Pornograafee Tawu Amale Gidikko Waatoo?
Ne oottana danddayiyoobaa
Pornograafee aybakko era. Pornograafee Xoossay bonchcho gidanaadan medhdhidobaa kawushshanawu maliyoogaa. Pornograafee hegaa malaba gidiyoogaa akeekiyoogee neeni ‘iitabaa ixxanaadan’ maaddees.—Mazamure 97:10.
Hegee kaalettiyoobaa qoppa. Pornograafee misiliyan beettiyaageeta kawushshees. Hegee A beꞌiya urakka kawushshees. Geeshsha Maxaafay, “Cincca asi iitaa be7idi, qosetti aattees” giyoogee bessiyaaba.—Leemiso 22:3.
Murtta. Ammanettida asa gidida Iyyoobi, “maccaasa xeellada amottennaadan, taani ta aifiyaara maachchaa maacettaas” yaagiis. (Iyyooba 31:1) Kaallidi deꞌiyaageeti neeni ‘maachchaa maacettana’ danddayiyo amaridabata:
Tarkka deꞌiyo wode Intternneetiyaa goꞌettikke.
Taani Intternneetiyaa goꞌettishin shori baynnabay yiikko, hegaa woy he saytiyaa sohuwaara gordda aggana.
Hegaa beꞌiyo amalee zaaretti wayssikko kayma laggiyaa haasayissana.
Pornograafiyaa beꞌiyoogee keehi qohees—darotoo hegaa beꞌikko, agganawu keehi deexxees
Hegaa xeelliyaagan woossa. Mazamuraawee, “pattennabaa xeellenna mala, ta aifeta teqqa” yaagidi Yihoowa woossiis. (Mazamure 119:37) Xoossay ha baaxiyaa ne xoonanaadan koyees; qassi ne A woossikko suurebaa oottanawu wolqqaa neeyyo immana danddayees!—Piliphphisiyuusa 4:13.
Issi urawu yoota. Xuuraa yootiyo ura dooriyoogee darotoo, meeze gidida amaliyaa agganawu keehi koshshiyaabatuppe issuwaa.—Leemiso 17:17.
Hagaa hassaya: Neeni pornograafiyaa beꞌennan aggido wode ubban gita xoonuwaa xoonadasa. He xoonuwaabaa Xoossaa Yihoowawu yoota; qassi neeyyo wolqqaa immido gishshawu A galata. Neeni pornograafiyaa beꞌennan aggiyoogan Yihoowa ufayssaasa.—Leemiso 27:11.