Awuraajjaa SHiiquwaa —Ufayssan Goynniyo Wodiyaa
1. Israaꞌeeletu baalati nu wodiyaa Awuraajjaa shiiqotu mala gididoy ayba ogiyaanee?
1 Yooseefi, Mayraama, eta naatinne harati layttan layttan bonchettiya baalata bonchanau ubbatoo Yerusalaame boosona. He wodetun, etinne goynuwau biya harati bantta galla galla metuwaa qoppiyoogaa aggi bayidi, bantta deꞌuwan keehippe koshshiya ayyaanaabaa qoppoosona. He baalati Yihoowa loꞌꞌotettaabaa haasayanaunne a Higgiyaa qoppanau injje wode. Yiya Awuraajjaa shiiqoti Yihoowau ufayssan goynnanau nuussi hegaa mala injje wode.
2. Yiya awuraajjaa shiiquwau giigettanau nuuni ay oottana koshshii?
2 Giigettiyoogaa Koshshees: Yesuusantta soo asay Naazireeteppe Yerusalaame biidi simmanau 200 kilo meetiriyaa gediyan hemettana koshshiis. Yesuusa ishatinne michoti aappunakko erennaba gidikkonne, Yooseefinne Mayraama ay keena giigettananne baaxetana koshshidaakko qoppana danddayoos. Intte yiya awuraajjaa shiiquwan heezzu gallassa kumettaa beettanau koshshiyaagaadan giigettidetii? Hegau oosuwaappe shemppuwaa kiyanau woy ootissiyaagaa oychanau woy intte naꞌaa tamaarissiyaagau intte naꞌay he gallassatun timirtte keetta beennaagaa yootanau koshshana danddayees. Koshshiyaaba gidikko, hooteeliyan alggaa kasetidi oyqqidetii? Gubaaꞌiyan deꞌiya, shiiquwan beettanau maadoy koshshiyo ura intte dosan maaddana danddayeetii?—1 Yoh. 3:17, 18.
3. Israaꞌeeletu baalati minttettiya issippetettau waanidi injje wode gididonaa?
3 Minttettiya Issippetettaa: Ayhudatu baalati banttanaara goynniyaageetuura keehippe minttettiya issippetettaa medhiyo wode. Yesuusantta soo asay daro wodeppe doommidi eriyo laggetuura wodiyaa aattanau he wodiyaa laamotan naagidoogee erettidaagaa. Eti he baalaasan deꞌiya woykko Yerusalaame biyaanne yaappe simmiya, cora Ayhudatuuranne Ayhuda haymaanootiyau laamettida hara biitta asatuura laggetidoogankka ufayttidosona.
4. Nuuni issippetettay deꞌiyo nu Kiristtaane ishatettaa maabaraa nashshiyoogaa waatidi bessana danddayiyoo?
4 Ammanettida wozannaama ashkkaray xuufiyan giigissiyoogaappe, nuuni he qofaa awuraajjaa shiiquwaa biidi siyanaadan giigissiyo issi gaasoy nuuni issoy issuwaa minttettanaadaana. (Ibr. 10:24, 25) Yaatiyo gishshau, madirakiyaa liqambbaree uttana bessiyo wodiyaa erissiya muuziqay doommiyoogaa erissanaappe kase, ubba galla haratuura ufayssiya wodiyaa issippe aattanau kasetidi shiiquwaasaa gakkanau giigettite. Laaxaa saatiyan qumaa maanau shiiquwaasaappe kiyidi biyoogaappe, nu matan deꞌiyaageetuura gayttanaunne haasayanau guutta laaxaa ekkidi baanaadan nuussi minttettoy odettees. Issippetettay deꞌiyo, nu ishatettaa maabaray nuuni ubbay nashshana koshshiyo, Yihooway immido imota.—Mik. 2:12.
5. Prograamiyaappe kumetta hanotan goꞌettanaadan nuna maaddiyay aybee?
5 Tamaariyo Wode: Yesuusi naatettaappe doommidi, baalaa wodeta saluwan deꞌiya ba Aawaabaa tamaaranau goꞌettiis. (Luq. 2:41-49) SHiiquwan shiiqiya kifiletuppe nuuninne nu soo asay loyttidi goꞌettanaadan aybi maaddana danddayii? SHiiquwaa wodetun uttidosan takkite; koshshennabaa haasayoppite. Moobayle silkkee, Pejeree woy hegaa mala harabay intte qofaa gidin woy haratuugaa wora zaaranaadan paqqadoppite. Intte xeelaa haasayaa shiishshiyaagan wottidi qantta masttooshaa xaafite. Intte naatikka ezggiyoogaa akeekanau, so asay issippe uttite. Inttena ufayssida qofaa omarssan amarida wodiyaa immidi tobbite.
6. Nu maayuwaanne alleeqettiyoobaa xeelliyaagan ay akeekana koshshii?
6 Maayuwaanne Alleeqettiyoobaa: Yesuusantta soo asaanne baalaa biyaanne yaappe simmiya hara Ayhudatu maayuwaa macaraanne he macaraappe bolla baggan deꞌiya salo milatiya qacinaa beꞌidi, ogiyaara biya hara biitta zalꞌꞌanchati eta shaakki eranau metootokkona. (Qoo. 15:37-41) Kiristtaaneti dumma maayo maayennaba gidikkonne, nuuni bessiyaagaadan maayiyoogaaninne geeshshatettan erettoos. Nuuni awuraajjaa shiiquwaa biyoonne yaappe simmiyo wode, qassi shiiqoy giigido kataman deꞌiyo wode, nu hanotaa akeekan xomoosona koshshees. Nuuni prograamiyaappe simmin maayuwaa laammiyaaba gidikkonne, Yihoowa bonchissiya hanotan maayanaunne nu baajiyaa wottanau koshshees. Hegaadan oottiyoogan, nuuni Markka gidenna asatuppe dummatiyoogaa qonccissoosinne nuna beꞌiyaageetikka nu hanotan ufayttanaadan oottoos.
7. Nuuni awuraajjaa shiiquwan dosan oottiyoogaa xeelliyaagan qoppana koshshiyoy aybissee?
7 Dosan Oottiyaageeti Koshshoosona: SHiiqoy suure polettanaadan daro oosanchati koshshoosona. Intte dosan maaddana danddayeetii? (Maz. 110:3) Nuuni awuraajjaa shiiqotun oottiyoobay nu geeshsha oosuwaa shaaho; qassi nubaa loyttidi markkattees. Issi awuraajjaa shiiquwaa shiiqido sohuwaa ayssiyaagee bantta dosan he keettaa geeshshidaageetun ufayttidi hagaadan giidi xaafiis: “Taani ha sohuwan hanno gakkanau beꞌa erennabaa intte oottidoogau galatays. Yihoowa Markkati goꞌettidobaa ubbatoo kaseegaappe aaruwan geeshshidi zaariyoogan daro wodiyaappe doommidi nu dirijjitiyan loꞌꞌo sunttan hassayettiya dumma asa gidiyoogaa taani ubbatoo siyays. Inttenne intte dirijjitee hagan deꞌiya asau ha sohuwaa kaseegaappe yaa loyttideta; qassi hegaadan oottida asati nuuni hanno gakkanaassi erettido asatuppe dumma gidida, keehippe ufayssiya asata.”
8. Awuraajjaa shiiquwaa shiiqiyo kataman markkattiyo ayba injje demmana danddayiyoo?
8 Markkattiyo Injje Wodiyaa: Awuraajjaa shiiquwaa baajiyaa wottida, loꞌꞌo hanotan maayidanne alleeqettida imattata awuraajjaa shiiquwaa shiiqiyo kataman deꞌiya daroti akeekanaagee attenna. Hegee eti eranau koyanaadan oottanaunne awuraajjaa shiiquwaabaa nuuni etau yootiyo injje wode gidanau danddayees. Issi oyddu laytta naꞌay ooratta kiyida ba xuufiyaa, prograamiyaappe simmin qumaa miyo keettaa ehiidi, qumaa aattiyaarissi bessiis. Hegee naꞌaa aawaynne aayyiyaa maccaasiyo awuraajjaa shiiquwau shoobbanaadan oottiis.
9. Yesuusantta soo asay, Yihooway ayyaanaaban giigissiyoobaa nashshidoogaa leemisuwaa waatidi kaallana danddayiyoo?
9 Beni wode baalati, ayyaanaabaa qoppiya Ayhudati yeemottidi naagiyo ufayssiya wode. (Zaa. 16:15) Yesuusantta soo asay shiiquwan beettanaunne kumetta hanotan goꞌettanau, aybanne gidin ufayssan yarshshoosona. Nuunikka etaagaara issi mala hanotan nu awuraajjaa shiiqota nashshoos; he shiiqota saluwan deꞌiya nu siiqo Aawaa imotadan xeelloos. (Yaaq. 1:17) Yihoowayyo ufayssan goynniyo, layttan layttan shiiqiyo ha shiiquwau giigettanau wodee haꞌꞌa!
[Sinttaa 6 7n deꞌiya saaxiniyaa]
Awuraajjaa SHiiquwaa Hassayissuwaa
◼ Prograamiyaa Saatiyaa: Heezzu gallassatunkka prograamee maallado 3:20n doommees. Oydiyaa oyqqana danddayiyoy maallado 2:00 saatiyaana. Muuziqay doommanaagaa erissiyo wode, prograamee boncho hanotan doomettana mala nuuni ubbaykka nu sohuwan uttana koshshees. Prograamee wuriyoy Arbba gallassinne Qeeraa gallassi saateppe guyyiyan 10:55na gidishin, Woggaa gallassi saateppe guyyiyan 9:40na.
◼ Kaamiyaa Essiyoosaa: Kaamiyaa essanau deꞌiyaasay guutta gidiyo gishshau, danddayettida keenan haratuura issippe kaamiyan yaana koshshees. Qassi intte gubaaꞌee shiiqiyo awuraajjaa shiiquwan beettanau baaxetite.
◼ Uttiyoosaa Oyqqiyoogaa: Inttenaara issippe kaamiyan yiidaageetu xallaassi woykko inttenaara issippe deꞌiyaageetussi woykko intte xinaatetu xallaassi uttiyoosaa oyqqana danddayeeta.—1 Qor. 13:5.
◼ Laaxaa: Laaxaa shemppuwaa wode, laaxaa maanau shiiquwaa sohuwaappe harasaa biyoogaappe hayyanintta laaxaa ekkidi yiite. Intte oydiyaa garssan wottana danddayiyo, qumaa oyqqiyoobaa goꞌettana danddayeeta. Hegaappe gitatiya miishshanne xaaramusiyaa ehaana bessenna.
◼ Miishshaa Immiyoogaa: Nu Kawotettaa Addaraashan woy awuraajjaa shiiquwaasan, alame yuusho oosuwau dosan miishshaa immiyoogan, shiiquwaa giigissuwaa nashshiyoogaa bessana danddayoos. Awuraajjaa shiiquwan immiyo cheekkee qanxxettana bessiyoy “Yeyihowa Misikiroch” gidiyoogee qonccana bessees.
◼ Daafabaanne Qoppenna Sahuwaa: SHiiquwaa sohuwan eesuwaara akkamettanaadan oottiyaabi gakkiyaaba gidikko, koyro akkamuwaa maaduwau giday deꞌiyoogeeti hanotay ay keena deexokko beꞌanaadaaninne maaduwaa immanaadan, mokkiyaageetuppe intte matan deꞌiya uri sohuwaara shiiquwaa sohuwan deꞌiya Koyro Akkamuwaa Maaduwaa kifiliyau erissanaadan hayyanintta yootite.
◼ Caammaa: Issi uri darajaanne hegaa mala daafa gattana danddayiya sohuwan saruwan hemettana danddayissiya sima gidida ba gediyau likke gidida caammaa wottiyoogee daro loꞌꞌo.
◼ Siyanau Metootiyaageeta: Ef-em eraadooniyaa xaabiyaa goꞌettidi shiiquwaa prograamiyaa sissiyo giigissoy deꞌees. Hegaa siyanau, hayttan wottidi ezggiyoobay deꞌiyo, baatiriyan oottiya guutta eraadooniyaa ehaana koshshees.
◼ Duuqqiyo Miishshata: Cengurssaa duuqqiyoonne kaameera mala miishshati shiiquwaa sohuwan deꞌiya korinttiyaa shubuwaara woykko cenggurssa kifiliyan goꞌettiyo miishshaara gayttana bessenna; gidikkokka, hara asaa qofaa sherꞌꞌi ottenna ogiyan goꞌettana danddayettees.
◼ Qeeri Naatu Gaariyaanne Allaxxiyoosan Goꞌettiyo Oydiyaa: Qeeri naata wottidi sugiyo gaariyaanne allaxxiyoosan goꞌettiyo oydiyaa shiiqo sohuwaa ehaana bessenna. Gidoppe attin, yelidaageeti bantta miyyiyan wottana danddayiyo, naata utissiyoobaa ehaana danddayoosona.
◼ Kaallidi Maaddite Giya Qitsiyaa: Hayyanintta Kaallidi Maaddite (S-43) yaagiya qitsiyaa awuraajjaa shiiquwaa wode nuuni haggaazuwau kiyennan sabbakiyoogan demmido, koshshay deꞌiyoogeetu hanotaa kunttanau goꞌettana koshshees. Kunttido qitsiyaa Xuufe Kifiliyau woykko gubaaꞌiyaa simmiyo wode intte gubaaꞌiyaa xaafiyau immana danddayeeta.
◼ Quma Keettaa: Quma keettan loꞌꞌo eeshshaa bessiyoogan Yihoowa bonchissite. Qumaa aattida urau guutta santtimiyaa immiyoogee meeze gididaba.
◼ Kawotettaa Addaraashaa Goꞌettiyoogaa: Kawotettaa Addaraashaa asay aqiyoosa oottennaagee loꞌꞌo. Goꞌettiyoogee attennaba gidikko, Kawotettaa Addaraashay ubba wode geeshsha gidanaadan ubbau aawatettay siyettana bessees. Hiittaa denttidi maara wottana bessees; gukkidabaa sohuwaara quccana bessees; qassi woraqataanne hegaa malabaa a yegganau giigissidoban yeggana koshshees.
◼ Geeshshiyoogaa: Geeshshatettaa Kifilee geeshshiyo prograamiyaa giigissiyaaba gidikkokka, Yihooway ba asaappe koyiyo geeshshatettaa xoqqa maaraa nu ubbay kaallana danddayoos. Hegaa gishshau, shiiquwaa sohuwan woraqati woykko hegaa mala harabi saꞌan deꞌana koshshenna. Hegaa malabaa yegganau giigidaban sohuwaara yeggana koshshees; yaatiyoogee shiiqo saatiyan gidin, laaxa saatiyan nu shiiqiyo sohoy moorettennaadan oottees. Hegaadankka, nuuni uttosaappe denddidi biyo wode, nuuni uttido heeraa xeelliyoogeenne saꞌan wodhidabaa denttiyoogee bessiyaaba.
◼ Dosan Oottiyoogaa: Nuuni koshshiya oosota nu dosan oottiyaaba gidikko, awuraajjaa shiiquwan beettiyoogan daroppe ufayttana danddayoos. (Oos. 20:35) Hegaadan oottana koyiya uri Dosan Oottiyo Oosuwaa Kifiliyau yootana koshshees. Layttay 16 kumibeenna naatikka banttana yelidaageeti woy etappe issoy doorido gastta uri kaalettin loꞌꞌo oosuwaa oottana danddayoosona.