Meretaappe Bashsha Haattaa Gakkanaashin

Salotinne saꞌay awappe yiidonaa? Awa ayfee, aginay, xoolintteti qassi saꞌan deꞌiya hara darobati waanidi deꞌana danddayidonaa? Eta medhdhidaagee Xoossaa gidiyoogaa yootidi, Geeshsha Maxaafay hegau tumu zaaruwaa immees. Yaatiyo gishshau, nu maxaafay, meretaabaa yootiya Geeshsha Maxaafaa taariketun doommees.

Xoossay koyro medhdhidoogeeti, baagaadan ayyaana bollay deꞌiyo meretata gidiyoogaa tamaarana. Eti kiitanchchata. SHin saꞌay meretidoy nu mala asaassa. Yaatiyo gishshau, Xoossay Addaama giyo bitaniyaanne Hewaano geetettiya maccaasiyo medhdhidi, loꞌꞌiya ataakiltte sohuwan wottiis. SHin eti Xoossaayyo azazettibookkonanne deꞌuwan deꞌiyo maataakka digettidosona.

Addaamee merettoosappe biidi Bashsha Haattaa gakkanaashin, muleera 1,656 layttay aadhdhiis. He wodiyan daro iita asatinne iita kiitanchchati deꞌidosona. Saluwan ayfiyan beettenna iita ayyaana meretati deꞌidosona; hegeetikka Seexaanaanne iita kiitanchchata. Saꞌan Qaayeeli, daro hara iita asatinne asaagaappe dariya wolqqay deꞌiyo amarida attumaasatikka deꞌidosona. SHin loꞌꞌo asatikka saꞌan deꞌidosona; hegeetikka Aabeela, Heenookanne Noha. SHaahuwaa ISSUWAN ha ubba asatubaanne hanettidabatubaa nabbabana.