Yesuusi “Biittan Suure Pirddaa” Essana

1, 2. Yesuusi hanqqettidoy awudee, qassi aybissi?

YESUUSI keehi hanqqettanaadan oottiya gaasoy deꞌees. I ashkke asa gidiyo gishshawu, hegaa mala asa gaada A qoppiyoogee neeyyo deexxiyaaba gidana danddayees. (Maatiyoosa 21:5) A hanqqoy xillotettaa hanqqo gidiyo gishshawu, I ba hanqquwaa teqqana danddayees.a SHin sarotettaa dosiya Yesuusi keehi hanqqettanaadan oottidabay aybee? Hegaa gaasoy suure pirdday keehi geellattidoogaa.

² Yerusalaamen deꞌiya beeta maqidasiyaa Yesuusi xoqqu oottidi xeelliis. Saluwan deꞌiya A Aawawu goynniyo geeshsha sohoy kumetta saꞌan hegaa xalla. Ayhudati daro biittatuppe adussa ogiyaa hemettidi goynnanawu he sohuwaa yoosona. Xoossawu yayyiya Ayhuda gidennaageetikka, yiidi eti goꞌettanaadan giigida beeta maqidasiyaa dabaabaa geloosona. Gidoppe attin, Yesuusi haggaazuwaa doommido wode, beeta maqidasiyaa gelidi keehi azzanttiyaabaa beꞌiis. He sohoy goyno soho gidennan giya milatees. He sohuwan zalꞌꞌanchchatinne miishshaa laammiyaageeti kumidosona. Yaatin, suure pirdday aybin geellattidee? He asatussi Xoossaa beeta maqidasee asaa daroban qohiyo woy boggiyo soho. Waanidi?—Yohaannisa 2:14.

3, 4. Yaaretiyoogan Yihoowa keettan oosettidabay aybee, qassi hegaa teqqanawu Yesuusi waatidee?

³ Beeta maqidasiyaa giiraa qanxxanawu issi qommo santtime xallaa goꞌettanaadan haymaanootiyaa kaalettiyaageeti higgiyaa kessidosona. He sohuwaa yiya asay he santtimiyaa demmanawu bantta miishshaa laammana koshshees. Hegaa gishshawu, miishshaa laammiyaageeti beeta maqidasiyaa gibbiyan bantta xaraphpheezata giigissidi, miishshaa worissidi laammoosona. Mehiyaa bayzziyoogeekka keehi daro woriyaa demissiya zalꞌꞌe. Yarshshanawu koyiyaageeti kataman deꞌiya zalꞌꞌanchchatuppe shammidi yarshshana danddayoosona, shin beeta maqidasiyan aawatettay deꞌiyoogeeti eta yarshshoy hanenna giidi ekkennan aggana danddayoosona. Gidoppe attin, yarshshanawu beeta maqidasiyaa heeraappe shammiyoobay ekettiyoogee qoncce. He asati aynne oottana danddayenna gishshawu, zalꞌꞌanchchati issi issitoo keehi daro waagaa qanxxissoosona.b Hegee koba zalꞌꞌe. Ubba qassi boge!

⁴ Yesuusi he naaquwaa coꞌꞌu gi xeellibeenna. Hagee A Aawaa keetta! I xurqqayyiyaa dooqqidi mehiyaa wudiyaanne dorssaa beeta maqidasiyaappe yedettiis. Yaatidi I miishshaa laammiyaageetukko biidi eta xaraphpheezata aatti yeggiis. He santtimeti keehi loꞌꞌiyaa wuygiyan laalettiyoogaa qoppa! I hanqqettidi haraphphiyaa bayzziyaageeta hagaadan giis: “Ha haraphpheta hagaappe kessite.” (Yohaannisa 2:15, 16) Ooninne Yesuusa eqettanawu xalibeenna.

“Ba Aawaa Duutti Ekkiis”

5-7. (a) Yesuusi asa gidanaappe kase deꞌido deꞌoy I suure pirddaa pirddanaadan waati maaddidee, qassi A leemisuwaa xannaꞌiyoogan nuuni ay tamaarana danddayiyoo? (b) Yihooway ubbabaa haariyo maataa bollinne A sunttaa bolli denddida worddo mootuwaa Kiristtoosi waati shatimidee?

⁵ Zalꞌꞌanchchati zaarettidi beeta maqidasiyaa yiidoogee qoncce. Yesuusi Yihooway ba keettaa “panggati qosettiyo gonggolo” oottidaageeta seeranawu haasayido qaalaa goꞌettidi, heezzu laytta gidiya wodiyaappe simmin suure pirddaa geellayiyoogaa xeelliyaagan kase yootidobaa odiis. (Maatiyoosa 21:13; Ermmaasa 7:11) Ee, yaaretidi asaa boggiyoogaanne Xoossaa beeta maqidasiyaa tunissiyoogaa Yesuusi beꞌido wode, A Aawawu siyettidoogaadan assi siyettiis. Hegee garamissiyaaba gidenna! Yesuusi saluwan deꞌiya ba Aawaappe miilooniyan qoodettiya layttawu tamaariis. Hegaa gaasuwan, I Yihoowaagaadan suure pirddees. ‘Naꞌi ba aawaa duutti ekkiis’ giyoobawu I loꞌꞌo leemiso gidiis. Hegaa gishshawu, nuuni Yihoowa suure pirddaa loytti eranawu koyikko, Yesuus Kiristtoosa leemisuwaa wotti dentti qoppiyoogaappe hara loꞌꞌo ogee baawa.—Yohaannisa 14:9, 10.

⁶ Seexaanay Xoossaa Yihoowa cayiyo wodenne A xillo haaruwaa siranaadan oottiyo wode, Yihoowayyo mexi issi Naꞌay he sohuwan deꞌees. Hegee qoncciyan sunttaa mooriyooba! Ay asinne siiqoy denttettin ba goꞌꞌaa aggi bayidi Yihoowawu haggaazenna giidi Seexaanay guyyeppe denttido mootuwaakka he Naꞌay siyiis. He worddo mootuwan xillo Naꞌaa wozanay seelettidoogee qoncce. He worddo mootuwaa shatimanaadan gitabaa I oottanaagaa eriyoogan keehi ufayttennan waayi aggana! (2 Qoronttoosa 1:20) I hegaadan waati oottanee?

⁷ Nuuni SHemppo 14n tamaaridoogaadan, Seexaanay Yihoowa meretati ayyo ammanettokkona giidi mootido mootuwawu Yesuus Kiristtoosi wurssetta bixe zaaruwaa immiis. Yaatiyoogan, Yesuusi Yihoowa haaroy suure gidiyoogee erettanaadaaninne A sunttay geeyanaadan oottiis. Yesuusi Yihooway kawoyido kawo gidiyo gishshawu, saluwankka saꞌankka Xoossaa suure pirddaa essana. (Mazamure 2:6) I saꞌan deꞌido deꞌuwankka Xoossaa suure pirddaa qonccissiis. Yihooway abaa hagaadan giis: “Taani ta Ayyaanaa a bolli wottana. I suure pirddaa Aihuda gidenna asa ubbau yootana.” (Maatiyoosa 12:18) Yesuusi he qaalata waati polidee?

Yesuusi “Suure Pirddaa” Qonccissiis

8-10. (a) Ayhuda haymaanootiyaa kaalettiyaageeti kessido wogati Ayhuda gidenna asaanne macca asaa toochchanaadan waati denttettidonaa? (b) He wogati Yihooway Sambbataa xeelliyaagan immido higgee deexo tooho gidanaadan waatidi oottidonaa?

⁸ Yesuusi Yihoowa Higgiyaa siiqees, qassi higgiyaara maayettiya ogiyan deꞌiis. SHin he wode haymaanootiyaa kaalettiyaageeti he Higgiyaa geellayidosonanne bessenna ogiyan goꞌettidoosona. Yesuusi etawu hagaadan giis: “Lo77o milatiya iitatoo, higgiyaa tamaarissiyaageetoonne Parisaawetoo, intteyyo aayye7ana. . . . Higgiyan de7iya keehi koshshiyaageeta aggi bayeeta; hegeeti pirddaa, maarotettaanne xillotettaa.” (Maatiyoosa 23:23) Xoossaa Higgiyaa tamaarissiyaageeti “suure pirddaa” qonccissibookkona. Eti Xoossaa suure pirdday geemmanaadan oottidosona. Waatidi? Amarida leemisota beꞌa.

⁹ Bantta yuushuwan deꞌiya eeqawu goynniya deretuppe shaahettanaadan Yihooway ba asaa azaziis. (1 Kawotu Maxaafaa 11:1, 2) SHin, haymaanootiyaa kaalettiya amarida asati Ayhuda gidennaageeta asay toochchanaadan denttettidosona. Mishiina giyo maxaafan hagaadan giya higgee deꞌees: “Ayhuda gidenna asay mehiyaara mattumaa gayttees giyo siree deꞌiyo gishshawu, mehiyaa eti aqiyoosan aggana koshshenna.” Ayhuda gidenna asa ubbaa hegaadan gede coo lagiyoogee pirddaa geellayiyoogaa xalla gidennan, Muuse Higgee yootiyoobaa keehi phalqqiyaaba. (Wogaabaa 19:34) Macca asaa karanaadan oottiya higgeta kessidosona. Issi maccaasiyaa ba azinaa miyyiyan gidennan, appe guyyeera hemettana koshshiyoogee eta wogan odettees. Issi attumaagee macca asaara, ubba ba machcheerakka dabaaban haasayenna. Ashkkaratudan, macca asaykka shilootan markka gidanaadan paqqadettenna. Ubba qassi attumaageeti macca asa gidibeenna gishshawu Xoossaa galatanawu woossiyo woosaa meezee he wode deꞌees.

¹⁰ Haymaanootiyaa kaalettiyaageeti asi kessido higgetinne wogati Xoossaa Higgiyaa mittanaadan oottidosona. Leemisuwawu, Sambbataa higgee he gallassaa goynuwawu, ayyaanaaban minettanawunne shemppanawu goꞌettanaadan yootiyoogan Sambbatan oottiyoogaa diggees. Gidoppe attin, Parisaaweti he higgee deexo tooho gidanaadan oottidosona. “Ooso” giyoogee aybakko eti banttawu wogaa kessidosona. Cakkiyoogaa woy shankkatiyoogaa mala 39 oosota eti qonccissidosona. Hegee zawi baynna oyshata oychchanaadan oottiis. Issi uri sambbatan kasttolliyaa worikko, I shankkatiis giyoogee? Issi uri ogiyaara kanttiiddi tiyaa duuttidi miikko, I cakkiis giyoogee? Issi uri harggida asa pattikko, I oottiis giyoogee? Hagaa mala oyshata qonccissiya wolqqaama higgeti kiyidosona.

11, 12. Geeshsha Maxaafan baynna, Parisaaweti kessido wogata Yesuusi eqettiyoogaa waati bessidee?

¹¹ Hegaa mala hanotan, asay suure pirddaa akeekanaadan Yesuusi waati maaddidee? I tamaarissido timirttiyaaninne ba deꞌuwan, haymaanootiyaa kaalettiyaageeta xalan eqettiis. I tamaarissido amaridabata ane koyro beꞌoos. I eti kessido daro wogata xeelliyaagan hagaadan giis: “Intte haratuyyo immido intte wogan Xoossaa qaalaa [karideta].”—Marqqoosa 7:13.

¹² Sambbataa higgiyaa Parisaaweti bala ogiyan akeekidoogaanne he higgiyaa halchchuwaa mule dogidoogaa Yesuusi eta loytti tamaarissiis. Masee, I “Sambbataa Godaa” gidiyoogaanne Sambbatan asaa pattanawu maatay deꞌiyoogaa qonccissiis. (Maatiyoosa 12:8) He qofaa minttanawu, I maalaalissiya ogiyan Sambbatan qoncciyan pattiis. (Luqaasa 6:7-10) Hegaadan pattiyoogee I ba SHaꞌu Layttaa Haaruwaa wode kumetta saꞌan pattanaagawu xeera beso. Ha SHaꞌu Layttay ammanettida asa ubbay daro xeetu layttawu tooho gidida nagaraappenne hayquwaappe wurssettan shemppiyo wolqqaama Sambbata gidana.

13. Yesuusi saꞌan haggaaziyoogaa wurssi simmin eqqida higgee aybee, qassi hegee kase deꞌiya higgiyaappe waani dummatii?

¹³ Yesuusi saꞌan haggaaziyoogaa wurssi simmidi ooratta higgiyaa, ‘Kiristtoosa higgiyaa’ baggaarakka suure pirddaa qonccissiis. (Galaatiyaa 6:2) Appe kasetiya Muuse Higgiyaappe dummatiya ogiyan, ooratta higgiyawu denddo gididay xaafettida wogata gidennan, maarata. Gidoppe attin, an amarida azazotikka deꞌoosona. Hegeetuppe issuwaa Yesuusi “ooratta azazuwaa” giis. Yesuusi bana kaalliyaageeta siiqidoogaadan eti issoy issuwaa siiqanaadan tamaarissiis. (Yohaannisa 13:34, 35) Ee, ba goꞌꞌaa aggi bayiyo siiqoy ‘Kiristtoosa higgiyan’ deꞌiya ubba asaa dummayidi erissiyaaba.

Suure Pirddawu Loꞌꞌo Leemiso

14, 15. Yesuusi ba maatawu zaway deꞌiyoogaa akeekiyoogaa waati bessidee, qassi hegee minttettiyaaba gidiyoy aybissee?

¹⁴ Yesuusi tamaarissidoy siiquwaabaa xalla gidenna. I ‘Kiristtoosa higgiyaadan’ deꞌiis. Hegee A deꞌuwan qoncciis. Yesuusi suure pirddaa qonccissido heezzu ogeta ane beꞌa.

¹⁵ Koyruwan, Yesuusi suure pirddaa geellayiya aybanne oottennaadan naagettiis. Nagaranchcha asay otorettiyo wodenne bantta maatan bessennabaa oottiyo wode suure pirdday darotoo geellattiyoogaa neeni akeekennan waaya aggana. Yesuusi hegaadan oottibeenna. Issi wode, Yesuusakko issi bitanee yiidi hagaadan giis: “Tamaarissiyaagoo, ta aawai aggidi haiqqido aquwaa ta ishai tanaara shaakkana mala, ayyo yoota.” Yesuusi, “Bitaniyau, tana intte bolli pirddiya daanna woi hegaa inttessi shaakkiyaagaa oottidi sunttidai oonee?” yaagiis. (Luqaasa 12:13, 14) Hegee maalaalissiyaaba gidennee? Yesuusa eray, akeekaynne Xoossay ayyo immido maatay saꞌan deꞌiya ay asaagaappe aadhdhikkonne, aquwaa shaakkanaadan ayyo maatay imettibeenna gishshawu, I hegaa malabaa oottanawu koyibeenna. Yesuusi asa gidanaappe kase deꞌido miilooniyan qoodettiya layttatunkka, I bana ziqqi oottiyaagaa gidiyoogaa ubbatoo bessiis. (Yihudaa 9) Hegee Yesuusi bana ziqqi oottidi suure pirddaa Yihooway polanaagaa ammanettiyoogaa loytti qonccissees.

16, 17. (a) Yesuusi Xoossaa Kawotettaa mishiraachchuwaa sabbakiyoogan suure pirddaa waati qonccissidee? (b) Yesuusi suure pirddan maarotaa waati bessidee?

¹⁶ Naaꞌꞌanttuwan, Yesuusi Xoossaa Kawotettaa mishiraachchuwaa sabbakido ogiyan suure pirddaa qonccissiis. I asa lagibeenna. Dure woy hiyyeesa gidin, ubba asawu sabbakanawu wozanappe baaxetiis. SHin, Parisaaweti hiyyeesa gidida coo asata karidi amahaaretiis woy “saꞌaa asa” giidi xeegoosona. He naaquwaa eqettiyoogaa bessiyaabaa Yesuusi xalatettan oottiis. I mishiraachchuwaa asaa tamaarissido wode, asaara miido wode, asaa mizido wode, eta pattido wode, ubba qassi eta hayquwaappe denttido wode “asai ubbai” mishiraachchuwaa siyana mala koyiya Xoossaa suure pirddaa qonccissiis.c—1 Ximootiyoosa 2:4.

¹⁷ Heezzanttuwan, Yesuusa suure pirdday maarotaa loytti bessiyaaba. I nagaranchchata maaddanawu keehi baaxetiis. (Maatiyoosa 9:11-13) I qohuwaappe banttana teqqana danddayenna asata muletoo maaddiis. Leemisuwawu, Ayhuda gidenna asa ubbaa siranaadan denttettiya he wode haymaanootiyaa kaalettiya asatudan Yesuusi eta siribeenna. I koyro kiitettidoy Ayhuda asaassa gidikkonne, Ayhuda gidenna he asatuppe amaridaageeta qarettidi maaddiis, qassi eta tamaarissiis. I, “Taani hagaa mala ammanuwaa harai atto, Israa7eela biittankka be7abeikke” yaagidi, Rooma wotaaddaratu mato halaqaa ashkkaraa maalaalissiya ogiyan pattiis.—Maatiyoosa 8:5-13.

18, 19. (a) Yesuusi macca asaa bonchchiyoogaa ayba ogetun bessidee? (b) Xalatettaanne suure pirddaa giddon deꞌiya gaytotettaa nuuni akeekanaadan Yesuusa leemisoy waati maaddii?

¹⁸ Qassi, macca asaa xeelliyaagan he wode deꞌiya qofaa Yesuusi maayettibeenna. I suurebaa xalatettan oottiis. Ayhuda gidennaageetudan, Samaariyaa biittaa macca asaykka he wode tunadan xeelettees. SHin, Sikaara giyo kataman haattaa ollaa matan Yesuusi Samaariyaa maccaaseessi markkattanawu mammottibeenna. Yesuusi yaana geetettida Masee bana gidiyoogaa koyro qoncciyan yootidoy he maccaaseessa. (Yohaannisa 4:6, 25, 26) Parisaaweti Xoossaa Higgiyaa macca asay tamaarana koshshenna giikkonne, Yesuusi macca asaa tamaarissanawu daro wodiyaanne wolqqaa goꞌettiis. (Luqaasa 10:38-42) Macca asay ammanttiya markka gidana danddayenna giyo wogay deꞌikkonne, Yesuusi hayquwaappe denddi simmidi amarida macca asatussi koyro qoncciyoogan eta bonchchiis. Eti biidi he gitabaa erissiyo ashkkara gidida attumaageetussi odanaadankka I etawu yootiis.—Maatiyoosa 28:1-10.

¹⁹ Ee, Yesuusi suure pirddaa Ayhuda gidennaageetuyyo qonccissiis. I hegaadan oottanawu, ba deꞌuwaa daafaban yeggiyaabaa darotoo oottiis. Suure pirddawu tumuppe exatanawu xalatettay koshshiyoogaa nuuni akeekanaadan Yesuusa leemisoy nuna maaddees. I ‘Yihudaa zare gidiya gaammuwaa’ geetettidoogee bessiyaaba. (Ajjuutaa 5:5) Gaammoy xalatettaa koshshiya suure pirddawu leemiso gidiyoogaa hassaya. SHin Yesuusi mata wode suure pirdday kaseegaappe aaruwan deꞌanaadan oottana. I kumetta hanotan, ‘biittan suure pirddaa essana.’—Isiyaasa 42:4.

Mase Kawoy “Biittan Suure Pirddaa” Essana

20, 21. Ha wodiyan, Mase Kawoy kumetta saꞌaaninne Kiristtaane gubaaꞌiyan suure pirdday deꞌanaadan waati oottiiddi deꞌii?

²⁰ Yesuusi 1914n, Mase Kawo gidana gakkanaashin, saꞌan suure pirdday deꞌanaadan oottiis. Waatidi? Maatiyoosa 24:14n I yootido hiraagay polettanaadan oottiiddi deꞌees. Yesuusi erissiyo ashkkarati Yihoowa Kawotettaabaa tumaa ubba biittaa asawu tamaarissoosona. Eti yelaga cima, dure hiyyeesa, macca attuma giidi asa asappe shaakkennan, suure pirddiya Xoossaa Yihoowabaa ubba asay eranaadan Yesuusadan sabbakanawu baaxetoosona.

²¹ Yesuusi I Huuphe gidiyo Kiristtaane gubaaꞌiyankka suure pirdday deꞌanaadan oottees. I kaseti yootidoogaadan, gubaaꞌiyan cima gididi oottiya ammanettida attuma asata “imota” oottidi immees. (Efisoona 4:8-12) Xoossaa alꞌꞌo dorssaa wudiyaa heemmiyo wode, he attuma asati suure pirdday deꞌanaadan oottiyoogan Yesuus Kiristtoosa leemisuwaa kaalloosona. He dorssatussi deꞌiya maatay woy aqoy ayba gidikkonne, cimati Yesuusi ba dorssata eti suure oyqqanaadan koyiyoogaa ubbatoo hassayoosona.

22. Ha wodiyan alamiyan naaqoy kumidoogan Yihoowawu aybi siyettii, qassi I ba Naꞌay ay oottanaadan sunttidee?

²² Gidoppe attin, mata wode Yesuusi awudeegaappenne aaruwan suure pirddaa saꞌan essana. Ha moorettida alamiyan naaqoy ubbasan kumiis. Namisan hayqqiya ubba naatu bolli gita naaqoy gakkees. Olaa miishshata medhdhiyoogaaninne ufayttiyoobaa koyiyaageeti bantta xallaa siiqiyoogan wurssiyo miishshaanne wodiyaa nuuni qoppiyo wode hegaa akeekoos. Hayqqana koshshenna miilooniyan qoodettiyaageeti layttan layttan hayqqiyoogee naaqoy daridoogaa bessiyaaba; hegee Yihooway xillo hanqquwaa hanqqettanaadan oottees. I saꞌaa bollan deꞌiya naaqo ubbaa merinawu xayssanawu ha iita alamiyan xillo olaa olettanaadan ba Naꞌaa sunttiis.—Ajjuutaa 16:14, 16; 19:11-15.

23. Armmageedoonappe simmin, Kiristtoosi merinawu suure pirdday deꞌanaadan waati oottanee?

²³ SHin, Yihoowa suure pirdday iitatettaa xayssiyoogaappe aadhdhiyaaba oottana. I ba Naꞌay “Sarotettaa Halaqaa” gididi haaranaadankka sunttiis. Armmageedoona olaappe simmin, Yesuusa haaroy kumetta saꞌan sarotettaa essananne I ‘suure pirddan’ haarana. (Isiyaasa 9:6, 7) Alamiyan deꞌiya daro metuwawunne waayiyawu gaaso gidida naaqo ubbay xayanaadan oottiyoogan Yesuusi he wode ufayttana. Wottiyoobi baynna Yihoowa suure pirddawu I ammanettidi meri merinawu exatana. Yaatikko, nuuni ha wodiyan Yihoowa suure pirddaa kaallanawu koyiyoogee bessiyaaba. Nuuni hegaadan waati oottana danddayiyaakko ane beꞌoos.