So Asaa Goynuwaa Atotettau Keehi Koshshiyaabaa!

“UBBAAPPE Wolqqaama Xoossaa gita” gallassaa olay ayba yashshiyaagaa gidanaakko qoppa! (Ajjuutaa 16:14) Hananabaa yootiya Mikiyaasi qoncce leemisuwan: “Eessaa muqaaddai taman seeriyoogaadan, dereti . . . seerana; eti keraappe zanggaarau duge goggiya haattaadan goggana” yaagiis. (Mikiyaasa 1:4) Yihoowassi oottennaageeta ayba wolqqaama bashshay gakkanee? Xoossaa Qaalay: “He wodiyan GODAI woridoogeetu ahai, biittaa bollan ha gaxaappe hini gaxaa gakkanau laalettana” yaagees.—Ermmaasa 25:33.

Hegaa mala akeekissuwaa qoppiyo wode, bantta huuphessi qofaa qachana danddayiya naati deꞌiyo, so asau huuphe gididaageeti (etappe dariya baggay yelidaageetuppe issuwaa xallay naata dichiyaageeta), ‘Ta naati Armmageedoonappe attana danddayiyoonaa?’ yaagidi banttana oychana koshshees. Geeshsha Maxaafay, eti banttappe koyettiyaagaa keenaa Yihoowaara mino dabbotaa medhidaageeta gidikko, attanaagee ammanttiyaaba gidiyoogaa yootees.—Maatiyoosa 24:21.

So Asaa Goynuwau Wodiyaa Keeriyoogee Keehippe Koshshiyaaba

Yelidaagaa gidiyoogaadan, ne naata “Godaa seeraaninne zoriyan” dichanau neeyyo danddayettidabaa ubbaa ootta. (Efisoona 6:4) Geeshsha Maxaafaa ne naatuura xannaꞌiyoogee keehippe koshshiyaaba. Yihoowayyo bantta dosan azazettido gishshau PHauloosi galatido, Piliphisiyuusa Kiristtaanetu mala nu naati gidanaadan koyoos. I: “Ta dabbotoo, taani inttenaara de7iyo wode ubban intte tau azazettidoogaadan, ha77i taani intte matan de7enna wodekka, intte kaseegaappe aattidi tau azazettanau bessees; yashshatettaaninne kokkorssan intte atotettaa polanau oottite” yaagidi xaafiis.—Piliphphisiyuusa 2:12.

Ne naati neeni baynnasan Yihoowa higgiyaa azazettiyoonaa? Timirtte keettan shin? Neeni baynnasan Yihoowa higgiyaa kaallanaadan, he higgeti aadhida eratettay deꞌiyoogeeta gidiyoogaa ne naati ammananaadan waatada maaddana danddayay?

Hegaa xeelliyaagan ne naꞌaa ammanuwaa minttanau so asaa goynoy keehippe maaddana danddayees. Hegaa gishshau, so asaa Geeshsha Maxaafaa xinaatiyaa murutissanau maaddiya heezzu waannabata ane tobboos.

So Asaara Geeshsha Maxaafaa Ubbatoo Xannaꞌite

Geeshsha Maxaafay xaafettido koyro doonan, Iyyooba 1:6n “issi gallassi” geetettidi birshshettida qaalay Xoossaa naata gidida kiitanchati keerettida wodiyan a sinttan shiiqiyoogaa bessees. Ne naatuurakka hegaadan ootta. Ne So Asaa Goynuwaa omarssau gallassaanne saatiyaa keera; qassi hegaa ubbatoo naaga. Hegaa bollikka, qoppibeennabay gakkiyo wodessi hara wodiyaa keera.

Aqa peꞌada, So Asaa Geeshsha Maxaafaa xinaatiyaa issi issitoo xannaꞌana danddayettees gaada qoppoppa. Ne naati neeni xannaꞌissiyo hara xinaatetuppe aadhiyoogaa hassaya. Gidikkonne, Seexaanay eta ba piriyan oyqqana koyees. (1 PHeexiroosa 5:8) Neeni So Asaa Goynuwaa omarssan xinaatiyaa aggada televizhiiniyaa beꞌiya woy hara pattennabaa oottiyaaba gidikko, Seexaanay xooniis giyoogaa.—Efisoona 5:15, 16; 6:12; Piliphphisiyuusa 1:10.

Galla Galla Deꞌuwan Goꞌettana Danddayiyoobaa Xannaꞌite

So Asaa Goynuwaa omarssay tuma gididabaa eriyoogaappe aadhiyaaba gidana koshshees. He wodiyan galla galla deꞌuwan goꞌꞌiyaabaa xannaꞌanau baaxetite. Waatidi? Issi issitoo, intte naata mata wode gakkanabaara gayttida huuphe yohuwaa doorite. Leemisuwau, haggaazuwau meezetiyoogaakka ayssi gujjekketii? Yelagati danddayiyoobaa oottiyoode ufayttoosona. Asaa woygi haasayissanaakko meezetiyoogeenne hasayissiyo asay eqettiyoode waatanaakko qoppiyoogee, eti dumma dumma ogetun Kawotettaabaa sabbakiyo wode banttanan ammanettanaadan maaddees.—2 Ximootiyoosa 2:15.

Ne naati laggiyaa sugettaa xoonanaadan maaddiya, meezetiyo prograamiyaa giigissana danddayaasa. Ne naꞌay woy naꞌiyaa ufayttiyo zaaruwaa giigettidi shaahettiyo injjee deꞌanaadan oottiya, tobbiyo prograamiyaa giigissa. Hegee, ayba paacee gakkiyaakko, awaani gakkiyaakko, xoonettiyaaba gidikko aybi gakkanaakko, xooni kiyiyaaba gidikko ay demmanaakko ne naꞌaa oychiyoogaa gujjana danddayees. Wodiyaappe wodiyan, paacee gakkiyo wode zaariyoobaa ayssi meezetekketii?

So asaa goynoy yelidaageeti ayyaanaabaa hoolliyaa kessiyoogee goꞌꞌiyoogaa mintti yootiyo injje gidees. Hegaa xeelliyaagan, nu maxeetiyan kiyiya, ammanettidaageetu deꞌuwaabaa yootiya taarikee, deꞌuwan Yihoowayyo oottiyoogaa kaseyiyoogee aybippenne aadhiyaaba gidiyoogaa ne naꞌay akeekanaadan maaddanau keehippe goꞌꞌiyaaba.

Bantta naatussi loꞌꞌobaa qoppiya issi issi yelidaageeti bantta naati sinttappe waanana mala koyiyaakko keehippe qoppidi, haꞌꞌi eti oottiyoobaa xaasayidi xeelliyoogee bala gidiyoogaa nuuni akeekana koshshees. Beeteelen oottiyoogaanne misoonaawe gidiyoogaa mala loꞌꞌo hoolliyaa kessanaadan ne naata minttettiyoogee loꞌꞌoba gidiyoogee qoncce. Gidikkonne, hegaadan oottiyo wode neeni appe naagiyooban ne naꞌaa yiilloyennaadaaninne a woy o azzanttennaadan naagetta. (Qolasiyaasa 3:21) Ne naꞌay woy ne naꞌiya neeni koyido gishshau gidennan, banttau koyidi Yihoowa wozanappe siiqana bessiyoogaa ubbatoo hassaya. (Maatiyoosa 22:37) Yaatiyo gishshau, ne naꞌi oottiyo loꞌꞌobau galatiyo injjiyaa koya; i woy a oottibeennaban ne qofaa wottennaadan naagetta. Yihooway oottido ubbabaa nashshanaadan minttetta. Yaatada ne naꞌay Yihoowa kehatettaa wozanappe nashshiyoogaa bessanaadan ootta.

So Asaa Xinaatee Ufayssiyaagaa Gidanaadan Ootta

So Asaa Goynuwaa omarssay muruta gidanaadan keehippe koshshiya heezzanttobay, ufayssiyaagaa gidanaadan oottiyoogaa. Hegaadan waatada oottana danddayay? Issi issitoo diraamaa kaasetiyaa ezgganau woykko Yihoowa Markkati giigissido viiduwaa beꞌidi tobbana danddayeeta. Woykko Geeshsha Maxaafaappe issi kifiliyaa son deꞌiya ubbay shaahettidi nabbabana danddayeeta.

So asay issippe tobbanau keehippe maaddiya huphe yohoti Wochiyo Keelaaninne Beegottite! maxeetiyan deꞌoosona. Leemisuwau, Beegottite! maxeetiyan ubban, sinttaa 31n deꞌiya, “Woyga Zaaruutii?” yaagiya huphe yohuwaa goꞌettana danddayaasa. Asau immiyo Wochiyo Keelaa maxeetiyan naaꞌꞌu aginaappe issitoo kiyiya, “Yelaga Naatuyyo” xinaatiyau maaddiya huuphe yohoy dees. Ha huuphe yohoy yelaga naatussi giigiya, “Intte Naata Tamaarissite” giya huuphe yohuwaara kayan kayan kiyees.  

Beegottite! maxeetiyan kiyiya “Yelagati Oychiyo Oyshaa” giya huuphe yohoy panttatettau gakkida naati deꞌiyo yelidaageetuyyo keehippe maaddiyaaba. Hegaa bollikka, “Qoppana Bessiyaabata” giya saaxiniyaa xaasaya xeelloppa. He saaxiniyaa so asay tobbanau goꞌettana danddayees.

Gidikkokka, so asaa xinaatiyaa wode oyshan melissennaadan naagetta. Leemisuwau, yelidaageeti bantta naati so asay xannaꞌiyoobaanne hegaa bantta deꞌuwan goꞌettiyo ogiyaa xeelliyaagan banttau siyettiyaabaa xaafi oyqqanaadan minttettana mala odettiis. Gidoppe attin, ne naꞌi ba xaafidobaa sissidi nabbabanaadan wolqqanttoppa. Yaatikko, ne naꞌay bau siyettiyaaba ubbabaa xaafennan aggana danddayees. Ne naꞌay baassi giidi xaafido, odanau koyennabaa oychoppa.

Neeni ne soo asaa xinaatee goꞌꞌiyaagaanne ufayssiyaagaa gidanaadaaninne ubbatoo xannaꞌanaadan oottiyaaba gidikko, Yihooway ne baaxiyaa keehippe anjjana. So asaayyo dumma wode gidida he omarssay ne siiqiyoogeeti Yihoowaara dabbotaa minttanaadan maaddana danddayees.

[Sinttaa 31n deꞌiya saaxiniyaa]

Ooratta Hiillaa Goꞌettite

“Nu yelaga macca naatuura xannaꞌiyo wode, gubaaꞌiyau giigettiyo xuufiyaa taaninne ta azinay tobboos; yaatidi nu naati qofaa qanttan qonccissiya misiliyaa giigissanaadan oottoos. Issi issitoo Geeshsha Maxaafaa taarikiyaa milatissidi oottoos, woykko haggaazuwan asaa waatidi haasayissanaakko meezetoos. Xinaatee eta hanotau bessiyaagaa, ufayssiyaagaa, minttettiyaagaanne miichiyaagaa gidanaadan oottoos.”—J.M., Amarkkaa.

“Tanaara Geeshsha Maxaafaa xannaꞌiyaari naꞌay beni wode xaatta maxaafaa goꞌettiyoogee ay malakko akeekanaadan maaddanau, Isiyaasa maxaafaa shemppuwaanne payduwaa xayssidi attamida. Woraqataa issuwaa issuwaara gattidi naaꞌꞌu gaxaa maqa malabaara gattidi oyttida. Hegaappe simmin, naꞌay Yesuusi Naazireeten Ayhuda woosa keettan oottidoogaadan oottanau baaxetiis. Yesuusi Isiyaasa ‘maxaafaa dooyidi’ ba koyido sohuwaa ‘demmidoogaa’ Luqaasa 4:16-21n deꞌiya taarikee yootees. (Isiyaasa 61:1, 2) Gidikkokka, naꞌay hegaadan oottanau malido wode, shemppoynne paydoy baynna he adussa xaatta maxaafaa goꞌettidi Isiyaasa 61 kessanau metootiis. Yesuusi xaatta maxaafaa goꞌettido hiillan garamettidi, naꞌay: ‘Yesuusaara laggetiyay baawa!’” yaagiis.—Y.T., Jaappaane.

[Sinttaa 30n deꞌiya misiliyaa]

Ne naati laggiyaa sugettaa xoonanaadan, meezetiyo prograamee maaddana danddayees

[Sinttaa 31n deꞌiya misiliyaa]

So Asaa Goynuwaa omarssay ufayssiyaagaa gidanaadan baaxeta