Xoossay Saluwaanne Saꞌaa Medhiis

Xoossaa Yihoowi nuna Medhidaagaa. Nuuni beꞌana danddayiyoobaakka beꞌana danddayennabaakka ubbabaa i medhiis. I nuuni beꞌana danddayiyoobaa medhanaappe kase, keehi daro kiitanchata medhiis. Kiitanchati oonakko eray? Eti Yihoowa ashkkarata. Eti a milatoosona. Nuuni Xoossaa beꞌana danddayennaagaadan, etakka beꞌana danddayokko. Yihoowi medhido koyro kiitanchay oosuwan a maaddiis. He kiitanchay Yihoowi xoolintteta, pilaaneetetanne hara ubbabaa medhiyo wode maaddiis. Nuuni deꞌiyo loꞌꞌiya biittay, he pilaaneetetuppe issuwaa.

Guyyeppe, Yihoowi meheenne asay deꞌanawu biittaa giigissiis. Saꞌaa bolli pooꞌissanaadan i awa ayfiyaa medhiis. I dereta, abbatanne shaafata medhiis.

Hegaappe simmidi aybi merettidee? Yihoowi, ‘Taani maataanne mittaa mokissana’ yaagiis. Teeriya dumma dumma mittaa ayfee daroy, ataakiltteenne ciishshay mokkiyoogaa doommiis. Hegaappe simmin Yihoowi paalliya, haattaa wadhiyaanne biittaara gooshettiya meretata medhiis. I harbbaynnuwaa mala guuttata, qassi danggarssaa mala gitata medhiis. Neeni dosiyo mehee woy doꞌay aybee?

Hegaappe simmin, Yihoowi koyro kiitanchawu, ‘Ane asa medhdhoos’ yaagiis. Asay mehiyaappenne doꞌaappe dumma. Eti oorattabaa medhana danddayoosona. Eti haasayana, miiccananne woossana danddayoosona. Eti saꞌaa, mehiyaanne doꞌaa naagana. Koyro bitanee oonakko neeni eray? Ane beꞌoos.