Loꞌꞌiya Ataakiltte Sohuwaa

ANE ha misiliyan deꞌiya saꞌaa xeella! Ubbabay ayba loꞌꞌii! Maataa, mittaa, ciishshaa, ubba mehiyaanne doꞌaa xeella. Danggarssaanne gaammota bessana danddayay?

Ha loꞌꞌiya ataakiltte sohoy waanidi deꞌana danddayidee? Ane Xoossay saꞌaa nuussi waati giigissidaakko beꞌoos.

Xoossay koyro maatay biittaa maayanaadan oottiis. Qassi i ubba qommo ataakiltteta, daraanne mittata medhdhiis. Ha dicciyaabati saꞌay loꞌꞌiyaagaa gidanaadan oottoosona. SHin hegaappekka aadhdhiyaabaa oottoosona. Etappe daroti qassi keehippe malꞌꞌiya qumaa nuuni demmiyoobata.

Hegaappe guyyiyan, Xoossay haattan wadhdhiya moletanne bollaara paalliya kafota medhdhiis. Guuttanne gita mehetanne doꞌata, hegeetuppekka kanata, gawaratanne parata medhdhiis. Intte heeran ayba doꞌatinne meheti deꞌiyoonaa? Ha ubbabaa Xoossay nuussi medhdhido gishshau, ufayttana koshshennee?

Wurssettan, Xoossay saꞌan issi baggaara keehi dumma sohuwaa giigissiis. I he sohuwaa Edene ataakiltte sohuwaa giidi xeegiis. He sohoy aybinne paci baynna soho. He sohuwan deꞌiya ubbabay loꞌꞌiyaba. Xoossay kumetta saꞌay i giigissido loꞌꞌiya ataakiltte soho mala gidanaadan koyiis.

SHin ha misiliyan deꞌiya ataakiltte sohuwaa ane zaaretta xeella. Xoossay xeelliyo wode paccidabay aybakko eray? Ane beꞌoos.