Xinaateti Gooba Gidanaadan Maaddiyoogaa
1. Geeshsha Maxaafaa xannaꞌissiyaageeti waatana koshshii?
1 Yihooway baakko ‘ehaana’ xayikko, ooninne Xoossawu oottana danddayenna. (Yoh. 6:44) Gidikkokka, aassiyaageeti Geeshsha Maxaafaa xannaꞌissiyo uri saluwan deꞌiya ba Aawaakko shiiqanaadan maaddanawu baaxetana koshshees. (Yaaq. 4:8) Yaatanawu loytti giigettana bessees. Menttota nabbabidi hegawu giigida oyshaa oychiyoogaa xallay tamaaree qofaa akeekanaadaaninne ayyaanaaban diccanaadan oottenna.
2. Geeshsha Maxaafaa xinaateti gooba gidanaadan maaddiyoogaa goꞌꞌay aybee?
2 Aassiyaageeti bantta xinaateti gooba gidanaadan (1) Geeshsha Maxaafay tamaarissiyoobaa akeekanaadan, (2) Geeshsha Maxaafay tamaarissiyoobaa ammananaadan, qassi (3) Geeshsha Maxaafay tamaarissiyoobaa oosuwan peeshshanaadan maaddana bessees. (Yoh. 3:16; 17:3; Yaaq. 2:26) Issi ura hegaadan maaddiyoogee amarida aginaa ekkiyaaba. Gidikkokka, he heezzubatikka Geeshsha Maxaafaa xannaꞌiya uri bawu Yihoowaara deꞌiya dabbotaa minttanaadaaninne ba huuphiyaa awu geppanaadan maaddees.
3. Gooba asttamaareti tamaaree ba qofaa qonccissanaadan denttettiya oyshaa oychiyoy aybissee?
3 Geeshsha Maxaafaa Tamaaree Qoppiyoobay Aybee? Neeni Geeshsha Maxaafaa xannaꞌissiyo uri xannaꞌiiddi deꞌiyoobaa akeekiyaakko, qassi hegaa ammaniyaakko eranawu ubbabaa ne xallay haasayiyoogaappe, xinaatee ba qofaa qonccissanaadan ootta. (Yaaq. 1:19) Intte tobbiyoobaa xeelliyaagan Geeshsha Maxaafay yootiyoobaa i akeekidee? I xannaꞌiyo qofaa xuufiyaappe nabbabennan qonccissana danddayii? Xannaꞌiyo qofaa xeelliyaagan ayyo aybi siyettii? I Geeshsha Maxaafay tamaarissiyoobay oosuwan peeshshanawu metennaagaa gidiyoogaa ammanii? (1 Tas. 2:13) I tamaaridobaara maayiya ogiyan ba deꞌuwan issi issibaa laammana koshshiyoogaa akeekii? (Qol. 3:10) He oyshatu zaaruwaa eranawu, xannaꞌissiyo uri ba qofaa loytti yootanaadan maaddiya oyshata oychana, qassi i yootiyoobaa ezggana koshshees.—Maa. 16:13-16.
4. Geeshsha Maxaafaa xannaꞌiya uri tamaaridobaa akeekanawu woy oosuwan peeshshanawu metootikko, nuuni waatana koshshii?
4 Issi uri daro wodiyawu meezetidobaanne qoppiyoobaa aggiyoogee wode ekkana danddayees. (2 Qor. 10:5) Nuuni xannaꞌissiyo uri tamaaridobaa ammanennaba woy oosuwan peeshshennaba gidikko shin? Xoossaa Qaalaynne geeshsha ayyaanay tamaariya wozanaa denttettanaadan amarida wodee aadhana koshshiyo gishshawu, nuuni hegaa danddayan naagana koshshees. (1 Qor. 3:6, 7; Ibr. 4:12) Nuuni xannaꞌissiyo uri Geeshsha Maxaafay tamaarissiyoobaa akeekanawu woy oosuwan peeshshanawu metootikko, a giddiyoogaappe, hegaa aggibayidi harabaa xannaꞌissiyoogee loꞌꞌo. Geeshsha Maxaafay tamaarissiyoobaa nuuni danddayan a xannaꞌissiyaaba gidikko, i wodeppe simmin issi issibaa ba deꞌuwan laammana danddayees.