Siyitenne Tamaarite
1. Awuraajjaa shiiquwan loyttidi siyanaunne tamaaranau baaxetiyoogee koshshana danddayiyoy aybissee?
1 Mata wode 2013 awuraajjaa shiiqoy doommees. Alame yuushuwan he shiiquwau koshshiya darobay giigiis. Heezzu gallassankka shiiqanau giigettadii? Gita shiiqotun qofay laalettanaadan oottiya darobay deꞌana danddayiyo gishshau, haasayaa loytti ezgganau baaxetiyoogee koshshana danddayees. Awuraajjaa shiiquwaa prograamee gubaaꞌiyaa shiiquwaappe aduqqiyo gishshau, adussa saatiyau loytti ezggana bessees. Hegaa bollikka, shiiquwau biyoogeenne harabay nuuni daafuranaadan oottana danddayees. Nuuni loyttidi siyanaunne tamaaranau aybi maaddii?—Zaa. 31:12.
2. Awuraajjaa shiiquwau nu wozanaa giigissana danddayiyoy ayba ogiyaanee?
2 SHiiqoy Doommanaappe Kase: Ubba haasayaa huuphe yohuwaanne issi haasayau issi woy naaꞌꞌu xiqisiyaa gujjin, awuraajjaa shiiquwaa prograamee www.jw.org geetettiya nu Weyb sayttiyan kiyees. Intternneetiyaa goꞌettiyaaba gidikko, hegaa kasetidi beꞌiyoogee shiiquwan tamaaranabau nu wozanaa giigissanaadan maaddees. (Izi. 7:10) So asay ubbay awuraajjaa shiiquwaa yeemotti naaganaadan, So Asaa Goynuwaa Omarssi guutta wodiyaa goꞌettidi tobbana danddayeetii?
3. Nuuni loyttidi ezgganaadan aybi maaddii?
3 SHiiquwaa Wode: Koshshiyaaba gidikko, shiiqoy doommanaappe kase sheeshshau biite. SHiiquwaa wode asi dawalin woy kiitaa xaafin intte qofay laalettennaadan woy kiitaa xaafanau paacettennaadan moobayliyaa gorddite. Moobayliyaa dooya wottana koshshikko, dawalettiyo wode haratu qofay laalettenna mala cenggurssay siyettennaadan oottite. SHiiquwaa wode hara elektiroonike miishshaa goꞌettiyaaba gidikko, haratu qofay laalettenna ogiyan goꞌettite. SHiiquwaa wode maananne uyana koshshenna. (Era. 3:1) Haasayiya ura tishshi ootti xeellite. Xiqisiyaa nabbabiyo wode kessidi kaallite. Qantta masttooshaa xaafite.
4. Naati siyananne tamaarana mala yelidaageeti maaddana danddayiyoy ayba ogiyaanee?
4 Nu naatikka siyanaadaaninne tamaaranaadan koyoos. Leemiso 29:15y, “Yedan diccida na7i ba aayyiyo kaushshees” yaagees. Yaatiyo gishshau, shiiquwaa wode naati ezggiyoogaa aggidi kaaꞌennaadan, yaa haa geennaadan woy harabaa oottennaadan so asay issippe uttiyoogee loꞌꞌo. Naati tamaariyoobaa ubbaa akeekana danddayenna keehi guutta gidikkokka, coꞌꞌu gi uttidi ezgganaadan loohissana danddayettees.
5. Tamaaridobaa zaarettiyoogee goꞌꞌiyoy aybissee, qassi nuuni hegaadan oottana danddayiyoy ayba ogiyaanee?
5 Galla Galla SHiiqoy Wuri Simmin: Qamissennan soo biite. Loytti xiskkanaadan sohuwaara ichite. Tamaaridobaa zaarettiyoogee intte dogennaadan maaddees. Yaatiyo gishshau, tamaaridobaa omarssi so asay guutta daqiiqau tobbiyoogee goꞌꞌees. Intte laggetuura quma keetta biyaaba gidikko, inttena ufayssida issi woy naaꞌꞌu qofaa masttooshaa kessidi aybissi tobbekketii? SHiiquwaappe simmin, tamaaridobaa so asay waatidi oosuwan peeshshana danddayiyaakko So Asaa Goynuwaa Omarssi amarida wodiyau tobbana danddayeeta. Kiyida ooratta xuufiyaappe amaridaagaa nabbabanaukka saaminttan saaminttan guutta wodiyaa bazzana danddayeeta.
6. SHiiquwaa biyoogaa xallay goꞌꞌii? Qonccissa.
6 Bullachaa yiida asay gibiraa meennabanne hegaappe goꞌettennaba gidikko, hegaa giigissiyoogee mela daafura. Awuraajjaa shiiquwau giigida ayyaanaabaa gibiraa xeelliyaagankka hegaadan gaana danddayettees. Loyttidi ezggiyoogaaninne tamaaridobaa oosuwan peeshshiyoogan kumetta shiiquwaappe loytti goꞌettiyaageeta gidoos.