“Asaa Taakko SHiishsha”
1. Awuraajjaa shiiqoynne daro biittaappe yiyaageeti shiiqiyo awuraajjaa shiiqoy Israaꞌeelati Gibxxeppe kiyidi daro takkennan shiiqido shiiquwaa mala gidiyoy aybiinee?
1 Israaꞌeelati Gibxxeppe kiyidi daro takkennan, eti Yihoowayyo yayyiyoogaa tamaaranaadaaninne bantta naatakka abaa tamaarissanaadan Muusee Siinaa Deriyaa matan ‘asaa shiishshanaadan’ Xoossay azaziis. (Zaa. 4:10-13) Eti hegaadan oottiyo wode keehi ufayttidoogeenne eta ammanoykka minnidoogee qoncce. Amarida aginaappe guyyiyan, Yihoowa asay appe tamaaranau daro biittaappe yiyaageeti shiiqiyo awuraajjaa shiiquwaa shiiqana. He shiiquwaappe loytti goꞌettanau nuuni ay oottana koshshii?
2. Awuraajjaa shiiquwau ‘giigettanau’ nuuni ay oottana koshshii?
2 ‘Giigettite’: Siinaa Deriyaa matan shiiqiyo gita shiiquwau Israaꞌeelati ‘giigettanaadan’ Yihooway yootiis. (Kes. 19:10, 11) Hegaadan, awuraajjaa shiiquwan issi issibaa oottanaadan maddabettidaageetu xalla gidennan, he shiiquwaa biya ubbay loytti giigettana bessees. Leemisuwau, daroti oosuwaappe piqaadiyaa oychana koshshees. Ne hanotay Nahimiyaagaa mala gidana danddayees. I Yerusalaamen dirssaa gimbbiyaa gimbbanau koyidi Kawuwaa Arxxekssiisau eessaa tigiyoogaa aggidi baanau paqqadissana koyiis; shin i hegan kawoy ufayttennan aggana danddayiyoogaa erees. Nahimee woossi simmidi ba koyiyoobaa xalidi liiqo qaalan oychiis. Oychin kawoy i baanaadan paqqadiis; oosuwau koshshiyaabay ubba au imettanaadan azaziis. (Nah. 2:1-9) Oosuwaappe piqaadiyaa ekkanau oychiyoogaa xalla gidennan, shiiquwaa sohuwaa waana baanaakko, qassi awan shemppanaakko qoppadii? Gubaaꞌe cimati maadoy koshshiyo uraa ufayttidi maaddana. Ubba wode shiiqoy doommanaappe kasetada gakkanaunne loytta ezgganau halcha.—Ibr. 2:1.
3. SHiiquwau nu wozanaa giigissanau nuna aybi maaddana danddayii?
3 Nuuni ezgganaunne tamaaranau nu wozanaa giigissiyoogankka kasetidi giigettana danddayoos. (Izi. 7:10) SHiiquwaa prograamee, qassi ubba haasayaa huuphe yohoynne he huuphe yohoy ekettido issi woy naaꞌꞌu xiqisee jw.org Weyb sayttiyan kasetidi kiyana. Awuraajjaa shiiqoy matiyo wode, So Asaa Goynuwaa omarssan hegaa tobbana danddayoos. Issi issi ishati he prograamiyaa attamidi awuraajjaa shiiquwan masttooshaa oyqqanau goꞌettoosona.
4. Yelidaageeti bantta naati awuraajjaa shiiquwaappe loytti tamaaranaadan waati maaddana danddayiyoonaa?
4 ‘Intte Naata Tamaarissite’: Israaꞌeelati Siinaa Deriyaa matan shiiqanaadan azazettido issi gaasoy, ‘bantta naata tamaarissanaadaana.’ (Zaa. 4:10) Awuraajjaa shiiqoykka yelidaageeti bantta naata tamaarissanaadan keehi maaddees. Yelidaageeti shiiquwaa wode bantta naata shiishshi oyqqidi eti loytti ezgganaadan maaddana koshshees. SHiiquwaa gallassatun omarssi omarssinne takkidi so asaa goynuwaa wode shiiquwan tamaaridobaa so asaara tobbana danddayettees.
5. Yiya awuraajjaa shiiquwaa shiiqiyoogan waani goꞌettana danddayiyoo?
5 Siinaa Deriyaa matan shiiqido dumma shiiqoy Israaꞌeelati Xoossaa dere gidiyo dumma maataa nashshanaadan maaddiis. (Zaa. 4:7, 8) Yiya awuraajjaa shiiqoykka nuuni hegaadan oottanaadan maaddanau giigiis. He heezzu gallassatun, nuuni bazzo mala gidida Seexaanaa alamiyaappe haakkidi, ayyaanaa gannatiyan minttettiya laggetuura gayttananne ayyaanaaban minettana. (Isi. 35:7-9) Yihoowa gallassay matattido gishshau, nuuni issoy issuwaa minttettanau maaddiya, ha shiiquwaa beennan attennaageeta gidoos!—Ibr. 10:24, 25.