy haranttuwaa mule neeyyo “hassayettennanne qofettenna.”—Isiyaasa 65:17.

Maaddana Danddayiya Geeshsha Maxaafaa Xiqiseta

Xoossay neeyyo siyettiyaabaa akeekees.

“Taani GODAI, ne Xoossai, ne ushachcha kushiyaa oiqqana. . . . ‘Yayyoppa, taani nena maaddana.’”—Isiyaasa 41:13.

Yihooway nuuyyo siyettiyaabaa oogaappenne aaruwan akeekees; qassi I nuna maaddanawu koyees.

Xoossaa Qaalaa Wotta Dentta Qoppa.

“[Eelaasi], ‘Ta shemppuwaa ekka’ yaagidi haiqqanau woossiis.”—1 Kawotu Maxaafaa 19:4.

Ojebodi hagaadan giis: “Xoossaa Qaalaa wotta denttada qoppiyoogee tana maaddiis. Taayyo siyettidoogaadan, hananabaa yootiya Eelaasawu issi wode siyettidoogaa taani akeekaas.”

Geeshsha Maxaafan etabay odettido asatubaappe tamaara.

“Taani [Yesuusi] ne ammanoi bayenna mala, neessi [PHeexiroosawu] Xoossaa woossaas.”—Luqaasa 22:32.

Kiitettida PHeexiroosi Yesuusa heezzutoo kaddi simmidi, keehi unꞌꞌettidi mishetti yeekkiis. Kaꞌoru hagaadan giis: “PHeexiroosawu siyettiyaabay Yihoowanne Yesuusa qofissidoogaa taani akeekanaadan, PHeexiroosa gakkidabay tana maaddiis. Hagee tana minttettiis.”

Ne azzanoy haranttuwaa mule neeyyo “hassayettennanne qofettenna.”—Isiyaasa 65:17