Killiliyaa SHiiquwaa Hassayissuwaa
Prograamiyaa Saatiyaa: Karee dooyettiyoy maallado 2 saatiyaana. Heezzu gallassatunkka muuziqay maallado 3:20n doommees. He wode, prograamee boncho hanotan doomettana mala nuuni ubbaykka nu sohuwan uttana koshshees. SHiiqoy Arbba gallassinne Qeeraa gallassi 11 saatiyan, qassi Woggaa gallassi 10 saatiyan wurana.
‘Yettan Yihoowa Sabbite’: Beni deꞌida Xoossaa asay yettan Yihoowa sabbees; ha wodiyankka mazamuree tumu goynuwan goꞌettiyo waannabaappe issuwaa. (Maz. 28:7) Killiliyaa shiiquwaa ubba bakkay doommana haniyoogaa erissanawu muuziqay siyettees. Hegee coo muuziqa gidennan, nuuni Yihoowabaa tamaaranawunne ayyo goynnanawu giigiddaba. Hegaa gishshawu, shiiquwaa liqambbaree shiiqoy doommana haniyoogaa erissiya muuziqaa ezgganaadan shoobbiyo wode, issoy issuwaara haasayiyoogaa aggidi nashshiyoogaa bessiya hanotan uttidi ezggite. Nuuni hegaadan oottiyoogee Wachtawur orkesttiraa citati daafuridi oottidobaa xoqqu oottidi xeelliyoogaa bessees. Ha ishatinne michoti nuna ufayssiya muuziqaa giigissanawu bantta deꞌiyoosaappe layttan naaꞌꞌutoo Niyoorkke, Patrssene gakkanawu bantta miishshan boosona. SHiiqoy doommana haniyoogaa erissiya muuziqaa loytti siyi simmidi, ubbay issippe Kawotettaa mazamuriyaa yexxiyoogan Yihoowa sabbana koshshees.
Kaamiyaa Essiyoosaa: Kaamiyaa essiyo sohoy guutta gidiyo gishshawu, danddayettida keenan haratuura issippe yiyoogee loꞌꞌo. Qassi intte gubaaꞌee shiiqiyo killiliyaa shiiquwaa shiiqanawu baaxetite.
Uttiyoosaa Oyqqiyoogaa: SHiiquwaa sohuwaa karee ubba gallassi maallado dooyettiyo wode injjetiyaasan uttanawu dirbboppite. Nu tumu Kiristtaane gidiyo gishshawu, nu goꞌꞌaa aggibayiyoogee haratussi qoppanaadaaninne Yihoowa bonchissanawu maaddees. (Yoh. 13:34, 35; 1 Qor. 13:4, 5; 1 PHe. 2:12) Uttiyoosaa oyqqana danddayiyoy inttenaara issippe kaamiyan yiidaageetussa, inttenaara issippe deꞌiyaageetussa woykko intte xinaatetussa. Issi issisan layttan sugidaageetinne abbee paccidoogeeti uttanaadan giigida sohoy deꞌees. Hegan deꞌiya oydee darenna gishshawu, layttan sugidaageeta woy abbee paccidoogeeta maaddiya issi woy naaꞌꞌu ura xallay uttana danddayees.
Giiga Maayuwaa: Nuuni killiliyaa shiiquwawu maayiyoobay suurenne giiga gidana besseesippe attin, alamiyan meeze gididaagaa mala gidana bessenna. (1 Xim. 2:9) Hooteeliyan alggaa oyqqiyo wodenne aggidi biyo wode woy shiiquwaappe kasenne shiiquwaappe simmin allaxxiyo wodekka giiga maayuwaa maayana koshshees. Yaatikko, baajiyaa wottanawunne injjetiyo wode haratuyyo markkattanawu yayyokko. Nuuni yiya killiliyaa shiiquwaa shiiqiyo wode giiga maayuwaa maayiyoogeenne loꞌꞌo eeshshay deꞌiyoogeeta gidiyoogee, suure wozanay deꞌiyoogeeti shemppo ashshiya Geeshsha Maxaafaa timirttiyaa tamaaranawu koyanaadan oottiyoogaa xalla gidennan, Yihoowakka ufayssiyaaba.—Sof. 3:17.
Elektiroonike Miishshaa Goꞌettiyo Wode Loꞌꞌo Eeshshaa Bessite: SHiiquwaa wode elektiroonike miishshata asay shiiquwaa suure kaalliyoogaa diggenna ogiyan goꞌettiyoogan asawu qoppiyoogaa bessoos. Nuuni kaameeraa, tableetiyaa woy hegaa mala harabaa goꞌettiyaaba gidikko, haratu qofay shaahettanaadan oottenna ogiyan woy eta genttenna ogiyan goꞌettiyoogan etawu qoppiyoogaa bessana koyoos. SHiiquwaa wode moobayliyaa kiitaa woy iimeyliyaa xaafennan aggiyoogan loꞌꞌo eeshshay deꞌiyoogeeta gidiyoogaa bessoos.
Laaxaa: Laaxaa shemppuwaa wode, qumaa maanawu shiiquwaa sohuwaappe harasaa biyoogaappe hayyanintta laaxaa ekkidi biite. Intte oydiyaa garssan wottana danddayiyo, qumaa oyqqiyoobaa goꞌettana danddayeeta. Hegaappe gitatiya miishshaanne xaaramusiyaa efaana bessenna.
Miishshaa Immiyoogaa: Nu Kawotettaa Addaraashan woy killiliyaa shiiquwaasan, kumetta saꞌan oottiyo oosuwawu dosan miishshaa immiyoogan, shiiquwawu oosettidabaa nashshana danddayoos. CHeekkiyaa qanxxana koshshiyoy “Yeyihowa Misikiroch” dirijjitiyaassa gidiyoogaa qonccissana bessees.
Xaliyaa: Intte mittiyo xalee deꞌiyaaba gidikko, killiliyaa shiiquwaa sohuwan he xalee deꞌenna gishshawu, hayyanintta ekkidi biite.
Naagettana Koshshiyaabaa: Hayyanintta hallixxidi woy xubbidi qohana danddayiyaabaa oottoppite. Xoqqa caammaa wottiyoogaappe denddidaagan, layttan layttan asay qohettees. Issi uri darajaanne hegaa mala daafan yeggana danddayiya sohuwan hemettiyo wode qohettanaadan oottenna qantta, qassi ba gediyawu likke gidida caammaa wottiyoogee daro loꞌꞌo.
◼ Siyanawu Metootiyaageeta: Issi issi sohuwan Ef-em eraadooniyaa xaabiyaa goꞌettidi shiiquwaa prograamiyaa sissanawu giigissoosona. Hegaa siyanawu, hayttan wottidi ezggiyoobay deꞌiyo, baatiriyan oottiya guutta eraadooniyaa efaana koshshees.
Qeeri Naatu Gaariyaanne Allaxxiyoosan Goꞌettiyo Oydiyaa: Qeeri naata wottidi sugiyo gaariyaanne allaxxiyoosan goꞌettiyo oydiyaa shiiqo sohuwaa efaana bessenna. Gidoppe attin, yelidaageeti bantta miyyiyan wottana danddayiyo, naata utissiyoobaa efaana danddayoosona.
Ciishshaanne Ataakilttiyaa: Killiliyaa shiiquwaa shiiqiyoosan deꞌiya ciishshaynne ataakilttee daafuridi dichidoba gidiyo gishshawu intte naati hegaa duuttenaadan yootite.
Kaallidi Maaddite (S-43) Giyo Qitsiyaa: Hayyanintta Kaallidi Maaddite giyo qitsiyaa killiliyaa shiiquwaa wode nuuni haggaazuwawu kiyennan sabbakiyoogan demmido, koshshay deꞌiyoogeetu hanotaa kunttanawu goꞌettana koshshees. Kunttido qitsiyaa Xuufe Kifiliyawu woykko gubaaꞌiyaa simmiyo wode intte gubaaꞌiyaa xaafiyawu immana danddayeeta.
Quma Keettaa: Quma keettan loꞌꞌo eeshshaa bessiyoogan Yihoowa bonchissite. Kiristtaanetussi bessiyaagaadan maayite. Meeze gididaba gidikko, qumaa aattida urawu miishshaa immite.
Kawotettaa Addaraashaa Goꞌettiyoogaa: Kawotettaa Addaraashaa asay aqiyoosaa oottennaagee loꞌꞌo. Goꞌettiyoogee attennaba gidikko, Kawotettaa Addaraashaa ubba wode geeshsha oottiyo aawatettay baassa gidiyoogaa ubbaykka qoppana bessees. Hiittaa denttidi maara wottana koshshees; gukkidabaa sohuwaara quccana koshshees; qassi woraqataanne hegaa malabaa a yegganawu giigissidoban yeggana koshshees.
Hooteeliyaa:
Intteyyo koshshiyaagaappe daro alggaa oyqqoppite; qassi aqana bessiyaagaappe daro asaa issi kifiliyan ayssoppite.
Alggaa oyqqi simmidi, eesoyiyaabi merettana xayikko laammana koshshenna; qassi laammiyo wode harati goꞌettanaadan sohuwaara yootana koshshees.—Maa. 5:37.
Intte heeran meeze gidikko, hooteeliyaa oosanchati intte borssaa tookkidi maaddiyo wode, qassi keettaa giigissiyo wode guutta miishshaa immite.
Qumaa kattiyo soho xallan kattite.
Hooteeliyaa oosanchatuura gayttidaagan ubba wode ayyaanaa ayfiyaa ayfite. Eti cora asaa mokkiyoonne moyissiyo gishshawu, nuuni keha, danddayanchanne bessiyaagaadan haniyaageeta gidiyo wode nashshoosona.
Yelidaageeti bantta naata hooteeliyan, hegeekka, haattaa wadhiyo sohuwan, imattaa mokkiyo kifiliyan, ispporttiyaa oottiyo kifiliyaaninne hegaa mala hara sohuwan ubba wode naagana bessees.
Geeshshiyoogaa: Geeshshatettaa Kifilee geeshshiyo prograamiyaa giigissiyaaba gidikkokka, Yihooway ba asaappe koyiyo geeshshatettaa xoqqa maaraa nu ubbay kaallana danddayoos. Hegaa gishshawu, shiiquwaa sohuwan woraqati woykko hegaa mala harabi saꞌan deꞌana koshshenna. Hegaa malabaa yegganawu giigidaban sohuwaara yeggana koshshees; yaatiyoogee shiiqo saatiyan gidin, laaxa saatiyan nu shiiqiyo sohoy moorettennaadan oottees. Hegaadankka, nuuni uttosaappe denddidi biyo wode, nuuni uttido heeraa xeelliyoogeenne saꞌan wodhidabaa denttiyoogee bessiyaaba.
Dosan Oottiyoogaa: Dosan oottana koyiya uri shiiquwan Dosan Oottiyo Oosuwaa Kifiliyawu yootana koshshees. Layttay 16 kumibeenna naatikka banttana yelidaageeti woy etappe issoy doorido gastta uri kaalettin loꞌꞌo ooso oottana danddayoosona.