Xoossaara Hemettiyoogan ‘Suurebaa Ootta’

1-3. (a) Nuuni Yihoowawu kushe zaarana bessiyoy aybissee? (b) Nuna siiqiya ashshiyaagee nuuni oottanaadan koyiyoobay aybee?

NEENI muukettiya markkabiyaa giddon deꞌiyaabadan qoppa. Neeni ayba hidootinne baawa gaada qoppishin, ashshiya uri gakkidi nena kessanawu goochchees. I neeni qohettennaadan ashshidi, “Haꞌꞌi nena hirggissiyaabi baawa” giyaakko neeni keehi ufayttana! Neeni he urawu kushe zaaranawu qoppikkii? Neeni awu ne shemppuwaa aattada immanaagee erettidaba.

² Hegee Yihooway nuussi oottidobaa amarida ogiyan qonccissees. Nuuni awu kushe zaarana bessiyoogee qoncce. I nuna nagaraanne hayquwaa aylletettaappe laꞌa kessanawu wozuwaa giigissiis. Nuuni he alꞌꞌo yarshshuwan ammanikko nu nagaray atto geetettanaagaanne merinaa deꞌuwaa demmanaagaa eriyo gishshawu hirggokko. (1 Yohaannisa 1:7; 4:9) Nuuni shemppo 14n xannaꞌidoogaadan, wozoy Yihoowa siiquwaanne suure pirddaa qonccissiya aybippenne aadhdhiyaaba. Yaatin, nuuni waatana koshshii?

³ Nuna siiqiya ashshiyaagee nuuni oottanaadan koyiyoobaa loytti qoppiyoogee bessiyaaba. Hananabaa yootiya Mikiyaasa baggaara Yihooway hagaadan giis: “Hai asau, GODAI neeyyo lo77obaa odi wottiisttenne. GODAI neeppe koyiyoogee aibee giikko, neeni suurebaa oottanaagaa, aggenna siiquwaa bessanaagaanne ashkketettan ne Xoossaara hemettanaagaa.” (Mikiyaasa 6:8) Nuuni ‘suurebaa oottiyoogee’ Yihooway nuuppe koyiyoobaappe issuwaa gidiyoogaa akeeka. Nuuni hegaadan waati oottana danddayiyoo?

‘Tumu Xillotettaa’ Kaalliyoogaa

4. Yihooway I kessido xillotettaa maaraadan nuuni deꞌana mala koyiyoogaa waati eriyoo?

⁴ Yihooway I likkebawunne likke gidennabawu kessido maaraadan nuuni deꞌanaadan koyees. I kessido maaray suurenne geeshsha gidiyo gishshawu, nuuni hegaadan deꞌiyo wode suure pirddaanne xillotettaa kaalloos. Isiyaasa 1:17y, “Lo77obaa oottanau tamaarite. Xillo pirddaa koyite” yaagees. Xoossaa Qaalay nuuni ‘xillotettaa koyanaadan’ zorees. (Sofonaasa 2:3) Nuuni ‘tumu xillotettan Xoossaa leemisuwan merettida ooratta asatettaa maayanaadankka’ zorees. (Efisoona 4:24) Danobay, tunabaynne pokkobay geeshshabaa mooriyo gishshawu, tumu xillotettay woy tumu suure pirdday hegeetuppe keehi dumma.—Mazamure 11:5; Efisoona 5:3-5.

5, 6. (a) Yihooway kessido xillotettaa maaraadan nuuni deꞌiyoogee nuuyyo deexxiyaaba gidennay aybissee? (b) Nuuni xillotettaa aggennan kaallana bessiyoogaa Geeshsha Maxaafay waati qonccissii?

⁵ Yihooway kessido xillotettaa maaraadan nuuni deꞌiyoogee deexxiyaabee? CHii. Yihoowakko shiiqida wozanay I kessido maarata deexxiyaabadan qoppenna. Nuuni nu Xoossaa A loꞌꞌo eeshshaa gaasuwan siiqiyo gishshawu, A ufayssiya ogiyan deꞌanawu koyoos. (1 Yohaannisa 5:3) ‘Xillobaa’ oottiyoogaa Yihooway dosiyoogaa hassaya. (Mazamure 11:7) Nuuni Xoossaa suure pirddaa woy xillotettaa tumuppe kaallanawu, Yihooway dosiyoobaa dosananne I ixxiyoobaa ixxana bessees.—Amoxa 5:15.

⁶ Asay nagaranchcha gidiyo gishshawu xillotettaa kaalliyoogee metiyaaba. Nuuni ceega meretaa A iita oosuwaara qaaridi ooratta meretaa maayana bessees. He ooratta meretay suure eran ‘ubba wode ooraxxiyoogaa’ Geeshsha Maxaafay yootees. (Qolasiyaasa 3:9, 10) ‘Ubba wode ooraxxiyoogaa’ giya qofay aggennan ooratta meretaa maayiyoogaa qonccissees; yaatanawu mintti baaxetana koshshees. Nuuni suurebaa oottanawu ay keena baaxetikkonne, nuuni nagaranchcha gidiyo gishshawu qoppiyooban, haasayiyooban woy oottiyooban baliyo wodee deꞌees.—Roome 7:14-20; Yaaqooba 3:2.

7. Nuuni xillotettaa kaallanawu baaxetiyo wode hidootaa qanxxissiyaabaa waati xeellana koshshii?

⁷ Nuuni xillotettaa kaallanawu baaxetiyo wode hidootaa qanxxissiyaabaa waati xeellana koshshii? Nuuni nagaray wolqqaama gidiyoogaa xaasayi xeellanawu koyennaagee qoncce. Qassi nuuni nu mooruwaa gaasuwan Yihoowawu oottanawu bessennabadan qoppidi baaxetiyoogaa aggana bessenna. Nu keha Xoossay bantta nagaraappe simmiyaageeti zaarettidi A ufayssanaadan maaddiyaabaa giigissiis. Kiitettida Yohaannisi, “Nagara intte oottennaadan, taani hagaa intteyyo xaafais” yaagido minttettiya qaalata qoppa. Gidoppe attin, I yaagi simmidi hagaadan giis: “SHin ooninne [Addaameppe laattidobaa gaasuwan] nagara oottikko, Aawaa matan nuuyyo gaannatiya Yesuus Kiristtoosi . . . de7ees.” (1 Yohaannisa 2:1) Nuuni nagaranchcha gidikkokka, Yihooway A ufayssiya ogiyan haggaazanaadan Yesuusa wozuwaa yarshshuwaa giigissiis. Nuuni Yihoowa ufayssanawu nuuyyo danddayettida ubbabaa oottanawu koyanaadan hegee nuna denttettennee?

Mishiraachchuwaanne Xoossaa Suure Pirddaa

8, 9. Mishiraachchoy odettiyoogee Yihoowa suure pirddaa waati qonccissii?

⁸ Xoossaa Kawotettaa mishiraachchuwaa haratuyyo minnidi yootiyoogan, nuuni Xoossaa suure pirddaa leemisuwaa kaallana danddayoos. Yihoowa suure pirdday mishiraachchuwaara waani gayttii?

⁹ Yihooway asay naagettana mala kasetidi odettanaadan oottennan ha alamiyaa xayssenna. Yesuusi wurssetta wodiyan hananabaa yootiiddi hagaadan giis: “Wonggeliyaa mishiraachchoi koiroora dere ubbau odettiichchanau bessees.” (Marqqoosa 13:10; Maatiyoosa 24:3) “Koiroora” giya qaalaa goꞌettidoogee kumetta alamiyan sabbakiyo oosuwaappe simmin harabati hananaagaa qonccissees. Iitati xayiyoonne xillotettay kumido ooratta alamee yaanaadan oottiya kasetidi odettida gita waayee he haniyaabatuppe issuwaa. (Maatiyoosa 24:14, 21, 22) Yihooway iitatuyyo bessennabaa oottiis giidi A ooninne mootana danddayennaagee qoncce. I kasetidi odettanaadan oottiyoogan, he asati bantta deꞌuwaa laammidi bashshaappe attanaadan etawu gidiya wodiyaa immiis.—Yoonaasa 3:1-10.

10, 11. Nuuni mishiraachchuwaa sabbakiyoogee Xoossaa suure pirddaa waati qonccissii?

¹⁰ Nuuni mishiraachchuwaa sabbakiyoogee Xoossaa suure pirddaa waati qonccissii? Koyruwan, harati attanaadan maaddanawu nuuni danddayettidabaa oottiyoogee bessiyaaba. Muukettiya markkabiyaappe kiyidi attiyoogaa yootiya leemisuwaa zaarettada ane qoppa. Neeni wolwoluwan gela attada, muukettiya harata maaddanawu koyanaagee erettidaba. Hegaadan, ha iita alamiyaa “haattan” baaxetiiddi deꞌiyaageeta nuuni maaddana bessees. Daroti nu yootiyoobaa siyana koyennaagee tuma. SHin Yihooway danddayan naagiyo wodiyan, eti bantta ‘nagaraappe simmidi’ attanaadan nuuni etawu yootana bessees.—2 PHeexiroosa 3:9.

¹¹ Nuuni nunaara gayttiya ubbawu mishiraachchuwaa yootiyoogankka suure pirddaa qonccissoos; yaatiyoogan asa asappe shaakkennaagaa bessoos. “Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa galatiyoogaa” hassaya. (Oosuwaa 10:34, 35) Nuuni A suure pirddaa leemisuwaa kaallanawu koyikko, asaabaa kasetidi kuuyana koshshenna. Eta zariyaa, asay eta xeelliyo hanotaa, woy eta aquwaa qoppennan, nuuni etayyo mishiraachchuwaa yootana koshshees. Nuuni yaatiyo wode, wozanappe koyiyaageeti mishiraachchuwaa siyidi laamettana danddayoosona.—Roome 10:11-13.

Nuuni Harata Oyqqiyo Ogiyaa

12, 13. (a) Nuuni haratu bolli eesuwan pirddana koshshennay aybissee? (b) ‘Pirddiyoogaa’ agganaadan Yesuusi zoridoogee woygiyoogee? (Tohossa qofaakka xeella.)

¹² Yihooway nuna oyqqido ogiyan nuuni harata oyqqiyoogankka suurebaa oottana danddayoos. Harati mooridoban eta boriyoogaaninne eta qofaa siriyoogan eta bolli pirddiyoogee metennaba. Gidoppe attin, Yihooway qareti baynna ogiyan nu qofaanne nu mooruwaa qoranaadan koyiya uri nu giddon baynnaagee qoncce. Yihooway nuna hegaadan oyqqenna. Mazamuriyaa xaafidaageetuppe issoy hagaadan giis: “Abeet GODAU, neeni nu nagaraa mazggafan xaafidaakko, abeet Godau, woni ooni pirddaappe attanau danddayii?” (Mazamure 130:3) Xillonne maariya nu Xoossay nu mooruwaa ubbatoo qoppenna gishshawu A keehi galatoos. (Mazamure 103:8-10) Hegaa gishshawu, nuuni harata waati oyqqana koshshii?

¹³ Nuuni Xoossaa suure pirdday maarotaa bessiyaaba gidiyoogaa akeekikko, nuna gattennaban woy pattennaban eesuwan haratu bolli pirddokko. Maatiyoosa shemppo 5-7n deꞌiyaagaa tamaarissiyo wode Yesuusi hagaadan giis: “Xoossai intte bolli pirddenna mala, inttekka haratu bolli pirddoppite.”a (Maatiyoosa 7:1) Nagaranchcha asawu pirddiyo eeshshay deꞌiyoogaa Yesuusi akeekiyoogaa bessiis. Harata bessennaban pirddiyo meezee deꞌiyoogeeti I yootiyoobaa ezggiyaageetu giddon deꞌikko, hegaa aggana koshshiis.

14. Nuuni haratu bolli ‘pirddiyoogaa aggana’ bessiyo gaasoti aybee?

¹⁴ Nuuni haratu bolli ‘pirddiyoogaa aggana’ bessiyoy aybissee? Issi gaasoy hegaadan oottanawu nuussi maati baynnaagaa. Erissiyo ashkkaray Yaaqoobi “higgiyaa immiyaageenne pirddiyaagee” Yihoowa xalaala gidiyoogaa yootiis. Yaatiyo gishshawu, I hagaadan oychchiis: “Ne shooruwaa bolli pirddiyaagee neeni oonee?” (Yaaqooba 4:12; Roome 14:1-4) Hegaa bollikka, nuuni nagaranchcha gidiyoogee bessennabaa sohuwaara pirddanaadan oottana danddayees. Lagiyoogaa, naaqettidabadan qoppidi yiillotiyoogaa, qanaatiyoogaanne bana xillodan xeelliyoogaa mala daro eeshshati nuuni harata bessenna ogiyan xeellanaadan oottana danddayoosona. Nu baliyo harabatikka deꞌiyo gishshawu, nuuni hegeeta wotti dentti qoppiyoogee haratu balaa qorennaadan nuna naagana koshshees. Nuuni haratu wozanan deꞌiyaabaa erokko; woy qassi eta hanotaa wurssi erana danddayokko. Hegaa gishshawu, nu mala Kiristtaanetu halchchoy bala gaanawu woy eti Xoossawu oottiyoobaa boranawu nuuni oonee? Nu ishanttunne michchonttu balan xeelaa wottiyoogaa aggidi, eta loꞌꞌo eeshshaa akeekiyoogan Yihoowa leemisuwaa kaalliyoogee keehi loꞌꞌoba!

15. Xoossaayyo goynniyaageeti oottennabay aybee, qassi aybissi?

¹⁵ Nu soo asaa bolli pirddiyoogaabaa shin? Sarotettay kumana koshshiyo soho gidida son, ha wodiyan asay issoy issuwaabaa keehi iitabaa qoppiyoogee azzanttiyaaba. Inxxarssan woy asatettan bantta soo asaa aggennan qohiyaanne iita cashshaa cayiya azinatubaa, machchotubaa, woy yelidaageetubaa siyiyoogee ha wodiyan meeze gididaba. Gidoppe attin, Xoossaayyo goynniyaageeti qohiyaabaa haasayokkona, borokkonanne cayokkona. (Efisoona 4:29, 31; 5:33; 6:4) ‘Pirddiyoogaa agganaadan’ Yesuusi nuna zorido zoree nu son hanennaba gidenna. Suurebaa oottiyoogee Yihooway nuna oyqqido ogiyan nuunikka harata oyqqiyoogaara gayttidaba gidiyoogaa hassaya. Qassi nu Xoossay nuna meqetti baynna ogiyan mule oyqqenna. I bana siiqiyaageetuyyo keehi ‘qarettees.’ (Yaaqooba 5:11) Nuuni A milatana koshshiyo keehi loꞌꞌo leemiso!

‘Suurebaa’ Oottiya Cimata

16, 17. (a) Yihooway cimati ay oottanaadan koyii? (b) Nagaraa oottida uri wozanappe ba nagaraappe simmana xayikko waatana bessii, qassi aybissi?

¹⁶ Nuuni ubbay suurebaa oottana koshshikkonne, gubaaꞌe cimati hegaa aaruwan oottana koshshees. Isiyaasi ‘haariyaageetubaa’ woy cimatubaa yootido hiraagaa akeeka: “Be7ite, kawoi xillotettan kawotana; haariyaageetikka suuretettan haarana.” (Isiyaasa 32:1) Yihooway cimati suure pirddaara maayiyaabaa oottanaadan koyees. Eti hegaa waati oottana danddayiyoonaa?

¹⁷ Suure pirddaa woy xillotettaa kaallanawu gubaaꞌee kandduwaabaaninne ayyaanaaban geeshsha gidana koshshiyoogaa ayyaanaaban kaymida he asati loytti eroosona. Issi issitoo, cimati gita nagaraara gayttidabaa pirddana koshshees. Danddayettiyaaba gidikko, eti hegaadan oottiyo wode Xoossaa suure pirddaa maaran maarana koshshiyoogaa hassayoosona. Yaatiyoogan, eti nagaraa oottida uray ba nagaraappe simmanaadan maaddanawu maloosona. Gidoppe attin, nagaraa oottidaagaa hegaadan maaddishinkka I wozanappe ba nagaraappe simmana xayikko shin? Yihoowa Qaalay polo suure pirddan hagaadan oottanaadan azazees: “He iitabaa oottiya uraa intte giddoppe kessirggite.” Hegaa giyoogee A gubaaꞌiyaappe bohiyoogaa giyoogaa. (1 Qoronttoosa 5:11-13; 2 Yohaannisa 9-11) Hegaadan oottiyoogee cimata azzanttiyaaba gidikkonne, eti kandduwaabaaninne ayyaanaaban gubaaꞌiyaa geeshshatettaa naaganawu hegee koshshiyoogaa akeekoosona. Gidikkonne, nagaraa oottidaagee ba mooruwaa akeekidi issi galla gubaaꞌiyaa simmana giidi eti qoppoosona.—Luqaasa 15:17, 18.

18. Cimati Geeshsha Maxaafaappe harata zoriyo wode ay hassayiyoonaa?

¹⁸ Koshshiyo wode Geeshsha Maxaafaappe zoriyoogeekka suurebaa oottiyoogaara gayttidaba. Cimati harati oottiyo balabaa qorokkona. Woy qassi zoranawu eti eesotokkona. Gidoppe attin, nu mala Kiristtaanee akeekennan ‘moorobaa oottana’ danddayees. Cimati Xoossaa suure pirdday meqettaa iita woy qarettennaagaa gidennaagaa hassayiyoogee eti ‘ashkketetta ayyaanan A suurissanawu’ malanaadan denttettees. (Galaatiyaa 6:1) Yaatiyo gishshawu, cimati nagaraa oottida uraa hanqqettokkona woy qohiyaabaa haasayokkona. Siiquwan zoriyo zoree siyiya uraa minttettees. Balabaa oottiyoogee kaalettiyoobaa cimati geeshshidi yootiyo wodekka, hegaa oottida uri Yihoowa dorssatuppe issuwaa gidiyoogaa eti hassayoosona.b (Luqaasa 15:7) Siiquwan zoriyoogee woy seeriyoogee moorida uraa suurissanawu maaddana danddayees.

19. Cimati kuuyana koshshiyoobay aybee, qassi eti he kuuyiyoobawu ay denddo oottana bessii?

¹⁹ Cimati bantta mala Kiristtaanetuura gayttidabaa darotoo kuuyana koshshees. Leemisuwawu, gubaaꞌiyan deꞌiya hara ishantti gubaaꞌe cimata woy gubaaꞌiyawu oottiyaageeta gidana danddayiyaakkonne haasayanawu cimati issi issitoo shiiqoosona. Suurebaa oottana koshshiyoogaa cimati eroosona. Eti hegaadan sunttanawu bantta qofan zemppokkona; shin Xoossay kessido maarata kaallidi kuuyoosona. Yaatiyoogan, eti “ainne asa som77o xeellennan, issuwaa issuwaappe dummayennan” oottoosona.—1 Ximootiyoosa 5:21.

20, 21. (a) Cimati waatanawu baaxetiyoonaa, qassi aybissi? (b) “Unꞌꞌettidaageeta” maaddanawu cimati ay oottana danddayiyoonaa?

²⁰ Cimati hara ogiyankka Xoossaa suure pirddaa kaalloosona. Isiyaasi cimati ‘suurebaa’ oottanaagaa kaseti yooti simmidi hagaadan giis: “Asai huuphiyan huuphiyan carkkuwaappe geemmiyo soho, gotiyaappe baqatiyo soho gidana; mela sohuwan goggiya haattanne booddila biittan de7iya gita zaallaa kuwaa mala gidana.” (Isiyaasa 32:2) Hegaa gishshawu, cimati bantta mala Kiristtaaneti minttettuwaanne woppaa demmanaadan baaxetoosona.

²¹ Ha wodiyan, darota hidootaa qanxxissana danddayiya daro metoti gakkiyo gishshawu, minttettoy etawu koshshees. Cimatoo, “unꞌꞌettidaageeta” maaddanawu ay oottana danddayeetii? (1 Tasalonqqe 5:14, NW) Eti yootiyoobaa qaretan ezggite. (Yaaqooba 1:19) Eti ammanettiyo urawu bantta wozanan deꞌiya ‘hirggaa’ yootanawu koyennan aggokkona. (Leemiso 12:25) Yihooway, qassi eta ishanttinne michchontti eta xoqqu ootti xeelliyoogaanne siiqiyoogaa eti ammanettanaadan oottite. (1 PHeexiroosa 1:22; 5:6, 7) Hegaa bollikka, etaara issippe, qassi etawu woossana danddayeeta. Issi cimay etawu wozanappe woossiyoogaa siyiyoogee eta keehi minttettana danddayees. (Yaaqooba 5:14, 15) Unꞌꞌettidaageeta siiquwan maaddanawu intte baaxetiyoogaa suure pirddiya Xoossay akeekees.

22. Nuuni Yihoowa suure pirddaa leemisuwaa ayba ogetun kaallana danddayiyoo, qassi hegee ayba ayfe demissii?

²² Nuuni Yihoowa suure pirddaa leemisuwaa kaalliyoogan kaseegaappe aaruwan akko shiiqiyoogee qoncce! Nuuni I xillotettawu kessido maaraadan deꞌiyo wode, shemppo ashshiya mishiraachchuwaa haratuyyo yootiyo wodenne haratu balan xeelaa wottiyoogaa aggidi, eta loꞌꞌo eeshshaa akeekiyo wode, Xoossaa suure pirddaa kaalloos. Cimatoo, gubaaꞌiyaa geeshshatettaa intte naagiyo wode, minttettiya zoriyaa Geeshsha Maxaafaappe zoriyo wode, suurebaa kuuyiyo wodenne unꞌꞌettidaageeta minttettiyo wode, Xoossaa suure pirddaa kaalleeta. Xoossaara hemettiyoogan ‘suurebaa oottanawu’ A asay baaxetiyoogaa, Yihooway saluwan uttidi xeelliyo wode keehi ufayttanaagee qoncce!