Kiristtaane Gubaaꞌiyan Siiquwaanne Tumu Pirddaa (Hagee 4Ppe 2Tto)

1. Nuuni ammanettana danddayiyo naaꞌꞌubati aybee?

XOOSSAA YIHOOWAY baassi goynniyaageeta siiqees. I muletoo siiqees, qassi I muletoo siiqana. I tumu pirddaakka siiqees. (Maz. 33:5) Yaatiyo gishshawu nuuni naaꞌꞌubaa ammanettana danddayoos: (1) Yihooway ba ashkkarati naaqettiyo wode seelettees. (2) I tumu pirdday deꞌanaadan oottana. Kaalli kaalli kiyiya huuphe yohotuppe koyroogan,b Xoossay Muuse baggaara Israaꞌeelatussi immido Higgiyawu denddoy siiquwaa gidiyoogaa tamaarida. He higgee ubba asay, ubba qassi banttana qohuwaappe naagana danddayennaageeti tumu pirddaa demmanaadan minttettees. (Zaa. 10:18) He Higgee Yihooway awu goynniyaageetussi keehi qoppiyoogaa qonccissees.

2. Nuuni zaaruwaa demmana oyshati awugeetee?

² Kiristtaane gubaaꞌee 33 M.Ln eqqido wode Muuse Higgee polettiis. Siiqoy denddo gididonne tumu pirddaa minttettiya higgiyaa goꞌꞌay Kiristtaanetuppe attiichchiis giyoogee? CHii! Kiristtaanetussi ooratta higgee deꞌees. Ha huuphe yohuwan, he higgee aybakko koyro pilggana. Yaatidi ha oyshatu zaaruwaa beꞌana: Nuuni he higgiyawu denddoy siiquwaa gaana danddayiyoy aybissee? Nuuni he higgee tumu pirddaa minttettees gaana danddayiyoy aybissee? Maatay deꞌiyoogeeti ha higgiyaa maaran harata waati oyqqana koshshii?

‘KIRISTTOOSA HIGGEE’ AYBEE?

3. Galaatiyaa 6:2n qonccidaagaadan, ‘Kiristtoosa higgee’ aybaa xaaxi waaxii?

³ Galaatiyaa 6:2 nabbaba. Kiristtaaneti ‘Kiristtoosa higgiyawu’ azazettoosona. Yesuusi ba erissiyo ashkkaratussi issi higgiyaa xaafi immana xayikkonne, eti kaallana mala azazota, higgetanne maarata immiis. ‘Kiristtoosa higgee’ I tamaarissido ubbabaa xaaxi waaxees. Kaalliya menttotun, ha higgiyaabaa loytti tamaarana.

4-5. Yesuusi ayba ogetun tamaarissidee, qassi awude tamaarissidee?

⁴ Yesuusi ayba ogetun tamaarissidee? Koyruwan, I haasayiyooban asaa tamaarissiis. I Xoossaabaa tumaa haasayido gishshawu, deꞌuwawu halchchoy aybakko tamaarissido gishshawunne asaa metuwaa ubbaa Xoossaa Kawotettay giigissanaagaa yootido gishshawu, I haasayidobawu wolqqay deꞌees. (Luq. 24:19) Yesuusi leemiso gidiyoogankka tamaarissiis. Yesuusi deꞌido deꞌuwan, ba erissiyo ashkkarati waanidi deꞌana koshshiyaakko bessiis.—Yoh. 13:15.

⁵ Yesuusi awude tamaarissidee? I saꞌan haggaaziyo wode tamaarissiis. (Maa. 4:23) I hayquwaappe denddi simmidi takkennankka bana kaalliyaageeta tamaarissiis. Leemisuwawu, I ba erissiyo ashkkarati 500⁠ppe dariyaageeti issippe deꞌishin qonccidi, eti asaa ‘bana kaalliyaageeta oottana’ mala eta azaziis. (Maa. 28:19, 20; 1 Qor. 15:6) Yesuusi gubaaꞌiyawu huuphe gidiyo gishshawu, I hayquwaappe denddidi saluwaa bi simmidikka ba erissiyo ashkkarata tamaarissiyoogaa aggibeenna. Leemisuwawu, tiyettida Kiristtaaneta minttettanaadaaninne zoranaadan Kiristtoosi kiitettida Yohaannisawu 96 M.L. heeran azazuwaa immiis.—Qol. 1:18; Ajj. 1:1.

6-7. (a) Yesuusi tamaarissidobati awan xaafettidonaa? (b) Nuuni Kiristtoosa higgiyawu waani azazettiyoo?

⁶ Yesuusi tamaarissidobati awan xaafettidonaa? Yesuusi haasayidobaynne saꞌan deꞌiyo wode oottido darobay oyddu Wonggeletun xaafettiis. Giriikettuwan Xaafettida Geeshsha Maxaafaappe attida harata xaafida attuma asata geeshsha ayyaanay kaalettido gishshawunne etawu ‘Kiristtoosa wozanay’ woy qofay deꞌiyo gishshawu, Yesuusi issibaa qoppiyo ogiyaa nuuni akeekanaadan he maxaafati maaddoosona.—1 Qor. 2:16.

⁷ Tamaariyoobaa: Yesuusi tamaarissidobay deꞌuwan ubbabawu maaddees. Hegaa gishshawu, Kiristtoosa higgee nuuni son, ooso sohuwan woy timirtte keettaaninne gubaaꞌiyan oottiyo ubbabaara gayttidaba. Nuuni Giriikettuwan Xaafettida Geeshsha Maxaafaa nabbabiyoogaaninne hegaa wotti dentti qoppiyoogan ha higgiyaa tamaaroos. Nuuni geeshsha ayyaanay kaalettin xaafettida Geeshsha Maxaafaa kifiletun deꞌiya he kaaletuwaara, azazuwaaranne maaraara maayiya ogiyan deꞌiyoogan he higgiyawu azazettoos. Nuuni Kiristtoosa higgiyaassi azazettiyo wode, Yesuusi tamaarissido ubbabawu Pultto gidida, nuna siiqiya Xoossaa Yihoowayyo azazettoos.—Yoh. 8:28.

SIIQOY DENDDO GIDIDO HIGGIYAA

8. Kiristtoosa higgiyawu denddoy aybee?

⁸ Mino baasuwan loytti keexxido keettay an deꞌiyaageeti woppu giidi deꞌanaadan oottees. Hegaadankka, minobay awu denddo gidido higgee awu azazettiyaageeti woppu giidi deꞌanaadan maaddees. Kiristtoosa higgiyawu denddoy aybippenne aadhdhiya siiquwaa. Nuuni hegaadan gaana danddayiyoy aybissee?

9-10. Yesuusa siiqoy denttettidoogaa bessiyaabay aybee, qassi nuuni A leemisuwaa waani kaallana danddayiyoo?

⁹ Koyruwan, Yesuusi oottido ubbabaa siiqoy denttettin oottiis. Qarettiyoogee siiquwaa bessiyaaba. Hegaa mala qaretay denttettin Yesuusi daro asaa tamaarissiis, harggidaageeta pattiis, namisettidaageeta miziisinne hayqqidaageeta denttiis. (Maa. 14:14; 15:32-38; Mar. 6:34; Luq. 7:11-15) Hegee Yesuusawu daro wodiyaanne wolqqaa wurssiyaaba gidikkonne, I ba koyiyoobaappe haratuugaa ba dosan kaseyiis. Qassi, I haratu gishshawu ba shemppuwaa aattidi immiyoogan gita siiquwaa bessiis.—Yoh. 15:13.

¹⁰ Tamaariyoobaa: Nuuni koyiyoobaappe haratuugaa kaseyiyoogan Yesuusa leemisuwaa kaallana danddayoos. Nu moottan deꞌiya asaayyo kaseegaappe aaruwan qarettiyoogaa tamaariyoogankka Yesuusa leemisuwaa kaallana danddayoos. Mishiraachchuwaa sabbakanaadaaninne tamaarissanaadan hegaadan nuna qaretay denttettiyo wode, Kiristtoosa higgiyaa azazettoos.

11-12. (a) Yihooway nuussi wozanappe qoppiyoogaa bessiyaabay aybee? (b) Nuuni Yihoowaagaadan siiqiyaageeta waani gidana danddayiyoo?

¹¹ Naaꞌꞌanttuwan, Yesuusi ba Aawaa siiquwaa qonccissiis. Yesuusi saꞌan haggaaziyo wode, Yihooway baassi goynniyaageetussi ay keena wozanappe qoppiyaakko bessiis. Harabata gujjin, Yesuusi nuuni ubbay saluwan deꞌiya nu Aawaayyo alꞌꞌo gidiyoogaa tamaarissiis. (Maa. 10:31) Bantta nagaraappe simmidi gubaaꞌiyaa yiya bayida dorssata mokki ekkanawu Yihooway amottees. (Luq. 15:7, 10) Yihooway ba Naꞌaa nu gishshawu wozo oottidi immiyoogan ba siiquwaa nuussi qonccissiis.—Yoh. 3:16.

¹² Tamaariyoobaa: Nuuni Yihoowaagaadan siiqiyaageeta waani gidana danddayiyoo? (Efi. 5:1, 2) Nuuni nu ishanttanne nu michchontta ubbaa alꞌꞌobadan xeelloos; qassi Yihoowakko simmiya ‘bayida dorssaa’ ufayssan mokki ekkoos. (Maz. 119:176) Nu ishanttussinne nu michchonttussi maadoy koshshiyo wode, eta maaddanawu nuuni nu wodiyaanne nu wolqqaa goꞌettiyoogan eta siiqiyoogaa bessoos. (1 Yoh. 3:17) Nuuni haratussi siiquwaa bessiyo wode, Kiristtoosa higgiyaa azazettoos.

13-14. (a) Yohaannisa 13:34, 35n odettidaagaadan Yesuusi ba erissiyo ashkkarati ay bessanaadan azazidee, qassi hegee ooratta azazo gidiyoy aybissee? (b) Nuuni ooratta azazuwaa waani azazettiyoo?

¹³ Heezzanttoy, Yesuusi I erissiyo ashkkarati bantta goꞌꞌaa aggi bayiyo siiquwaa bessanaadan azaziis. (Yohaannisa 13:34, 35 nabbaba.) Yesuusa azazoy ooratta, ayssi giikko, Xoossay Israaꞌeelatuyyo immido higgiyan odettibeenna ogiyan nuuni siiquwaa bessanaadan yootees: Nu mala Kiristtaaneta nuuni Yesuusi nuna siiqidoogaadan siiqana bessees. Hegawu nu goꞌꞌaa aggi bayiyo siiquwaa koshshees.c Nuuni nuna siiqiyoogaappe aaruwan nu ishanttanne michchontta siiqana koshshees. Yesuusi nuuyyo oottidoogaadan, nu dosan nu shemppuwaa etayyo aattidi immiyoogaa keena nuuni eta keehi siiqana bessees.

¹⁴ Tamaariyoobaa: Nuuni ooratta azazuwaa waani azazettiyoo? Nu ishanttu gishshawunne michchonttu gishshawu nu goꞌꞌaa aggi bayiyoogaana. Eta ashshanawu nu deꞌuwaa aattidi immiyoogaa mala, gitabaa aggi bayiyoogan nuuni eta keehi siiqiyoogaa bessoos. SHin, nuuni guuttabaakka aggi bayoos. Leemisuwawu, nuuni cimida ishay woy michchiyaa gubaaꞌiyaa shiiquwaa shiiqanaadan ubbatoo maaddanawu baaxetiyo wode, woy nuuni siiqiyo uri ufayttanaadan nu koyiyoobaa nu dosan aggi bayiyo wode, woy meretay daafabaa gattin qohettidaageeta maaddanawu oosuwaappe shemppuwaa oychchiyo wode, nuuni Kiristtoosa higgiyaa azazettoos. Nuuni nu gubaaꞌee yan deꞌiya ubbay woppu gaanaadan oottiya soho gidanaadankka maaddoos.

TUMU PIRDDAA MINTTETTIYA HIGGIYAA

15-17. (a) Yesuusi tumu pirddaa oosuwan waati qonccissidee? (b) Nuuni waanidi Yesuusa milatana danddayiyoo?

¹⁵ Geeshsha Maxaafay “tumu pirddaa” giyo qaalaa Xoossay likke giyoobaa oottiyoogaanne asa asappe shaakkennan hegaa oottiyoogaa bessiyaabaa qonccissanawu goꞌettiis. Nuuni Kiristtoosa higgee tumu pirddaa minttettees gaana danddayiyoy aybissee?

¹⁶ Koyruwan, Yesuusi tumu pirddaa oosuwan waati qonccissidaakko ane qoppa. I saꞌan deꞌiyo wode, Ayhuda haymaanootiyaa kaalettiyaageeti Ayhuda gidennaageeta ixxoosona, Ayhuda haymaanootiyaabaa tamaaribeennaageetuppe eti aadhdhiyaabadan qoppoosonanne macca asaa karoosona. SHin Yesuusi ubba asaa muletoo issuwaa issuwaappe shaakkennan xeelliis. I bana ammanida Ayhuda gidennaageeti bana kaallanaadan eeno giis. (Maa. 8:5-10, 13) I duriyaanne hiyyeesaa shaakkennan ubbawu sabbakiis. (Maa. 11:5; Luq. 19:2, 9) I maccaasaa meqetti baynna hanotan mule oyqqi erenna. Ubba qassi, I harati pattennabadan xeelliyoogeeta gujjin, maccaasaa bonchchiisinne etawu kehiis.—Luq. 7:37-39, 44-50.

¹⁷ Tamaariyoobaa: Eti dure woy hiyyeesa gidin woykko eti ay haymaanoote yara gidinkka, asa asappe shaakkennan aggiyoogaaninne siyanawu koyiya ubba asawu sabbakiyoogan nuuni Yesuusa leemisuwaa kaallana danddayoos. Maccaasaa bonchchuwan oyqqiyoogan Kiristtaane attuma asati Yesuusa leemisuwaa kaalloosona. Nuuni hegaadan oottiyo wode, Kiristtoosa higgiyaa azazettoos.

18-19. Yesuusi tumu pirddaabaa ay tamaarissidee, qassi nuuni I tamaarissidobaappe ay tamaariyoo?

¹⁸ Naaꞌꞌanttuwan, Yesuusi tumu pirddaabaa ay tamaarissidaakko qoppa. I bana kaalliyaageeti issoy issuwaa maara oyqqanawu maaddiya maarata tamaarissiis. Leemisuwawu, harati nuna maara oyqqanaadan koyikko, nuunikka eta maara oyqqana mala Yesuusi tamaarissiis. Nuuni hegaadan oottikko, eti nuna maara oyqqana danddayoosona. (Maa. 7:12) Nuuni naaqettikko shin? Yihooway “gallassinne qammi baakko waassiya doorettida asaassi” tumu pirddaa pirddanaagaa bana kaalliyaageeti ammanettanaadankka Yesuusi tamaarissiis. (Luq. 18:6, 7) Ha qofay qaalaa geliyooba: Suure pirddiya nu Xoossay ha wurssetta wodiyan nuna gakkiya metuwaa erees; qassi I ba keerido wodiyan tumu pirddaa nuussi pirddana.—2 Tas. 1:6.

¹⁹ Tamaariyoobaa: Nuuni Yesuusi tamaarissido maarata kaalliyo wode, harata suure ogiyan oyqqana. Seexaanaa alamiyaappe gakkiya naaquwaa gaasuwan nuuni waayettikko, Yihooway tumu pirddaa ehaanaagaa eriyoogee nuna minttettana danddayees.

AAWATETTAY DEꞌIYOOGEETI HARATA WAATI OYQQANA KOSHSHII?

20-21. (a) Aawatettay deꞌiyoogeeti harata waati oyqqana koshshii? (b) Azinay ba goꞌꞌaa aggi bayiyo siiquwaa waati bessii, qassi aaway ba naata waati oyqqana koshshii?

²⁰ Kiristtoosa higgiyaa kaalliya, aawatettay deꞌiyoogeeti harata waati oyqqana koshshii? Siiqoy he higgiyawu denddo gidiyo gishshawu, aawatettay deꞌiyoogeeti harata bonchchuwaaninne siiquwan oyqqana koshshees. Nuuni oottiyo ubbaban siiquwaa bessanaadan Kiristtoosi koyiyoogaa eti hassayana bessees.

²¹ Son. Azinay “Kiristtoosi woosa keettaa” siiqiyoogaadan ba machchiyo siiqana koshshees. (Efi. 5:25, 28, 29) Azinay baagaappe ba machchiyaa koyiyoobaa kaseyiyoogan ba goꞌꞌaa aggi bayiyo, Kiristtoosa siiquwaa leemisuwaa kaallana bessees. Issi issi attuma asati hegaa mala siiquwaa bessanawu metootana danddayoosona; eti harata maara oyqqiyoonne siiqiyo wogan diccibeennaagee hegawu gaaso gidennan aggenna. Iita eeshshaa laammiyoogee etawu metiyaaba gidana danddayikkonne, eti Kiristtoosa higgiyaa azazettanawu laamettana koshshees. Ba goꞌꞌaa aggi bayidi siiqiya azinaa A machchiyaa bonchchawusu. Ba naata wozanappe siiqiya aaway haasayiyooban woy oottiyooban eta mule qohenna. (Efi. 4:31) I ba naati woppu gaana mala eta siiqiyoogaanne nashshiyoogaa bessees. Naati hegaadan oottiya aawaa siiqoosonanne an ammanettoosona.

22. Koyro PHeexiroosa 5:1-3​y yootiyoogaadan ‘dorssay’ oogee, qassi eti waani oyqettana koshshii?

²² Gubaaꞌiyan. Cimati ‘dorssay’ banttaagaa gidennaagaa hassayana koshshees. (Yoh. 10:16; 1 PHeexiroosa 5:1-3 nabbaba.) “Xoossaa dorssaa wudiyaa,” “Xoossai koyiyoogaadan” giya qonccissoti, dorssati Yihoowaba gidiyoogaa cimata hassayissoosona. I ba dorssati siiquwaaninne qaretan oyqettanaadan koyees. (1 Tas. 2:7, 8) Henttanchcha gidiyo bantta aawatettaa poliyo wode siiquwaa bessiya cimata Yihooway nashshees. Qassi hegaa mala cimata ishanttinne michchontti siiqoosonanne bonchchoosona.

23-24. (a) Gubaaꞌiyan deꞌiya issi uri gita nagaraa oottiyo wode cimati waati oyqqana bessii? (b) Hegaa mala allaalliyaa beꞌiyo wode, cimati ay hassayana bessii?

²³ Issi uri gita nagaraa oottiyo wode, cimati waati oyqqana bessii? Xoossay Israaꞌeelatuyyo immido Higgiyawu azazettiya daannatuppenne cimatuppe eta aawatettay dummatees. Muuse higgiyan, sunttettida cimati Yihoowawu goynniyoogaara gayttida yoho xalla gidennan, Yihoowawu goynniyoogaara gayttibeennabankka pirddoosona. SHin, Kiristtoosa higgiyawu azazettiya cimatu aawatettay ayyaanaabaara gayttidaagan oosettida nagaraa kaalliyoogaa. Kawotettaa sunttati pitaabeeriyaaranne danobaara gayttidabaa pirddanaadan Xoossay etayyo aawatettaa immidoogaa he cimati eroosona. Hegee kawotettaa sunttati qaxxayiyoogaa woy qashissiyoogaa malabaa xaaxi waaxees.—Roo. 13: 1-4.

²⁴ Gubaaꞌiyan deꞌiya issi uri gita nagaraa oottiyo wode cimatu aawatettay aybee? Eti he allaalleta qoranawunne kuuyanawu Geeshsha Maxaafaa goꞌettoosona. Kiristtoosa higgiyawu denddoy siiqo gidiyoogaa eti hassayoosona. Oosettida nagaraa gaasuwan qohettida, gubaaꞌiyaa yarata maaddanawu waatana koshshii? giidi qoppanaadan cimata siiqoy denttettees. Nagaraa oottida ura xeelliyaagan, hagaadan giidi oychchanaadan siiqoy cimata denttettees: ‘I ba nagaraappe simmidee? I Yihoowaara dabbotido dabbotaa zaarettidi minttanaadan nuuni A maaddana danddayiyoo?’

25. Kaalliya huuphe yohuwan ay beꞌanee?

²⁵ Kiristtoosa higgiyaa azazettiyoogee nuna keehippe ufayssees! Nuuni ubbay hegaa azazettanawu baaxetiyo wode, gubaaꞌiyan deꞌiya ubbay bana harati siiqiyo, xoqqu ootti xeelliyoonne woppu giyo soho oottidi gubaaꞌiyaa xeellanaadan maaddoos. SHin nuuni, ‘iita asati’ “kaseppe iiti iiti” biyo alamiyan deꞌoos. (2 Xim. 3:13) Nuuni akeekanchcha gididi deꞌana bessees. Mattumaara gayttidaagan naata qohiyoogaa xeelliyo wode, Kiristtaane gubaaꞌee Xoossaa suure pirddaa waati bessana danddayii? Kaalliya huuphe yohuwan ha oyshaa zaaruwaa beꞌana.