Loꞌꞌo Ayfee Beettiyo Zamachaa
Gubaaꞌeti bantta awuraajjaa shiiquwaa doommanaappe heezzu saaminttaa kasetidi, moottan deꞌiya koshshay deꞌiyoogeeta shiiquwau shoobbiyoogaa doommoosona. Layttan layttan hegaadan oottiyo loꞌꞌo gaasoy deꞌees. SHoobiyaa ekkidi awuraajjaa shiiquwaa yiyaageeti Geeshsha Maxaafaappe shiiqiya haasayan, ubbabay maaran mankkan giigidoogan, daroti bantta dosan oottiyoogan, qassi nu loꞌꞌo eeshshaaninne issippetettan darotoo garamettoosona. (Maz. 110:3; 133:1; Isi. 65:13, 14) Gido shin, koshshay deꞌiyo uri deꞌiyo sohuwaappe shiiquwaa sohoy keehi haaho gidido heeran zamachan loꞌꞌo ayfee beettii?
SHoobiyaa woraqataa ba penggeppe demmida issi maccaasiyaa 2011 awuraajjaa shiiquwaappe simmin issi macara biiruwau dabddaabbiyaa xaafaasu. Kase Yihoowa Markkati i soo yiyo wode, a ubbatoo qosettawusu. A hagaadan gaasu: “Taayyo loꞌꞌiya keettay, keehi loꞌꞌo azinay deꞌees; ufayttanaadan oottiya ubbabay taayyo deꞌees gaada qoppays. SHin taani ufayttikke; ta deꞌoy tumu halchoy baynnaagaa. Yaatiyo gishshau, 320 kilo meetiriyaa kaamiyaa laaggada Qeera gallassa shiiquwaa baanau qofaa qachaas.” A shiiquwan keehippe ufayttido gishshau, Woggaa gallassa shiiquwaakka siiqanau yan aqanau koyidoogaa silkkiyaa dawalada ba azinau yootaasu. A, “Taani haasayaa ubbaa ezggaas; daro Yihoowa Markkatuura gayttaas; qassi gujjadakka eranau qofaa qachaas” yaagaasu. A soo ya simmada, xannaꞌiyoogaa doommaasu; yaatada oyddu aginappe guyyiyan xammaqettennan aassiyaaro gidaasu. A, “Taani he shoobiyaa woraqataa ta penggen demmido gishshau, keehi ufayttaas; ayssi giikko, haꞌꞌi ta deꞌoy tumu halchoy deꞌiyoogaa gidiis!” yaagaasu.
SHoobiyaa woraqataa ekkida issoti issoti shiiquwaa yaana danddayoosona. Yaatiyo gishshau, mishettidi ha zamachan asaa shoobbite. Asau immishin palahida shoobiyaa woraqataa awuraajjaa shiiquwaa ekkidi yiite; yaatidi, haggaazuwau kiyennan markkattanau goꞌettite.
[Sinttaa 5n deꞌiya saaxiniyaa]
SHoobiyaa Woraqataa Asau Waatidi Immanee?
Nu haggaazo moottaa gattanau, qanttan asau yootana koshshees. Hagaadan gaana danddayoos: “Saro. Ha shoobe woraqatay alame yuushuwan asau imettiiddi deꞌees. Hagee intte gishshaa. Aaho qofaa ha shoobe woraqataappe beꞌana danddayeeta.” Wozanappe yootite. Qeeraanne Woggaa gallassatun shoobe woraqataa immiyo wode, hanotay injjetikko maxeetetakka issippe immana koshshees.