NABBABIYAAGEETU OYSHAA

SHittoynne hegaa malabay sawiyo wode sahettiya ishatanne michota maaddanawu ay oottana danddayiyoo?

SHitto malabay sawiyo wode issi issi asay keehi sahettees. Eti galla galla asaara gayttiyo wode hegaadan sawiyaabaappe naagettanawu metootana danddayoosona. Gidikkokka, issoti issoti gubaaꞌe shiiquwaaninne gita shiiquwan shittuwaanne hegaadan sawiya harabaa goꞌettennaadan ishanttussinne michonttussi yootana danddayettiyaakkonne oychidosona.

Yihoowa Markka gidida ooninne harati shiiquwaa shiiqanawu metootanaadan oottanawu koyennaagee erettidaagaa. Nu ubbawu gubaaꞌe shiiquwaappe demmiyo minttettoy koshshees. (Ibr. 10:24, 25) Hegaa gishshawu, shittoynne hegaa malabay sawiyo wode keehi sahettiyoogee gubaaꞌe shiiquwaa shiiqennaadan diggiyo uri hegaabaa gubaaꞌe cimatuura haasayanawu koyana danddayees. SHittuwaanne hegaa malabaa goꞌettiyoogaara gayttidaagan higgiyaa kessiyoogee Geeshsha Maxaafaa qofaara maayiyaaba gidana xayikkonne, gubaaꞌe cimati issi issi ishati ay gencciiddi deꞌiyaakko shiiquwaa yiya asawu yootana danddayoosona. Cimati gubaaꞌiyaa hanotaadan hagaappe kase nu xuufetun kiyida qofaa Haggaazo SHiiquwan gubaaꞌiyawu koshshiyaabaa kifiliyan shiishshana woy hegaara gayttidabaa gubaaꞌiyawu akeekan erissana danddayoosona.a Gidikkokka, eti hegaa malabaa ubbatoo gubaaꞌiyawu erissana bessenna. Gubaaꞌiyaa shoobettidi yiya imattatinne xinaateti, he metuwaa akeekokkona; qassi nuuni hegaa mala asata mokki ekkana koyoos. Keehi peenotenna shittuwaa tiyettiyaageeti unꞌꞌettanaadan oottana bessenna.

Hegaa mala metoy deꞌiyaaba, qassi hanotay injjetiyaaba gidikko, gubaaꞌe cimati hegaadan metootiyaageeti Kawotettaa Addaraashan dumma sohuwan uttanaadan hanotaa giigissana danddayoosona. Leemisuwawu, Kawotettaa addaraashan hara kifilee deꞌikko, eti yan uttidi ezggana danddayoosona. He hanotay danddayettida ubbabaa oottinkka giigennaba, qassi issoti issoti hegaappe denddidaagan keehi sahettiyaaba gidikko, keehi harggidi woy cimidi sooppe kiyana danddayenna asawu oottiyoogaadan, hegaa mala asawukka shiiquwan tamaariyoobaa duuqqidi woy silkkiyan sissana danddayettees.

Heezzu gallassa gita shiiquwaa shiiqiyo wode ishanttinne michontti hegaara gayttidabaa loytti qoppanaadan Nu Kawotetta Haggaazoy mata wode minttettiis. Daro biittan gita shiiquwaa shiiqiyoy addaraashaana gidiyo gishshawu, shiiqiyaageeti keehi sawiya shittuwaa tiyettenna mala odettiis. Heezzu gallassaa gita shiiquwaa shiiqiyoosan shitto malabay sawenna kifilee darotoo deꞌenna gishshawu, he shiiquwaa wode naagettana bessiyoogee qoncce. SHin hagee gubaaꞌe shiiqotuura gayttidaagan odettida kaaleto gidenna; qassi ooninne hegaadan qoppana bessenna.

Nuuni ubbay laattido nagaraappe denddidaagan, ha alamiyan dumma dummaban waayettoos. Harati nuuni waayettennaadan qoppidi issi issibaa oottiyo wode keehi nashshoos! Ishantti woy michontti metootennan gubaaꞌe shiiquwaa shiiqanaadan qoppidi issoti issoti shittuwaanne hegaa malabaa tiyettennan aggiyoogee bantta goꞌꞌaa aggibayiyoogaa bessiyaaba. SHin siiqoy nuuni ufayttiiddi hegaadan oottanaadan denttettees.

PHenxxeniyaa PHilaaxoosi issi wode deꞌida asa gidiyoogaa taarikee yootii?

PHenxxeniyaa PHilaaxoosi Yesuusa bolli pirddidanne a worissida asa gidiyo gishshawu, Geeshsha Maxaafaa nabbabiya asati abaa eroosona. (Maa. 27:1, 2, 24-26) SHin a sunttay he wode xaafettida taarikiyaa xuufetunkka darosan deꞌees. Issi maxaafay yootiyoogaadan, “Yihudaa biittaa haarida Rooma biittaa asatu haratuugaappe keehi darobaanne daro sohuwan” taarikee abaa yootees.

PHilaaxoosi Yihudaa haariyo wode a gakkida heezzu metota qonccissi xaafida Ayhudatu taarikiyaa eranchaa Josefesa xuufiyan darosan PHilaaxoosa sunttay deꞌees. A gakkida oyddantto metoy qassi Ayhudatu taarikiyaa xaafiya Fayloy xaafidoban deꞌees. Rooma kawotu taarikiyaa xaafida Tasitesi, Xibaariyoosi haariyo wode, PHenxxeniyaa PHilaaxoosi Yesuusi kaqettanaadan azazidoogaa yootiis.

Biittaa bookkidi xannaꞌiya eranchati 1961n, Roomen silimaa bessiyo sohuwaa bookkidi, PHilaaxoosa sunttay xaafettido shuchaa Israaꞌeelan Qiisaariyan demmidosona. Xaafettidabay (hagan deꞌiyaagee) meqqidabaappe attidaba gidikkonne, “Yihudaa biittaa haariya Xibaariyoosa PHenxxeniyaa PHilaaxoosi (hagaa) bonchettida xoossatussi immiis” yaagiyaaba milatees. Xaafettidabay yootiyo keettay Rooma Kawuwaa Xibaariyoosa bonchuwawu keexxido beeta maqidase gidennan aggenna.

Issi michiyaa aassiya attuma asaara Geeshsha Maxaafaa xannaꞌissiyo wode huuphiyaa kammana bessii?

Isiine 15, 2002, Wochiyo Keelaa ‘Nabbabiyaageetu Oysha⁠y’ issi michiyaa aassiya attuma asaara Geeshsha Maxaafaa xannaꞌissiyo wode, i xammaqettin aggin, ba huuphiyaa kammana koshshiyoogaa yootees. SHin hegaa zaarettidi pilggido gishshawu hegaara gayttidaagan issi issibaa laammana koshshiyoogaa akeekida.

Michiyaa kasekka xannaꞌissiyo uraa aassiya attuma asaara xannaꞌꞌissiyaaba gidikko, a ba huuphiyaa kammanaagee erettidaagaa. Yaatiyoogan, a Yihooway gubaaꞌiyan giigissido aawatettaa maataa bonchiyoogaa bessawusu; ayssi giikko, a oottiyoobay attuma asi oottana bessiyooba. (1 Qor. 11:​5, 6, 10) Hara baggaara qassi, he ishay Geeshsha Maxaafaa xannaꞌissana danddayiyaagaa gidikko, i xannaꞌissanaadan shoobbana danddayawusu.

SHin, a kasekka xannaꞌissiyo uraa xammaqettibeenna aassiya attuma asaara xannaꞌissikko, qassi he ishay i azina gidana xayikko, a ba huuphiyaa kammanaadan Geeshsha Maxaafay yootenna. SHin issi issi michoti bantta zoriya wozanaappe denddidaagan hegaa mala hanotankka bantta huuphiyaa kammana danddayoosona.