Xoossay Meretata Medhdhiyoogaa Doommiis

NUUYYO deꞌiya loꞌꞌobati ubbay yiidoy Xoossaappe. I awa ayfee nuussi gallassan pooꞌissanaadan, aginaynne xoolintteti qassi qamman guutta pooꞌuwaa immana mala medhdhiis. Qassi nuuni a bolli deꞌanaadan Xoossay saꞌaa medhdhiis.

Gidikkokka, awa ayfee, aginay, xoolinttetinne saꞌay Xoossay koyro medhdhidobata gidokkona. Koyro merettidabay aybakko eray? Xoossay koyro medhdhidoy baagaa mala bollay deꞌiyo ayyaana meretata. Xoossaa beꞌana danddayennaagaadan hegeetakka beꞌana danddayokko. Geeshsha Maxaafan ha ayyaana meretati kiitanchchata geetetti xeegettidosona. Xoossay kiitanchchata banaara saluwan deꞌanaadan medhdhiis.

Xoossay koyro medhdhido kiitanchchay keehippe dumma. I Xoossaassi bayra Naꞌa; qassi ba Aawaarakka issippe oottiis. Xoossay hara ubbabaa oottiyo wode i maaddiis. Xoossay awa ayfiyaa, aginaa, xoolinttetanne nu deꞌiyo saꞌaakka medhdhiyo wode i maaddiis.

He wode saꞌay ay milatii? Doomettan saꞌaa bolli ooninne deꞌana danddayenna. Saꞌa ubbaa kammida issi dalgga abbaa haattaappe attin harabi baawa. SHin Xoossay saꞌan asay deꞌanaadan koyiis. Hegaa gishshau, i nuussi koshshiyaabata giigissiyoogaa doommiis. Ay oottidee?

Koyrottidi saꞌay pooꞌuwaa demmana koshshees. Hegaa gishshau, Xoossay awa ayfiyaa pooꞌoy saꞌaa gakkanaadan oottiis. Hegaadan oottiyoogan gallassaynne qammay deꞌanaadan oottiis. Hegaappe simmin, Xoossay dalgga abbaa haattaappe biittay xoqqu giidi kiyanaadan oottiis.

Biittaa bolli koyro aybikka baawa. Ha misiliyan neeni beꞌiyoogaa mala. Ciishshay, mittay, meheenne doꞌaykka baawa. Abbankka ayba moleenne baawa. Asay, meheenne doꞌay deꞌanau saꞌay tumuppe injje soho gidanaadan Xoossay oottana darobi deꞌees.