Awuraajjaa SHiiqoy Tumaa Loyttidi Markkattanau Maaddees
1. Israaꞌeelati layttan bonchiyo baalatu wode wotti denttidi qoppiyoonne haasayiyo, xoqqu ootti xeelliyo ayyaanaabaa tumay aybee?
1 Beni Israaꞌeelati layttan heezzutoo baalaa bonchanau shiiqoosona. SHiiqana bessiyay attumaageetu xalla gidikkonne, darotoo so asay kumettay he ufayssiya shiiquwau Yerusalaame bees. (Zaa. 16:15, 16) Xoqqu ootti xeelliyo ayyaanaabaa tumaa wotti denttidi qoppanaunne haasayanau he shiiqoy maaddees. He tumaappe amaridaagee aybee aybee? Hegaappe issoy, Yihooway kehaanne siiquwan Immiyaagaa gidiyoogaa qonccissiyaagaa. (Zaa. 15:4, 5) Haray qassi, i kaalettiyaagaanne naagiyaagaa gidiyoogan ammanettana danddayiyoogaa qonccissiyaagaa. (Zaa. 32:9, 10) Israaꞌeelati Yihoowa sunttan xeegettiyaageeta gidiyo gishshau, eti Xoossaa ogee xillo gidiyoogaa bantta deꞌuwan qonccissana koshshiyoogaakka wotti denttidi qoppana danddayoosona. (Zaa. 7:6, 11) Ha wodiyan layttan shiiqiyo awuraajjaa shiiqoy nuna hegaadan maaddees.
2. Awuraajjaa shiiqoy tumaa loyttidi akeekanaadan maaddiyoy ayba ogiyaanee?
2 Ha SHiiqoy Tumaa Loytti Akeekanau Maaddees: Awuraajjaa shiiquwaa haasayay, diraamay, ootti-besoynne oysha-zaaroy Geeshsha Maxaafaa tumaa loyttidi akeekanaunne oosuwan peeshshanau maaddiyo gishshau ufayttoos. (Yoh. 17:17) Sinttaara yiya awuraajjaa shiiquwau hanno gakkanau darobay oosettiis. Yihoowa dirijjitee alame yuushuwan deꞌiya ishanttussi ha wodiyan koshshiyaabaa giigissiiddi deꞌees. (Maa. 24:45-47) He shiiquwan shiiqiyaabaa beꞌanaunne siyanau yeemottay?
3. Nuuni ha shiiquwaappe goꞌettanau ay oottana koshshii?
3 Nuuni awuraajjaa shiiquwaa biidi heezzu gallassi loyttidi kaalliyaaba gidikko, keehi goꞌettana. Piqaadiyaa immanaadan nena ootissiyaagaayyo hanno gakkanau yootabeennabaa gidikko, yoota. SHiiquwaa loyttada ezggana mala ubba gallassi loytta shemppanau halcha. Haasayaa shiishshiyaagaa xeelliyoogeenne masttooshaa xaafiyoogee loyttidi kaallanaadan maaddiyoogaa daroti akeekidosona. Moobayleenne hegaa mala harabay neeninne harati kaalliyoogaa diggenna mala naagetta. SHiiquwaa wode haasayiyoogee, silkkiyan kiitaa kiittiyoogee woy qumaa miyoogee bessiyaaba gidenna.
4. Awuraajjaa shiiquwaappe goꞌettanaadan yelidaageeti bantta naata waati maaddana danddayiyoonaa?
4 Sambbata layttan, Israaꞌeelati Daase Baalaa wode Higgee nabbabettishin siyanau issippe shiiqiyo wode ‘siyidi tamaarana mala bantta naatakka’ ekkidi yoosona. (Zaa. 31:12) Awuraajjaa shiiquwan issippe uttida so asaa, qassi etaara issippe loytti ezggiya naata beꞌiyoogee ayba ufayssii! Awuraajjaa shiiquwaa wode omarssan omarssan, intte masttooshaa beꞌidi inttena ufayssida kifiliyaabaa haasayiyoogee keehi loꞌꞌo. “Na7a wozanaa azallatettai baqqi” oyqqiyo gishshau, laaxa saatiyaaninne aqiyo sohotun yelidaageeti yelaga naata gujjin, bantta naata ‘yeddi’ bessiyoogaappe loytti kaallana bessees.—Lee. 22:15; 29:15.
5. Nu loꞌꞌo eeshshay, nuuni aqiyo sohuwan tumaa galatissiyoy ayba ogiyaanee?
5 Nu Loꞌꞌo Eeshshay Tumaa Galatissees: Awuraajjaa shiiquwau shiiqiyo kataman takkiyo wodetun nu loꞌꞌo eeshshay tumaa galatissees. (Tii. 2:10) Hooteeliyaa dambbiyaa kaalliyaanne yan oottiyaageeta danddayaaninne kehatettan oyqqiyaageeta hooteeliyaa oosanchati akeekoosona. (Qol. 4:6) Issi alaafiyaa hagaadan gaasu: “Intte asati keehi loꞌꞌo asa gidiyo gishshau, eti nu hooteeliyan shemppanau yiyo wode daro ufayttoos. Eti maaray mankkay deꞌiyo keha asa; qassi nu oosanchatanne nu hooteeliyaa maara oyqqoosona.”
6. Awuraajjaa shiiquwaa shiiqiyo kataman takkiyo wode nuuni maayiyo hanotan tumaa waati galatissana danddayiyoo?
6 Baajiyaa wottiyoogee awuraajjaa shiiquwaa erissiyaabanne shiiquwan deꞌiyaageeti nuna eranaadan oottiyaaba xalla gidennan, haratuyyo markkattanaadankka maaddiyaaba. Awuraajjaa shiiquwaa shiiqiyo kataman deꞌiya asay, shori baynnanne asho gaytotettau denttettiya maayuwaa maayiya alamiyaa asaagaappe dumma ogiyan, baajiyaa wottida asay bessiyaagaadan maara maayuwaa maayiyoogaa akeekoosona. (1 Xim. 2:9, 10) Yaatiyo gishshau, awuraajjaa shiiquwaa shiiqiyo kataman takkiyo wode, maayiyoonne alleeqettiyo hanotaara gayttidaagan nuuni naagettana koshshees. Awuraajjaa shiiquwaa isttadeeme mala sohotun shiiqiyo wodekka bonchissiya maayuwaa maayana koshshees. SHiiquwaappe simmin qumaa maanaayyo hooteeliyaa baanau maayuwaa laammiyo wode, nuuni awuraajjaa shiiquwau yiida asa gidiyoogaa dogana bessenna gishshau, he hanotau haniya maara maayuwaa maayana koshshees.
7. Awuraajjaa shiiquwaa wode Kiristtaane issippetettan ufayttiyo issi ogee aybee?
7 Israaꞌeelati baalaa bonchanau shiiqiyo wode, dumma dumma biittaappe yiidaageeti, banttaagaadan Yihoowayyo goynniya asatuura gayttidi issoy issuwaa minttettiyoogan ufayttoosona; hegee eta giddon issippetettay deꞌanaadan oottiis. (Oos. 2:1, 5) Awuraajjaa shiiquwan Kiristtaanetu giddon deꞌiya dumma gidida siiqoy keehi qonccidi beettees. Ayyaana gannatiyaara gayttida ha ufayssiya hanotan, shiiquwaa yiya harati darotoo garamettoosona. (Maz. 133:1) Laaxaa wode qumaa shammanau shiiquwaa sohuwaappe kare biyoogaappe, guutta laaxaa ekki biyoogee keehi loꞌꞌo; yaatiyoogee nu matan uttida ishanttuuranne michonttuura haasayanau maaddees.
8. Nuuni danddayiyaaba gidikko, awuraajjaa shiiquwan oottiyooban maaddanaadan denttettiyaabay aybee?
8 SHiiquwaa yiidaageeti, shiiqoy maaran mankkan polettiyoogaa, ubba qassi he ubba oosuwaa asay ba dosan oottiyoogaa akeekiyo wode garamettoosona. Awuraajjan ne dosan ‘eeno gaada’ oottana danddayay? (Maz. 110:3) So asay bantta naati harata darotoo bantta dosan maaddana mala loohissoosona. Neeni dungguuxa gidikko, awuraajjaa shiiquwan oottiyoogee haratuura gayttanau keehi loꞌꞌo. Issi michiyaa hagaadan gaasu: “Ta soo asaappenne amarida laggetuppe attin, he sohuwan deꞌiya darota erikke. SHin geeshshatettaa naagiyo oosuwan maaddiyo wode, daro ishatuuranne michotuura gayttaas! Hegee keehi ufayssiyaaba!” Awuraajjaa shiiquwan oottiyoogan haratuura laggetiyoogee keehi ufayssees. (2 Qor. 6:12, 13) Hanno gakkanau awuraajjaa shiiquwan oottiyoogan maadda erennaba gidikko, maaddanau neeppe koyettiyaabi aybakko cimata oycha.
9. Hara asaa ha awuraajjaa shiiquwau waatidi shoobbana danddayiyoo?
9 Harati Tumaa Siyanaadan SHoobbite: Awuraajjaa shiiquwaa doommanaappe heezzu saaminttaa kasetidi, hara asay shiiquwaa yaanaadan, zillayttaagaadan zamachan shoobbana. Ishantti banttau danddayettida keenaa shoobiyaa woraqataa bantta gubaaꞌiyaa moottaa gattoosona. (“SHoobiyaa Woraqataa Asau Waatidi Immanee?” giya saaxiniyaa xeella) Asau immishin palahida shoobiyaa woraqataa awuraajjaa shiiquwaa ekkidi baana koshshees. SHiiquwaa yiida asay he shoobiyaa woraqataa haggaazuwau kiyennan markkattanau goꞌettana danddayees.
10. Nuuni zamachan shoobbiyo asay shiiquwaa baana danddayiyoogaa bessiya temokruwaa yoota.
10 Awuraajjaa shiiquwau zamachan asaa shoobbiyo wode asay he shoobiyaa ekkanee? Issi awuraajjaa shiiquwan mokkiyaagee issi azinaanne a machiyo uttiyoosaa bessiyoogan maaddiis. Eti shoobiyaa woraqataa ekkidi, shiiquwan “ufayssiyaabay deꞌana giidi qoppidoogaa” ayyo yootidosona. Eti 300 kilo meetireppe dariya sohuwaappe kaamiyaa laaggidi shiiquwaa yiidosona. Qassi hara michiyaa sooppe soo baada haggaazaydda awuraajjaa shiiquwaabaa eranau koyiya bitaniyau shoobiyaa woraqataa immaasu. Yaatiyo gishshau, shoobiyaa woraqatan deꞌiya issi issibaa au gujjada yootaasu. Amarida gallassaappe guyyiyan, he michiyaa awuraajjaa shiiquwan he bitaneenne a laggee awuraajjaa shiiquwan kiyida ooratta xuufiyaa oyqqidaageeta beꞌaasu!
11. Nuuni awuraajjaa shiiquwaa shiiqiyoogee keehi koshshiyaaba gididoy aybissee?
11 Israaꞌeelati bonchiyo baalati eti “tumu wozanaappe ammanettidi” Yihoowayyo goynnanaadan maaddanau i siiquwan giigissidoba. (Yaas. 24:14) Hegaadan, nuuni awuraajjaa shiiquwaa shiiqiyoogee ‘tumatettan deꞌanaadan’ maaddiyaabanne nu goynuwan keehi koshshiyaaba. (3 Yoh. 3) Tumaa siiqiya ubbati he shiiquwaa shiiqanau oottiyoobaa Yihooway anjjanaadaaninne eti he shiiquwan keehi goꞌettanaadan amottoos!
[Sinttaa 4n deꞌiyaagaa]
Awuraajjaa shiiquwau shiiqiyo kataman takkiyo wodetun nu loꞌꞌo eeshshay tumaa galatissees
[Sinttaa 5n deꞌiyaagaa]
Awuraajjaa shiiquwaa doommanaappe heezzu saaminttaa kasetidi, hara asay shiiquwaa yaanaadan zamachan shoobbana
2012 Awuraajjaa Shiiquwaa Hassayissuwaa
◼ Prograamiyaa Saatiyaa: Heezzu gallassatunkka prograamee maallado 3:20n doommees. Oydiyaa oyqqana danddayiyoy maallado 2:00 saatiyaana. Muuziqay doommanaagaa erissiyo wode, prograamee boncho hanotan doomettana mala nuuni ubbaykka nu sohuwan uttana koshshees. Prograamee wuriyoy Arbba gallassinne Qeeraa gallassi saateppe guyyiyan 10:55na gidishin, Woggaa gallassi saateppe guyyiyan 9:40na.
◼ Kaamiyaa Essiyoosaa: Kaamiyaa essanau deꞌiya sohoy guutta gidiyo gishshau, danddayettida keenan haratuura issippe yiyoogee loꞌꞌo. Qassi intte gubaaꞌee shiiqiyo awuraajjaa shiiquwan beettanau baaxetite.
◼ Uttiyoosaa Oyqqiyoogaa: Uttiyoosaa oyqqana danddayiyoy inttenaara issippe kaamiyan yiidaageetu xallaassa woykko inttenaara issippe deꞌiyaageetussa woykko intte xinaatetu xallaassa.—1 Qor. 13:5.
◼ Laaxaa: Laaxaa shemppuwaa wode, laaxaa maanau shiiquwaa sohuwaappe harasaa biyoogaappe hayyanintta laaxaa ekkidi yiite. Intte oydiyaa garssan wottana danddayiyo, qumaa oyqqiyoobaa goꞌettana danddayeeta. Hegaappe gitatiya miishshanne xaaramusiyaa ehaana bessenna.
◼ Miishshaa Immiyoogaa: Nu Kawotettaa Addaraashan woy awuraajjaa shiiquwaasan, alame yuusho oosuwau dosan miishshaa immiyoogan, shiiquwaa giigissuwaa nashshiyoogaa bessana danddayoos. Awuraajjaa shiiquwan immiyo cheekkee qanxxettana bessiyoy “Yeyihowa Misikiroch” dirijjitiyau gidiyoogaa qonccissana bessees.
◼ Daafabaanne Qoppenna Sahuwaa: SHiiquwaa sohuwan eesuwaara akkamettanaadan oottiyaabi merettiyaaba gidikko, akkamiyaageeti hanotay ay keena deexokko beꞌanaadaaninne maaddanaadan, mokkiyaageetuppe intte matan deꞌiya uri sohuwaara shiiquwaa sohuwan deꞌiya Koyro Akkamuwaa Maaduwaa kifiliyau erissanaadan hayyanintta yootite.
◼ Xaliyaa: Intte mittiyo xalee deꞌiyaaba gidikko, awuraajjaa shiiquwaa sohuwan he xalee deꞌenna gishshau, hayyanintta ekkidi yiite.
◼ Caammaa: Caammaara gayttidaagan, layttan layttan amarida asay qohettees. Issi uri darajaanne hegaa mala daafa gattana danddayiya sohuwan saruwan hemettana danddayissiya sima gidida ba gediyau likke gidida caammaa wottiyoogee daro loꞌꞌo.
◼ Siyanau Metootiyaageeta: Ef-em eraadooniyaa xaabiyaa goꞌettidi shiiquwaa prograamiyaa sissiyo giigissoy deꞌees. Hegaa siyanau, hayttan wottidi ezggiyoobay deꞌiyo, baatiriyan oottiya guutta eraadooniyaa ehaana koshshees.
◼ Qeeri Naatu Gaariyaanne Allaxxiyoosan Goꞌettiyo Oydiyaa: Qeeri naata wottidi sugiyo gaariyaanne allaxxiyoosan goꞌettiyo oydiyaa shiiqo sohuwaa ehaana bessenna. Gidoppe attin, yelidaageeti bantta miyyiyan wottana danddayiyo, naata utissiyoobaa ehaana danddayoosona.
◼ Quma Keettaa: Quma keettan loꞌꞌo eeshshaa bessiyoogan Yihoowa bonchissite. Meeza gididaba gidikko, qumaa aattida urau guutta santtimiyaa immite.
◼ Hooteeliyaa: Danddayettiyaaba gidikko hooteeliyaa oyqqiyoogee loꞌꞌo.
(1) Intte goꞌettiyoogaappe daro alggaa oyqqoppite; qassi aqana bessiyaagaappe daro asaa issi kifiliyan ayssoppite.
(2) Alggaa oyqqi simmidi, unꞌꞌissiya metoy gakkana xayikko laammana koshshenna; laammiyo wode qassi sohuwaara yootana koshshees.—Maa. 5:37.
(3) Qumaa kattiyo soho xallan kattite.
(4) Hooteeliyaa oosanchatuura gayttidaagan ayyaanaa ayfiyaa ayfite. Eti cora asaa mokkiyoonne moyissiyo gishshau, nuuni keha, danddayanchanne bessiyaagaadan haniyaageeta gidiyo wode nashshoosona.
(5) Yelidaageeti bantta naata hooteeliyan ubbasan naagana bessees; hegee haattaa wodhiyo sohuwaa, imattaa mokkiyo kifiliyaa, ispporttiyaa oottiyo kifiliyaanne hegaa mala hara sohuwaa gujjees.
◼ Kawotettaa Addaraashaa Goꞌettiyoogaa: Kawotettaa Addaraashaa asay aqiyoosaa oottennaagee loꞌꞌo. Goꞌettiyoogee attennaba gidikko, Kawotettaa Addaraashay ubba wode geeshsha gidanaadan ubbau aawatettay siyettana bessees. Hiittaa denttidi maara wottana bessees; gukkidabaa sohuwaara quccana bessees; qassi woraqataanne hegaa malabaa a yegganau giigissidoban yeggana koshshees.
◼ Kaallidi Maaddite Giya Qitsiyaa: Hayyanintta Kaallidi Maaddite (S-43) yaagiya qitsiyaa awuraajjaa shiiquwaa wode nuuni haggaazuwau kiyennan sabbakiyoogan demmido, koshshay deꞌiyoogeetu hanotaa kunttanau goꞌettana koshshees. Kunttido qitsiyaa Xuufe Kifiliyau woykko gubaaꞌiyaa simmiyo wode intte gubaaꞌiyaa xaafiyau immana danddayeeta.—Uddufune 2011 Nu Kawotetta Haggaazuwaa, sinttaa 3 xeella.
◼ Geeshshiyoogaa: Geeshshatettaa Kifilee geeshshiyo prograamiyaa giigissiyaaba gidikkokka, Yihooway ba asaappe koyiyo geeshshatettaa xoqqa maaraa nu ubbay kaallana danddayoos. Hegaa gishshau, shiiquwaa sohuwan woraqati woykko hegaa mala harabi saꞌan deꞌana koshshenna. Hegaa malabaa yegganau giigidaban sohuwaara yeggana koshshees; yaatiyoogee shiiqo saatiyan gidin, laaxa saatiyan nu shiiqiyo sohoy moorettennaadan oottees. Hegaadankka, nuuni uttosaappe denddidi biyo wode, nuuni uttido heeraa xeelliyoogeenne saꞌan wodhidabaa denttiyoogee bessiyaaba.
◼ Dosan Oottiyoogaa: Nuuni koshshiya oosota nu dosan oottiyaaba gidikko, awuraajjaa shiiquwan beettiyoogan daroppe ufayttana danddayoos. (Oos. 20:35) Hegaadan oottana koyiya uri Dosan Oottiyo Oosuwaa Kifiliyau yootana koshshees. Layttay 16 kumibeenna naatikka banttana yelidaageeti woy etappe issoy doorido gastta uri kaalettin loꞌꞌo oosuwaa oottana danddayoosona.
[Sinttaa 6n deꞌiyaagaa]
SHoobiyaa Woraqataa Asau Waatidi Immanee?
Nu haggaazo moottaa gattanau, qanttan asau yootana koshshees. Hagaadan gaana danddayoos: “Saro. Ha shoobe woraqatay alame yuushuwan asau imettiiddi deꞌees. Hagee intte gishshaa. Aaho qofaa ha shoobe woraqataappe beꞌana danddayeeta.” Wozanappe yoota. Qeeraanne Woggaa gallassatun shoobe woraqataa immiyo wode, hanotay injjetikko maxeetetakka issippe immana koshshees.