Yesuusa—I Ayba Ogiyan Deꞌidee?

“Ta qumai tana kiittidaagee koyiyoobaa oottanaagaanne a oosuwaa polanaagaa.”—YOH. 4:34.

QOMMOORA deꞌiya qaalaa Yesuusi haasayido wode deꞌiya hanotay, i ba deꞌuwan xeelaa wottidoy aybiinakko loyttidi qonccissees. Yesuusinne i erissiyo ashkkarati guuraappe doommidi gallassi gakkanau deretiya, Samaariyaa biittan hemettiiddi takkidosona. (Yoh. 4:6) Erissiyo ashkkarati Yesuusi he wode namisettiis gi qoppidi, ayyo qumaa immidosona. (Yoh. 4:31-33) Yesuusi etau zaarido zaaruwan, ba deꞌuwan xoqqu ootti xeelliyoobaa yootiis. Xoossaa oosuwaa oottiyoogee au qumaa miyoogaappekka aadhidi keehi koshshiyaaba. Yesuusi yootidonne oottido ubbaban, Xoossaa sheniyaadan deꞌiis. Hegee ay gujjii?

▪ Xoossaa Kawotettaabaa sabbakiyoogaanne tamaarissiyoogaa Yesuusi ba deꞌuwan keehi xoqqu oottidi xeelliyo oosuwaara gayttidaagan Geeshsha Maxaafay, ‘Yesuusi tamaarissiiddinne kawotettaa wonggeliyaa mishiraachuwaa yootiiddi Galiila biitta ubban yuuyiis’ yaagees. (Maa. 4:23) Yesuusi Xoossaa Kawotettaabaa haratuyyo sabbakidi aggiigibeenna. Asaa tamaarissiis; giishin yootidobaa qonccissiisinne ammanttiya ogiyan yootiis. Yesuusa timirttiyau ayfe yohoy Xoossaa Kawotettaa.

Yesuusi haggaazido wode ubban, bana ezggiyaageetuyyo Xoossaa Kawotettay aybakko, qassi he Kawotettay ay polanaakko tamaarissiis. Kawotettaa xeelliyaagan kaallidi deꞌiya tumaanne hegaara gayttidaagan Yesuusi yootido qofaa oyqqida xiqiseta akeekite.

▪ Xoossaa Kawotettay saluwan deꞌiya ayso; qassi Yesuusi he Kawotettau Kawo gidanaadan Yihooway sunttiis.—MAA. 4:17; YOH. 18:36.

▪ He Kawotettay Xoossaa sunttay anjjettanaadan, qassi Xoossaa shenee saluwan hanidoogaadan saꞌankka hananaadan oottees.—MAA. 6:9, 10.

▪ Xoossaa Kawotettaa haaruwan kumetta saꞌay gannate gidana.—LUQ. 23:42, 43.

▪ Xoossaa Kawotettay mata wode yiidi, Xoossay saꞌau halchidobaa polana.a—MAA. 24:3, 7-12.

▪ Maalaalissiyaabaa oottiyoogaa Yesuusi waannatidi erettiyoy ‘Tamaarissiyaagaa’ gidiyoogaana. (Yoh. 13:13) Gidikkokka, ba haggaazido heezzu layttanne baggan maalaalissiya darobaakka oottiis. He maalaalissiya oosoti guuxxiis giishin naaꞌꞌubau maaddidosona. Koyruwan, i tumuppe Xoossay kiittin yiidoogaa akeekanaadan maaddidosona. (Maa. 11:2-6) Naaꞌꞌanttuwan, i Xoossaa Kawotettaa Kawo gidiyoogaadan, sinttappe ubba aahuwan ay polanaakko qonccissidosona. I oottido maalaalissiyaabatuppe amaridaageeta akeekite.

▪ Beetay coꞌꞌu gaanaadan, qassi carkkoy woppu gaanaadan oottiis.—MAR. 4:39-41.

▪ Qooqeta, tulletanne wobbeta gujjin, hargganchata pattiis.—LUQ. 7:21, 22.

▪ Qumay daranaadan oottidi, namisettida daro asaa miziis.—MAA. 14:17-21; 15:34-38.

▪ Guuxxiis giishin heezzu wodetun, hayqqidaageeta denttiis.—LUQ. 7:11-15; 8:41-55; YOH. 11:38-44.

Hegaa mala wolqqaama Kawuwaa haaruwan saꞌan deꞌoy ay mala gidanaakko qoppite!

▪ Xoossaa Yihoowa Eeshshaa Qonccissiyoogaa Yihoowabaa harata tamaarissiyoogaara gayttidaagan, Yesuus Kiristtoosa geetettida Xoossaa Naꞌaagaadan gidaa kunttiyay baawa. Yesuusi “merettidabaa ubbaappe aadhdhiya baira Na7a” gidiyoogaadan, hara ayyaana mereta ubbaappe keehi daro wodiyaa Yihoowaara issippe saluwan deꞌiis. (Qol. 1:15) I ba Aawaa qofaa akeekanau, qassi a sheniyaa, a maaraanne a ogiyaa tamaaranau demmido injjiyaa qoppite.

Yesuusi, “Aawaappe harai ooninne Na7ai oonakko erenna; Na7aappenne Na7ai Aawaa bessanau koyiyo asatuppe attin, harai ooninne Aawai oonakko erenna” yaagidoogee bessiyaaba. (Luq. 10:22) Yesuusi saꞌan deꞌido wode, ba Aawaa oonatettaa ufayssan, ubba yeemottidi qonccissiis. Yesuusi bayyo deꞌiya dumma eraa goꞌettidi yootiisinne tamaarissiis; ayyaana alamiyan, Ubbaappe Xoqqiya Xoossay deꞌiyo boncho sohuwan i deꞌiyo wode eridobaa hassayidi tamaarissiis.—Yoh. 8:28.

Yesuusi ba Aawaa qonccissanau oottidobaa, transformer geetettiyaabay oottiyooban leemisana danddayettees. Transformeree wolqqaama gidida korinttiyaa wolqqaa, asay goꞌettana danddayiyo sima wolqqau laammees. Yesuusi saluwan deꞌiiddi ba Aawaabaa eridobaa, asay metootennan akeekanaunne oosuwan peeshshanau danddayiyo ogiyan saꞌan deꞌiyo wode qonccissiis.

Yesuusi ba Aawaa qonccissido naaꞌꞌu waanna ogeta qoppite.

▪ Yesuusi ba tamaarissidoban Yihoowa xeelliyaagan tumay, giishin a sunttay, a halchoynne a ogee erettanaadan oottiis.—YOH. 3:16; 17:6, 26.

▪ Yesuusi ba oottidoban maalaaliya Yihoowa eeshshata darota qonccissiis. Yesuusi ba Aawaa eeshshaa polo ogiyan qonccissido gishshau, ‘Ta Aaway ay malakko eranau koyikko tana beꞌite’ giyoogaa malabaa yootiis.—YOH. 5:19; 14:9.

Yesuusi deꞌido ogee nuuni maalaalettanaadan oottees. I aybissi hayqqidaakko pilggikko, qassi nuuni tamaaridobaara moggiyaabaa oottikko keehippe goꞌettana danddayoos.

[Tohossa qofaa]