‘Xoossaa SHenee Hano’
1. Haggaazo layttaa 2012 dumma shiiquwaa gallassaa prograamiyaa huuphe yohoy woygiyaagee, ha qofaa nuuni akeekiyoogee bessiyaaba gididoy aybissee?
1 Nuuni merettidoy Yihoowa shene gidiyo gishshataassa. (Ajj. 4:11) Yaatiyo gishshau, Xoossaa sheniyaa eridi, oosuwan peeshshennan nu deꞌuwaa halchuwaa polana danddayokko. “Nu asatettainne nu wozanai koyidobaa” oottanau woykko “asai oottanau dosiyoogaa” oottanau koyiyo koshshaara nuuni baaxetiyo gishshau, hegee metennaba gidenna. (Efi. 2:3; 1 PHe. 4:3; 2 PHe. 2:10) Xoossay maaddana xayikko, Dabloosi ‘ba koyidobau azazettana mala’ nuna gitiyan oyqqana danddayees. (2 Xim. 2:26) Haggaazo layttaa 2012 dumma shiiquwaa gallassaa prograamee, Yesuusi tamaarissido leemiso woosan heezzantto allaalle gidida, ‘Ne shenee hano’ giyaagaara moggiyaabaa oottanaadan nuna ubbaa maaddana.—Maa. 6:9, 10.
2. SHiiquwan zaaro demmiyo oyshati awugeetee?
2 Zaaruwaa Demmiya Oyshata: Prograamiyaa ezggiyo wode kaallidi deꞌiya oyshatuyyo zaaruwaa demmanau malite: Xoossaa Qaalaa siyiyoogaa keeni keehi koshshiyaabi aybee? Nuna xeelliyaagan Xoossaa shenee aybakko gujji gujji erana danddayiyoy ayba ogiyaanee? Nuuni ubba asau yootanau koyana koshshiyoy aybissee? Keehippe ufayssiya deꞌuwaa waanidi deꞌana danddayiyoo? Yelagatoo, intte Yihoowayyo ay qonccissana koshshii? Xoossaa sheniyaa poliyoogee ayba anjjo demissii? Nuuni harata minttettiyoogee keehippe eesoyiyaaba gididoy aybissee?
3. Ha ayyaanaabaa giigissuwan loytti goꞌettana danddayiyoy ayba ogiyaanee?
3 SHiiquwan beettanaunne prograamiyaa loyttidi ezgganau baaxetite. He shiiquwan Beeteele kalꞌꞌatiya woy woradaa bollaara geeddiya ishay haasayaa shiishshiya imatta gidana danddayees. Prograamee doomettanaappe kase woy wuri simmin anne ekkidaba gidikko, a keettaayiyo haasayissanau guyye gooppite. Soo simmiyo wode, ‘siyidoogaa dogennaadan’ so asaara zaarettite; qassi Xoossaa sheniyaara moggiyaabaa loyttidi oottana danddayiyo ogiyaa tobbite.—Yaaq. 1:25.
4. Xoossaa sheniyaa poliyoogaa nu deꞌuwan kaseyiyoogee keehin koshshiyoy aybissee?
4 Bantta amuwaa polanau koyiyaageetinne Yihoowa sheniyau haarettanau koyennaageeti matan xayana. (1 Yoh. 2:17) Yaatiyo gishshau, nu deꞌuwan Xoossaa sheniyaa poliyoogaa kaseyanaadan maaddanau, Yihooway bessiya wodiyan ha timirttiyaa giigissido gishshau galatoos!