Xoossaa Qaalay Oottees
1. Haggaazo layttaa 2014 dumma shiiquwaa gallassaa huuphe yohoy aybee?
1 Nagarancha asaappe pulttiya aybippenne dumma hanotan, nuna laammidi nu qofaynne nu ogee Yihoowa sheniyaara maayettanaadan oottiyo wolqqay Geeshsha Maxaafau deꞌees. Xoossaa Qaalau ay keena wolqqay deꞌii? Nuuni nu deꞌuwan Xoossaa Qaalau deꞌiya wolqqan loytti goꞌettana danddayiyoy ayba ogiyaanee? Hara asaa maaddanau nuuni a loytti goꞌettana danddayiyoy ayba ogiyaanee? Haggaazo layttaa 2014u giigida dumma shiiquwaa gallassaa prograamiyan ha qofaa pilggiyo wode, nuuni ubbay ayyaanaaban minnanaagaa ammanettoos. “Xoossaa Qaalay Oottees” yaagiya, he shiiquwau huuphe yohoy Ibraawe 4:12ppe ekettiis.
2. Nuuni woygiya oyshatu zaaruwaa loytti ezggana koshshii?
2 Ha Oyshatu Zaaruwaa Koyite: Intte shiiquwan ezggiyo wode, kaallidi deꞌiya oyshatu zaaruwaa xaafite.
• Nuuni Yihoowa Qaalan ammanettana koshshiyoy aybissee? (Maz. 29:4)
• Nuuni nu deꞌuwan Xoossaa Qaalau deꞌiya wolqqaa beꞌana danddayiyoy ayba ogiyaanee? (Maz. 34:8)
• Xoossaa Qaalau deꞌiya wolqqaa intte haggaazuwan goꞌettana danddayiyoy ayba ogiyaanee? (2 Xim. 3:16, 17)
• Nuuni Seexaanaa alamiyan cimettennaadan naagettana danddayiyoy ayba ogiyaanee? (1 Yoh. 5:19)
• Yelagatoo, ayyaanaaban waani diccana danddayeetii? (Erm. 17:7)
• Nuuni daafuriyo wodekka minnana danddayiyoy ayba ogiyaanee? (2 Qor. 12:10)
• Nuussi kase daro wodiyau iita meezeenne iita qofay deꞌiyoogeeta gidikkonne, ubbatoo nu deꞌuwan laamettanau koshshiyaabay aybee? (Efi. 4:23)
3. Dumma shiiquwaa gallassan, shiiquwan tamaariyoogaappe hara ayba ogiyan goꞌettana danddayiyoo?
3 Ha keehi koshshiya qofaa siyiyoogee nuna daroppe maaddana! Hegaa bollikka, woradaa shiiquwaadaaninne awurajjaa shiiquwaadan, dumma shiiquwaa gallassan hara gubaaꞌiyaappe yiida ishanttuuranne michonttuura wodiyaa aattananne siiquwaa aassana danddayoos. (Maz. 133:1-3; 2 Qor. 6:11-13) Yaatiyo gishshau, kase laggetuurakka wodiyaa aattite; qassi haratuurakka erettite. Auraajjaa xomoosiyaagee woy Beeteeleppe yiida ishay haasayaa shiishshiya imatta gididi yiikko, anne a maccaasiyo mokkidi haasayissiyoogee loꞌꞌo. Nuuni mata wode shiiqana dumma shiiquwaa gallassaa ufayssan naagiyo daro gaasoy deꞌees.