Xoossaa Qaalay Tamaarissanau Maaddees
1. Haggaazo layttaa 2014 woradaa shiiquwaa huuphe yohoy woygiyaagee, qassi he prograamiyan woygiya oyshau zaaruwaa demmanee?
1 Nu gita “asttamaaree” Yihooway tamaarissiyoogan ooppenne aadhees. (Isi. 30:20, 21) SHin, Yihooway nuna ayba ogiyan tamaarissii? Maxaafa ubbaappe aadhiya, i ba ayyaanaa kaaletuwan xaafissido Qaalaa, Geeshsha Maxaafaa nuussi immiis. Xoossay tamaarissiyoobay nuna asatettan, qofaaninne ayyaanaaban waati maaddana danddayii? Ha oyshaa zaaruwaa 2014 haggaazo layttaa woradaa shiiquwaa prograamiyan beꞌana. “Xoossaa Qaalay Tamaarissanau Maaddees” yaagiya, he prograamiyaa huuphe yohoy 2 Ximootiyoosa 3:16ppe ekettiis.
2. Waanna qofaa qonccissiyay woygiya oyshatu zaaroy?
2 Ha Waanna Qofaa Akeekite: Hagaappe kaallidi deꞌiya oyshatu zaaroy prograamiyaa waanna qofaa qonccissees:
• Xoossay tamaarissiyoobay deꞌuwan nuna waati maaddii? (Isi. 48:17, 18)
• Nuuni Yihoowau kumetta wodiyaa haggaazanau issi issibaa laammanau koyikko, ay demmanaagaa ammanettana danddayiyoo? (Mil. 3:10)
• Issi uri nuna ‘ooratta timirttiyaa’ tamaarissikko, waatana koshshii? (Ibr. 13:9)
• Nuuni Yesuusi ‘tamaarissidoogaadan’ tamaarissana danddayiyoy ayba ogiyaanee? (Maa. 7:28, 29)
• Gubaaꞌiyan tamaarissiyaageeti banttana tamaarissana koshshiyoy aybissee? (Roo. 2:21)
• Xoossaa Qaalay aybaassi maaddii? (2 Xim. 3:16)
• Kawotettata ‘qaattiyoogee’ asaa goꞌꞌiyoy ayba ogiyaanee? (Hag. 2:6, 7)
• Yihooway nunan ammanettiyoy aybiinee? (Efi. 5:1)
• Nuuni Yihooway tamaarissiyoobaa ubbatoo kaallanau minnidi oottana bessiyoy aybissee? (Luq. 13:24)
3. Nuuni koshshiya wodiyan giigida ha shiiquwaa shiiqidi loyttidi ezggiyoogee keehippe koshshiyaaba gididoy aybissee?
3 PHauloosi ha prograamiyaa huuphe yohoy ekettido qofaa xaafanaappe kasetidi, 2 Ximootiyoosa shemppo 3n wurssetta gallassaa shaakki erissiya wayssiya wodiyaabaa yootiis. I, “Iita asatinne balettiyaageeti harata balettiiddinne bantta huuphiyau baliiddi, kaseppe iiti iiti boosona” yaagiis. (2 Xim. 3:13) Nuuni balenna mala, Xoossay tamaarissiyoobaa siyiyoogeenne hegaa oosuwan peeshshiyoogee keehi koshshiyaaba! Hegaa gishshau, nuuni koshshiya wodiyan giigida ha shiiquwaa shiiqidi, loyttidi ezgganau murttidaageeta gidoos.