Xoossaa Bonchissiya Eeshshaa

1. Yihoowa Markkati awuraajjaa shiiquwaa shiiqiyo wode asay sohuwaara eriyoy aybissee?

¹ Nuuni awuraajjaa shiiquwaa shiiqiyo wode asay sohuwaara erees. Daro katamatun, Yihoowa Markkati shiiqana haniyoogee televizhiiniyaanne gaazeexaa malabatun odettees. Hooteeletuuninne quma keettatun awuraajjaa shiiquwaa yiidaageeti darotoo goꞌettoosona; qassi shiiqiyo heeran deꞌiya asay baajiyaa wottida darota beꞌees. Hagaappe kaallidi deꞌiya amarida hassayissoti, nuuni awuraajjaa shiiquwaa shiiqiyo kataman loꞌꞌo eeshshan Xoossaa bonchissanau maaddoosona.—1 PHe. 2:12.

2. Awuraajjaa shiiquwaa shiiqiyo kataman takkiyo wode nu giiga maayoy Xoossaa bonchissana danddayiyoy ayba ogiyaanee?

² Giiga Maayuwaa: Nuuni shiiquwaa shiiqiyo wode giiga maayuwaa maayiyoogee darotoo asay omoodettanaadan oottees. SHin hara wodetun, giishin hooteeliyan alggaa oyqqiyo wode, quma keettan miyo wode, issi issibaa shammiyo wodenne harabaa oottiyo wode, nuuni maayiyo maayoy asay nuna bonchanaadan woy bonchennaadan oottana danddayees. Nuuni ha wodetun shiiquwaa maayuwaa maayennaba gidikkokka, giiga, bonchissiyaanne suure maayuwaa maayana koshshees. Asay nu giddooninne haratu giddon deꞌiya dummatettaa shaakki erana koshshees. (Roo. 12:2) Qassi, nuuni baajiyaa wottiyoogee shiiquwaa erissanau, haratussi markkattanaunne shiiquwau yiidaageeti nuna shaakki eranaadan maaddiyo gishshau, wottana koshshees.

3. Danddayanchanne bonchiyaageeta gidiyoogaa ayba ogiyan bessana danddayiyoo?

³ Danddayaanne Bonchuwaa: Alamiyan daroti banttana siiqiyaageetanne galatennaageeta gidido ha wodiyan, hooteeliyaa oosanchatanne harata danddayaaninne bonchuwan oyqqiyoogee eta keehi ufayssiyaaba! (2 Xim. 3:1-5) Uttiyoosaa oyqqiyo wode woy kiyida ooratta xuufiyaa ekkanau salppiyo wode, nuna goꞌꞌiyaabaappe aattidi harata goꞌꞌiyaabaa qoppana koshshees. (1 Qor. 10:23, 24) Awuraajjaa shiiquwaa koyro shiiqida issi bitanee, “Taani he gallassi shiiqida haasayaa hassayikke; shin Yihoowa Markkatu eeshshay taani awudenne dogennaba” yaagiis.

4. Nuuni danddayiyaaba gidikko, awuraajjaa shiiquwan nu dosan oottanau qoppana koshshiyoy aybissee?

⁴ Dosan Oottiyoogaa: Tumu Kiristtaaneti dosan oottiyoogan erettoosona. (Maz. 110:3) Intte awuraajjaa shiiquwan intte dosan oottanee? Issi awuraajjaa shiiquwan, 600 gidiya ishatinne michoti shiiquwaappe kase he sohuwaa bantta dosan geeshshidosona. He hanotan garamettida asati, “Nuuni hagaa mala maalaaliyaaba beꞌi erokko! Ha ubba asay ba dosan oottees giidi qoppiyoogee metiyaaba” yaagidosona. Nuuni 2013 awuraajjaa shiiquwaa yeemotti naagoos; qassi he wode Xoossaappe siyiyoogaanne tamaariyoogaa xalla gidennan, a bonchissana danddayoos.

[Sinttaa 3-6n diya saaxiniyaa]

2013 Awuraajjaa SHiiquwaa Hassayissuwaa

◼ Prograamiyaa Saatiyaa: Karee dooyettiyoy maallado 2:00 saatiyaana. Heezzu gallassatunkka muuziqay maallado 3:20n doommees. He wode, prograamee boncho hanotan doomettana mala nuuni ubbaykka nu sohuwan uttana koshshees. Arbba gallassinne Qeeraa gallassi wurssetta mazamuriyaunne woosau eqqanay 10:50na; qassi Woggaa gallassi 9:35na.

◼ Kaamiyaa Essiyoosaa: Kaamiyaa essiyo sohoy guutta gidiyo gishshau, danddayettida keenan haratuura issippe yiyoogee loꞌꞌo. Qassi intte gubaaꞌee shiiqiyo awuraajjaa shiiquwaa shiiqanau baaxetite.

◼ Uttiyoosaa Oyqqiyoogaa: Uttiyoosaa oyqqana danddayiyoy inttenaara issippe kaamiyan yiidaageetussa, inttenaara issippe deꞌiyaageetussa woykko intte xinaatetussa.—1 Qor. 13:5.

◼ Laaxaa: Laaxaa shemppuwaa wode, qumaa maanau shiiquwaa sohuwaappe harasaa biyoogaappe hayyanintta laaxaa ekkidi yiite. Intte oydiyaa garssan wottana danddayiyo, qumaa oyqqiyoobaa goꞌettana danddayeeta. Hegaappe gitatiya miishshaanne xaaramusiyaa ehaana bessenna.

◼ Miishshaa Immiyoogaa: Nu Kawotettaa Addaraashan woy awuraajjaa shiiquwaasan, alame yuusho oosuwau dosan miishshaa immiyoogan, shiiquwau oosettidabaa nashshana danddayoos. CHeekkee qanxxettana bessiyoy “Yeyihowa Misikiroch” dirijjitiyau gidiyoogaa qonccissana bessees.

◼ Xaliyaa: Intte mittiyo xalee deꞌiyaaba gidikko, awuraajjaa shiiquwaa sohuwan he xalee deꞌenna gishshau, hayyanintta ekkidi yiite.

◼ Caammaa: Darotoo xoqqa caammaara gayttidaagan, layttan layttan asay qohettees. Issi uri darajaanne hegaa mala daafa gattana danddayiya sohuwan saruwan hemettana danddayissiya qantta, qassi ba gediyau likke gidida caammaa wottiyoogee daro loꞌꞌo.

◼ Siyanau Metootiyaageeta: Issi issi sohuwan Ef-em eraadooniyaa xaabiyaa goꞌettidi shiiquwaa prograamiyaa sissiyo giigissoy deꞌees. Hegaa siyanau, hayttan wottidi ezggiyoobay deꞌiyo, baatiriyan oottiya guutta eraadooniyaa ehaana koshshees.

◼ Qeeri Naatu Gaariyaanne Allaxxiyoosan Goꞌettiyo Oydiyaa: Qeeri naata wottidi sugiyo gaariyaanne allaxxiyoosan goꞌettiyo oydiyaa shiiqo sohuwaa ehaana bessenna. Gidoppe attin, yelidaageeti bantta miyyiyan wottana danddayiyo, naata utissiyoobaa ehaana danddayoosona.

◼ Kaallidi Maaddite Giya Qitsiyaa: Hayyanintta Kaallidi Maaddite (S-43) yaagiya qitsiyaa awuraajjaa shiiquwaa wode nuuni haggaazuwau kiyennan sabbakiyoogan demmido, koshshay deꞌiyoogeetu hanotaa kunttanau goꞌettana koshshees. Kunttido qitsiyaa Xuufe Kifiliyau woykko gubaaꞌiyaa simmiyo wode intte gubaaꞌiyaa xaafiyau immana danddayeeta.

◼ Quma Keettaa: Quma keettan loꞌꞌo eeshshaa bessiyoogan Yihoowa bonchissite. Kiristtaanetussi bessiyaagaadan maayite. Meeze gididaba gidikko, qumaa aattida urau guutta miishshaa immite.

◼ Kawotettaa Addaraashaa Goꞌettiyoogaa: Kawotettaa Addaraashaa asay aqiyoosaa oottennaagee loꞌꞌo. Goꞌettiyoogee attennaba gidikko, Kawotettaa Addaraashay ubba wode geeshsha gidanaadan ubbau aawatettay siyettana bessees. Hiittaa denttidi maara wottana koshshees; gukkidabaa sohuwaara quccana koshshees; qassi woraqataanne hegaa malabaa a yegganau giigissidoban yeggana koshshees.

◼ Hooteeliyaa:

(1) Danddayettiyaaba gidikko hooteeliyaa oyqqiyoogee loꞌꞌo. Intteyyo koshshiyaagaappe daro alggaa oyqqoppite; qassi aqana bessiyaagaappe daro asaa issi kifiliyan ayssoppite.

(2) Alggaa oyqqi simmidi, unꞌꞌissiyaabay gakkana xayikko laammana koshshenna; qassi laammiyo wode harati goꞌettanaadan sohuwaara yootana koshshees.—Maa. 5:37.

(3) Intte heeran meeze gidikko, hooteeliyaa oosanchati intte borssaa tookkidi maaddiyo wode, qassi keettaa giigissiyo wode guutta miishshaa immite.

(4) Qumaa kattiyo soho xallan kattite.

(5) Hooteeliyaa oosanchatuura gayttidaagan ubba wode ayyaanaa ayfiyaa ayfite. Eti cora asaa mokkiyoonne moyissiyo gishshau, nuuni keha, danddayanchanne bessiyaagaadan haniyaageeta gidiyo wode nashshoosona.

(6) Yelidaageeti bantta naata hooteeliyan, giishin haattaa wadhiyo sohuwan, imattaa mokkiyo kifiliyan, ispporttiyaa oottiyo kifiliyaaninne hegaa mala hara sohuwan ubba wode naagana bessees.

◼ Geeshshiyoogaa: Geeshshatettaa Kifilee geeshshiyo prograamiyaa giigissiyaaba gidikkokka, Yihooway ba asaappe koyiyo geeshshatettaa xoqqa maaraa nu ubbay kaallana danddayoos. Hegaa gishshau, shiiquwaa sohuwan woraqati woykko hegaa mala harabi saꞌan deꞌana koshshenna. Hegaa malabaa yegganau giigidaban sohuwaara yeggana koshshees; yaatiyoogee shiiqo saatiyan gidin, laaxa saatiyan nu shiiqiyo sohoy moorettennaadan oottees. Hegaadankka, nuuni uttosaappe denddidi biyo wode, nuuni uttido heeraa xeelliyoogeenne saꞌan wodhidabaa denttiyoogee bessiyaaba.

◼ Dosan Oottiyoogaa: Dosan oottana koyiya uri shiiquwan Dosan Oottiyo Oosuwaa Kifiliyau yootana koshshees. Layttay 16 kumibeenna naatikka banttana yelidaageeti woy etappe issoy doorido gastta uri kaalettin loꞌꞌo ooso oottana danddayoosona.