“Intte De7uwaa Eta Giddon Loitti Naagite”

1. Yiya awuraajjaa shiiquwaanne daro biittaappe yiyaageeti shiiqiyo awuraajjaa shiiquwaa wode nu eeshshaa loytti naagana koshshiyoy aybissee?

¹ Nuuni layttan layttan awuraajjaa shiiquwaa shiiqiyo wode asay nu hanotaa kaalliyo gishshau, nu eeshshay nuuni ayyo goynniyo Xoossaa bonchissiyaagaa gidana bessees. (Wog. 20:26) Nu eeshshay, nuuni maayiyoobaynne alleeqettiyoobay tumuppe Kiristtoosa kaalliyaageeta gidiyoogaa erissiyaagaa gidana koshshees. Yiya awuraajjaa shiiquwaanne daro biittaappe yiyaageeti shiiqiyo awuraajjaa shiiquwaa wode, nu ‘deꞌuwaa asaa giddon waati loytti naagana’ danddayiyoo? Qassi hegaadan oottiyoogan saluwan deꞌiya nu Aawaa waati bonchissana danddayiyoo?—1 PHe. 2:12.

2. Awuraajjaa shiiquwaa wode Kiristtaanetuppe koyettiya eeshshaa waati bessana danddayiyoo?

² Kiristtaanetuppe Koyettiya Eeshshaa Bessite: Nuuni issoy issuwaa siiqiyoogeenne ‘ammanennaageeta’ oyqqiyo ogee alamiyan meeze gididabaappe keehi dumma. (Qol. 3:10; 4:5; 2 Xim. 3:1-5) Yiillotanaadan oottiyaabay merettiyo wodekka, hooteeliyaaninne quma keettan oottiya asaa kehatettaaninne danddayan oyqqana koshshees. Issi issibaa nuuyyo oottiya asatuyyo miishshaa immiyoogankka loꞌꞌo eeshshay deꞌiyoogeeta gidiyoogaa bessana danddayoos.

3. Yelidaageetuyyo imettida zoree aybee, qassi aybissi?

³ Yelidaageeti shiiquwaa sohuwan, quma keettaaninne hooteeliyan bantta naata loytti naagana koshshees. (Lee. 29:15) Hooteele alaafe gidida issi maccaasiyaa issi azinaunne macheeyyo hagaadan gaasu: “Nuuni intte asaa keehi dosoos. Intte asaynne intte naati loꞌꞌo eeshshay deꞌiyoogeetanne pashkka. Hagan deꞌiya oosanchati ubbay inttebaa haasayoosona; saaminttan saaminttan hagan shemppiyay inttena giderkketiishsha.”

4. Awuraajjaa shiiquwaa shiiqiyo heeran maayiyoobaa xeelliyaagan nuuni ay qoppana koshshii?

⁴ Giiga Maayuwaa: Nuuni awuraajjaa shiiquwau maayiyoobay suurenne giiga gidana besseesippe attin, alamiyan meeze gididaagaa mala gidana bessenna. (1 Xim. 2:9) Hooteeliyan alggaa oyqqiyo wodenne yeddiyo wode woy shiiquwaappe kasenne shiiquwaappe simmin allaxxiyo wodekka giiga maayuwaa maayana koshshees. Yaatikko, baajiyaa wottanaunne injjetiyo wode haratuyyo markkattanau yayyokko. Nuuni yiya awuraajjaa shiiquwaa shiiqiyo wode giiga maayuwaa maayiyoogeenne loꞌꞌo eeshshay deꞌiyoogeeta gidiyoogee, suure wozanay deꞌiyoogeeti shemppo ashshiya Geeshsha Maxaafaa timirttiyaa tamaaranau koyanaadan oottiyoogaa xalla gidennan, Yihoowakka ufayssiyaaba.—Sof. 3:17.

2014 Awuraajjaa SHiiquwaa Hassayissuwaa

Prograamiyaa Saatiyaa: Karee dooyettiyoy maallado 2:00 saatiyaana. Heezzu gallassatunkka muuziqay maallado 3:20n doommees. He wode, prograamee boncho hanotan doomettana mala nuuni ubbaykka nu sohuwan uttana koshshees. Arbba gallassinne Qeeraa gallassi wurssetta mazamuriyaunne woosau eqqanay 10:55na; qassi Woggaa gallassi 9:50na.

◼ Daro Biittaappe Yiidaageeti SHiiqiyo Awuraajjaa SHiiquwaa: Issi issi biittan daro biittaappe yiidaageeti shiiqiyo awuraajjaa shiiqoy deꞌees. He biittan deꞌiya macara biiroy awuraajjaa shiiquwau shiiqiyoosan deꞌiya oydiyaa, kaamiyaa essiyoosaa, qassi hegaa heeran deꞌiya hooteeliyaa qoodaa akeekidi issi issi gubaaꞌetanne kare biittaappe amarida ishata shoobbiyoogaa hassayite. SHoobettennan he sohuwaa biyoogee asay uttiyoosaa xayanaadan oottana danddayees. Neeni maddabettido awuraajjaa shiiquwaa bana danddayennaba gidikko, daro biittaappe yiidaageeti shiiqiyo awuraajjaa shiiquwaa gidennan hara awuraajjaa shiiquwaa ba.

◼ Kaamiyaa Essiyoosaa: Kaamiyaa essiyo sohoy guutta gidiyo gishshau, danddayettida keenan haratuura issippe biyoogee loꞌꞌo. Qassi intte gubaaꞌee shiiqiyo awuraajjaa shiiquwaa shiiqanau baaxetite.

◼ Uttiyoosaa Oyqqiyoogaa:: SHiiquwaa sohuwaa karee ubba gallassi maallado dooyettiyo wode injjetiyaasan uttanau dirbboppite. Nu tumu Kiristtaane gidiyo gishshau, nu goꞌꞌaa aggibayiyoogee haratussi qoppanaadaaninne Yihoowa bonchissanau maaddees. (Yoh. 13:34, 35; 1 Qor. 13:4, 5; 1 PHe. 2:12) Uttiyoosaa oyqqana danddayiyoy inttenaara issippe kaamiyan yiidaageetussa, inttenaara issippe deꞌiyaageetussa woykko intte xinaatetussa. Issi issisan layttan sugidaageetinne abbee paccidoogeeti uttanaadan giigida sohoy deꞌees. Hegan deꞌiya oydee darenna gishshau, layttan sugidaageeta woy abbee paccidoogeeta maaddiya issi woy naaꞌꞌu ura xallay uttana danddayees.

◼ Laaxaa: Laaxaa shemppuwaa wode, qumaa maanau shiiquwaa sohuwaappe harasaa biyoogaappe hayyanintta laaxaa ekkidi biite. Intte oydiyaa garssan wottana danddayiyo, qumaa oyqqiyoobaa goꞌettana danddayeeta. Hegaappe gitatiya miishshaanne xaaramusiyaa efaana bessenna.

◼ Miishshaa Immiyoogaa: Nu Kawotettaa Addaraashan woy awuraajjaa shiiquwaasan, alame yuusho oosuwau dosan miishshaa immiyoogan, shiiquwau oosettidabaa nashshana danddayoos. CHeekkiyaa qanxxana koshshiyoy “Yeyihowa Misikiroch” dirijjitiyaassa gidiyoogaa qonccissana bessees.

◼ Xaliyaa: Intte mittiyo xalee deꞌiyaaba gidikko, awuraajjaa shiiquwaa sohuwan he xalee deꞌenna gishshau, hayyanintta ekkidi biite.

◼ Naagettana Koshshiyaabaa: Hayyanintta hallixxidi woy xubbidi qohana danddayiyaabaa oottoppite. Xoqqa caammaa wottiyoogaappe denddidaagan, layttan layttan asay qohettees. Issi uri darajaanne hegaa mala daafan yeggana danddayiya sohuwan hemettiyo wode qohettanaadan oottenna qantta, qassi ba gediyau likke gidida caammaa wottiyoogee daro loꞌꞌo.

◼ Siyanau Metootiyaageeta: Issi issi sohuwan Ef-em eraadooniyaa xaabiyaa goꞌettidi shiiquwaa prograamiyaa sissanau giigissoosona. Hegaa siyanau, hayttan wottidi ezggiyoobay deꞌiyo, baatiriyan oottiya guutta eraadooniyaa efaana koshshees.

◼ Qeeri Naatu Gaariyaanne Allaxxiyoosan Goꞌettiyo Oydiyaa: Qeeri naata wottidi sugiyo gaariyaanne allaxxiyoosan goꞌettiyo oydiyaa shiiqo sohuwaa efaana bessenna. Gidoppe attin, yelidaageeti bantta miyyiyan wottana danddayiyo, naata utissiyoobaa efaana danddayoosona.

◼ Ciishshaanne Ataakilttiyaa: Awuraajjaa shiiquwaa shiiqiyoosan deꞌiya ciishshaynne ataakilttee daafuridi dichidoba gidiyo gishshau intte naati hegaa duuttenaadan yootite.

◼ Kaallidi Maaddite Giya Qitsiyaa: Hayyanintta Kaallidi Maaddite (S-43) yaagiya qitsiyaa awuraajjaa shiiquwaa wode nuuni haggaazuwau kiyennan sabbakiyoogan demmido, koshshay deꞌiyoogeetu hanotaa kunttanau goꞌettana koshshees. Kunttido qitsiyaa Xuufe Kifiliyau woykko gubaaꞌiyaa simmiyo wode intte gubaaꞌiyaa xaafiyau immana danddayeeta.

◼ Quma Keettaa: Quma keettan loꞌꞌo eeshshaa bessiyoogan Yihoowa bonchissite. Kiristtaanetussi bessiyaagaadan maayite. Meeze gididaba gidikko, qumaa aattida urau miishshaa immite.

◼ Kawotettaa Addaraashaa Goꞌettiyoogaa: Kawotettaa Addaraashaa asay aqiyoosaa oottennaagee loꞌꞌo. Goꞌettiyoogee attennaba gidikko, Kawotettaa Addaraashaa ubba wode geeshsha oottiyo aawatettay baassa gidiyoogaa ubbaykka qoppana bessees. Hiittaa denttidi maara wottana koshshees; gukkidabaa sohuwaara quccana koshshees; qassi woraqataanne hegaa malabaa a yegganau giigissidoban yeggana koshshees.

◼ Hooteeliyaa:

Danddayettiyaaba gidikko hooteeliyan alggaa oyqqiyoogee loꞌꞌo. Intteyyo koshshiyaagaappe daro alggaa oyqqoppite; qassi aqana bessiyaagaappe daro asaa issi kifiliyan ayssoppite.
Alggaa oyqqi simmidi, eesoyiyaabi merettana xayikko laammana koshshenna; qassi laammiyo wode harati goꞌettanaadan sohuwaara yootana koshshees.—Maa. 5:37.
Intte heeran meeze gidikko, hooteeliyaa oosanchati intte borssaa tookkidi maaddiyo wode, qassi keettaa giigissiyo wode guutta miishshaa immite.
Qumaa kattiyo soho xallan kattite.
Hooteeliyaa oosanchatuura gayttidaagan ubba wode ayyaanaa ayfiyaa ayfite. Eti cora asaa mokkiyoonne moyissiyo gishshau, nuuni keha, danddayanchanne bessiyaagaadan haniyaageeta gidiyo wode nashshoosona.
Yelidaageeti bantta naata hooteeliyan, hegeekka, haattaa wadhiyo sohuwan, imattaa mokkiyo kifiliyan, ispporttiyaa oottiyo kifiliyaaninne hegaa mala hara sohuwan ubba wode naagana bessees.

◼ Geeshshiyoogaa: Geeshshatettaa Kifilee geeshshiyo prograamiyaa giigissiyaaba gidikkokka, Yihooway ba asaappe koyiyo geeshshatettaa xoqqa maaraa nu ubbay kaallana danddayoos. Hegaa gishshau, shiiquwaa sohuwan woraqati woykko hegaa mala harabi saꞌan deꞌana koshshenna. Hegaa malabaa yegganau giigidaban sohuwaara yeggana koshshees; yaatiyoogee shiiqo saatiyan gidin, laaxa saatiyan nu shiiqiyo sohoy moorettennaadan oottees. Hegaadankka, nuuni uttosaappe denddidi biyo wode, nuuni uttido heeraa xeelliyoogeenne saꞌan wodhidabaa denttiyoogee bessiyaaba.

◼ Dosan Oottiyoogaa: Dosan oottana koyiya uri shiiquwan Dosan Oottiyo Oosuwaa Kifiliyau yootana koshshees. Layttay 16 kumibeenna naatikka banttana yelidaageeti woy etappe issoy doorido gastta uri kaalettin loꞌꞌo ooso oottana danddayoosona.