Oyshaa Saaxiniyaa

◼ Issi michiyaa issi uraa a penggen Geeshsha Maxaafaa xannaꞌissiyo wode iira issi aassiyaagee deꞌikko huuphiyaa qacana koshshii?

Issi michiyaa kase xannaꞌissiyo uraa issi aassiyaagaara xannaꞌissiyo wode huuphiyaa qacana koshshees. (1 Qor. 11:3-10) Isiine 15, 2002, Wochiyo Keelay, sinttaa 27n hagaadan gees: “Hagee xannaꞌissiya uri kaseti wodiyaa keeridi tamaarissiyooba. Hegaa mala hanotan, Geeshsha Maxaafaa xannaꞌissiyoogee gubaaꞌe shiiquwaappe issuwaadan xeelettees. Issi michiyaa xammaqettida ishaara hegaa mala xinaatiyaa xannaꞌissiyo wode huuphiyaa qacana koshshees.” Xammaqettennan aassiya ishaara xannaꞌissiyo wodekka a hegaadan oottana koshshees. Xannaꞌissiyoy soona, penggeena woy harasaana gidikkokka huuphiyaa qacana koshshees.

Hara baggaara, Geeshsha Maxaafaa penggen xannaꞌissiyoogee kasetidi doommidoba gidana xayikko, michiyaa zaarettada oychiyoy Geeshsha Maxaafaa waatidi xannaꞌanaakko bessanaassa woy xannaꞌissiyo xuufetuppe issuwan deꞌiya qofaa tobbanaassa gidikkokka, aassiya issi ishaara xannaꞌissiyo wode a huuphiyaa qacana koshshenna. Darotoo penggen xannaꞌissiyo uri zaaretti zaarettidi oychin, xannaꞌiyoogaa doommiyo gishshau, aassiyaageeti hanotaa yiggidi huuphiyaa awude qacana koshshiyaakko akeekan qoppana koshshees.