Pokko Misilee​—Qohiyaabee?

Ha wodiyan pornograafee woy pokko misilee alamiyan ubbasaa gakkiis.a Pornograafee erissuwan, faashiniyan, pilmiyan, muuziqan, maxeetiyan, televizhiiniyan, biiduwaa kaassan, zammaana silkkiyan, websaytiyaaninne hegaa malabatun deꞌana danddayees. Zammaana asaa wogan haꞌꞌi pornograafee pokko geetettennaba. Daro heeran deꞌiya daro asay haꞌꞌi ay wodeegaappe aaruwan pornograafiyaa beꞌees.—“Pornograafiyaa Xeelliyaagan Tuma Gididabaa” giya huuphe yohuwaa xeella.

Pornograafiyaa qommoy kaseppe laamettiis. Profeseriyaa Geyil Dinesa hagaadan gaada xaafaasu: “Beni asaa keehi daganttiya pokko misilee haꞌꞌi daroti meezetidoba gidiis.”

Pornograafee ubbasan deꞌiyoogaanne daroti meezetidoogaa aybidan xeellay? Pornograafee wodiyaa aattiyo qohennabee, woriya marzze malee, woy he naaꞌꞌubaappe gidduwan deꞌiyaabee? Yesuusi, “Lo77o mitta ubbai lo77o aife aifees; shin iita mitti iita aife aifees” yaagiis. (Maatiyoosa 7:17) Pornograafee ayba ayfe ayfii? Ha oyshaa zaaruwaa demmanawu, pornograafiyaa xeelliyaagan amarida waanna oyshata beꞌoos.

Pornograafee asaa waati qohii?

ERANCHCHATI YOOTIYOOBAA: Pornograafee issi urawu sohuwaara amalee gidiyo gishshawu, issi issi pilggiya asatinne aakimeti, A kokeyin giyo jallissiyaabaara geeddarssoosona.

Intternneetiyan pornograafiyaa beꞌiyoogee amale gidido Breyinib hagaadan giis: “Tana aybikka teqqana danddayibeenna. Taani jallissiyaaban donjjillida ura mala gidaas. Tana coo kokkorsseesinne huuphee zawurees. Taani agganawu baaxetaas; shin amarida layttay aadhdhinkka tawu amalee gidiis.”

Pornograafiyaa beꞌiyoogee amale gidido asati hegaa hara asi erennaadan koyoosona. Hegaa asappe qottoosonanne asaa cimmoosona. Hegeetuppe daroti boorasoosona, yeellatoosona, unꞌꞌettoosonanne yiillotoosona. Issi issitoo eti banttana woranawukka qoppoosona. Ba moobayliyan hegaa malabaa ubba galla dawunlode oottiya Sergee hagaadan giis: “Tabaa xallaa qoppiyaanne hidootaa qanxxiya asa gidaas. Tana pattenna, mooranchcha asadan xeellaas, qassi piriyan gelidabadan qoppaas. Hara asa maado oychchanawu yeellataasinne yayyaas.”

Pornograafiyaa qoppennan lemꞌꞌi ootti beꞌiyoogeekka qohana danddayees. Pornograafee qohiyoogaara gayttidaagan issi eranchchiyaa Pornograafiyaa misileti guuggiyan uttidi doganawu keehi metiyoogaa yootaasu. Pornograafe weybsaytiyaa darotoo beꞌiya, iyyo layttay 19 gidido Suzana hagaadan gaasu: “He misileta mule dogana danddayikke, qassi haꞌꞌikka he misileta hassayays. Hegaa ta qofaappe muleera xayssanawu danddayiyaaba tawu milatibeenna.”

TUMAA: Pornograafee issi ura bawu aylle oottiyaabanne keehippe qohiyaaba.—2 PHeexiroosa 2:19.

Pornograafee so asaa waati qohii?

ERANCHCHATI YOOTIYOOBAA: “Pornograafiyaa gaasuwan so asay laalettees.”—Zi Porn Trap, Wendinne Laari Moltizi giigissidoogaa.

Pornograafee aqo deꞌuwaanne so asaa qohiyoobata:

• Azinaynne machchiyaa issoy issuwaa ammanennaadan eta giddon issippetettay deꞌennaadaaninne eti siiqettennaadan oottees.—Leemiso 2:12-17.

• Pornograafee issi uri ba xallaa siiqanaadan, ba aqo laggiyawu qoppennaadaaninne A woy O dosennaadan oottees.—Efisoona 5:28, 29.

• Pornograafee qohiya mattumaa gaytettaa amoy wolqqaamanaadan oottees.—2 PHeexiroosa 2:14.

• Bessenna mattumaa gaytettaa ba aqo laggiyaara wolqqan gayttanawu paacettanaadan oottees.—Efisoona 5:3, 4.

• Qofan woy oosuwankka gidin aqo laggiyawu ammanettennaadan oottees.—Maatiyoosa 5:28.

Geeshsha Maxaafay aqo laggeti issoy issuwawu “ammanettennaageeta” gidennaadan naagettana mala zorees. (Milkkiyaasa 2:16) Wodiraa laammiyoogee aqo deꞌuwaa qohananne aqo laggeti paraman shaahettanaadan oottana danddayees. Aqo deꞌoy laalettiyoogee qassi naata qohiyaaba.

Pornograafee naatakka moorana danddayees. Qommoora abay odettido Breyini hagaadan giis: “Tawu layttay tammaa heera gidiyo wode, so giddon kaaꞌaydda ta aaway wottido pornograafe maxeeteta akeekennan demmaas. Taani he misileta ayssi dosidaakko erana xayikkokka, qosettada beꞌiyoogaa doommaas. Hegee taani gitaa gidanaashinkka aggenna amale gidiis.” Pilggidobay bessiyoogaadan, pornograafee yelagati panttatetta wodiyan mattumaa gayttanawu keehippe koyanaadan, darotuura mattumaa gayttanaadan, qassi woppaa xayanaadaaninne unꞌꞌettanaadan oottana danddayees.

TUMAA: Pornograafee aqo laggeti siiqettidi deꞌennaadan oottees, qassi azzanuwaa kaalettees.—Leemiso 6:27.

Geeshsha Maxaafay pornograafiyaabaa woygii?

XOOSSAA QAALAY YOOTIYOOBAA: “Inttenan de7iya ha sa7aa amota worite; hegeetikka shaaramuxiyoogaa, tunatettaa, shaaramuxanau koyiyoogaa, iita amuwaa, miishshaa amottiyoogaa. Miishshaa amottiyoogee eeqau goinniyoogaappe dummatenna.”—Qolasiyaasa 3:5.

Xoossaa Yihoowayc pornograafiyaa ixxees. Hegee mattumaa gaytettaa I ixxiyo gishshataassa gidenna. Mattumaa gayttiyo koshshay deꞌanaadan oottidi medhdhiday A; qassi aqo laggeti issoy issuwaa ufayssanaadan, eti siiqettanaadaaninne naata yelanaadan giidi hegaa immiis.—Yaaqooba 1:17.

Yaatin, nuuni Yihooway pornograafiyaa keehi ixxees gaana danddayiyoy aybissee? Amarida gaasota ane beꞌoos:

• Pornograafee asaa deꞌuwaa mooriyoogaa I erees.—Efisoona 4:17-19.

• I nuna siiqeesinne qohettennaadan naagana koyees.—Isiyaasa 48:17, 18.

• Yihooway aqo deꞌuwaanne so asaa iitabaappe naagana koyees.—Maatiyoosa 19:4-6.

• I nuuni kandduwan geeshsha gidanaadaaninne haratu maataa bonchchanaadan koyees.—1 Tasalonqqe 4:3-6.

• Yelettanaadan maaddiya imotaa nuuni bonchchanaadan I koyees.—Ibraawe 13:4.

• Pornograafee mattumaa gaytettaa ba xallaa siiqiyoogaa bessiya tuna ogiyan qoppiyo xalahe qofa gidiyoogaa Yihooway erees.—Doomettaabaa 6:2; Yihudaa 6, 7.

TUMAA: Pornograafee issi urawu Xoossaara dabbotay moorettanaadan oottees.—Roome 1:24.

SHin, pornograafiyaa piriyaappe kessi ekkanawu koyiyaageetuyyo Yihooway keehi qarettees. Geeshsha Maxaafay hagaadan gees: “GODAI qarettiyaagaanne maariyaagaa; i hanqqettanau eesotennaagaanne aggenna siiqoi daridoogaa. Aissi giikko, nuuni aibippe merettidaakkonne i erees; nuuni biitta gidiyoogaa i akeekees.” (Mazamure 103:8, 14) I “koshshiyo wode maaddiya maarotettaa ekkanaunne aaro kehatettaa demmanau” ashkketi bana woossanaadan koyees.—Ibraawe 4:16; “Pornograafiyaappe Laꞌꞌa Kiyiyoogaa” giya saaxiniyaa xeella.

Daroti Xoossaappe maaduwaa demmidosona. He maadoy ay keena goꞌꞌii? Iitabaa oottiyoogaa aggida amarida asatubaa Geeshsha Maxaafay woygiyaakko beꞌa: “Godaa Yesuus Kiristtoosa sunttaaninne nu Xoossaa Ayyaanan intte meecettidetanne geeyideta; qassi xillideta.” (1 Qoronttoosa 6:11) Hegaa mala asati PHawuloosaagaadan, “[I] tau immido wolqqan, ubbabaa oottanau danddayais” gaana danddayoosona.—Piliphphisiyuusa 4:13.

Pornograafiyaa amaliyaappe laꞌꞌa kiyida Suzana hagaadan gaasu: “He iita amaliyaappe issi uri laꞌꞌa kiyanaadan maaddana danddayiyay Yihoowa xalla. Izaawu A maaduwaanne kaaletuwaa demmanawu woossikko, A sinttan geeshsha gididi deꞌana danddayees. I izaawa mule aggenna.”