‘Koshshiyo Wodiyan Giigida Qumaa’
1 Dumma shiiquwaa gallassi shiiqi simmidi, nuuni darotoo, “Hagee nuussi koshshiyaaba!” geettees. Woradaa bollaara geeddiya issi ishay, ba woradan deꞌiya issoti issoti ha laytta dumma gallassa shiiquwan beetti simmidi, kaseegaappe loytti haggaazanau koyidoogaa yootiis. Woradaa bollaara geeddiya hara ishay: “Nuuni deꞌuwan dooridobaa eqqi ekkidi qoppiyo wode, nuuni deꞌiyoy wurssetta wodiyaana gidiyoogaa loytti akeekanaadan hegee maaddiis” yaagiis. Haray qassi: “Aassiya daroti keehippe koshshiya haggaazuwan bantta xeelaa wottidaakkonne eti mintti qoppanaadan hegee akeekissiyaaba gidiyoogaa yootidosona” yaagiis. Dumma shiiquwaa gallassay nena waatidi maaddidee?
2 Ooratta haggaazo laytta prograameekka nuussi koshshiyaaba. Huuphe yohoy Mazamure 118:8, 9n baasettida, ‘Yihoowakko Baqatite’ yaagiyaagaa. SHiiqiya timirttetuppe amaridaageeti hageeta: “Meto Wodiyan Yihooway Naagettiyoosaa gidiyo Ogiyaa,” “Yihoowa Qefiyaa Garssi Baqatanaadan Harata Maaddite,” “Haratussi Geemmi Attiyooba Gidiyoogan Yihoowa Leemisuwaa Kaallite,” “Yelagatoo, Yihoowan Ammanettite!” qassi “Nu Ayyaana Gannatiyaa—Nuuni Baqati Attanau Yihooway Giigissidobaa.”
3 SHiiquwaappe Goꞌettanau: SHiiqana gallassaa eroogaappe guyyiyan, shiiquwan beettanau halchite; qassi intte xinaatetikka shiiquwan beettanaadan shoobbite. Nuuni ‘danddayan naagidi ayfanau’ siyiyoobaa wozanan wottana koshshees. (Luq. 8:15) Hegaa gishshau, shiiquwaa akeekan ezggite; qassi intte deꞌuwaaninne haggaazuwan oosuwan peeshshana koyiyoobaanne shiiquwaa waanna qofata qanttan xaafi oyqqite. SHiiquwaappe simmin, tamaaridobaa so asaara wodiyaa immidi tobbite; qassi inttenne intte soo asay hegaa oosuwan peeshshana danddayiyo issi issi ogeta qoppite.
4 Malꞌꞌiyaanne bollau goꞌꞌiya qumaadan, ha ooratta dumma shiiquwaa gallassaa prograamee kaseti mintti qoppidi siiquwan giigissidoogaa. Intte shiiquwan beettidi, haggaaziya Kiristtaaneta ayyaanaaban minttanau ‘koshshiyo wodiyan giigida qumaappe’ goꞌettanau intte oottiyoobaa Yihooway anjjo.—Maa. 24:45.
[Oyshata]
1. Ha laytta dumma shiiquwaa gallassaa prograamee nenanne harata waatidi maaddidee?
2. Ooratta haggaazo layttaa prograamiyan ay tamaaranee?
3. SHiiquwan beettiyoogan waanidi loytti goꞌettana danddayiyoo?
4. Nuuni yiya dumma shiiquwaa gallassaa yeemuwan naagana koshshiyoy aybissee?