Haggaazuwan Ne Wodiyaa Loytta Goꞌetta
Yihoowa Markkati 2014 haggaazo layttan 1,945,487,604 saatiyaa haggaazidosona—hegee nuuni Yihoowa oosuwaa minnidi oottanawu murttidoogaa bessiyaaba! (Maz. 110:3; 1 Qor. 15:58) ‘Wodee wuriiddi’ deꞌiyo gishshawu, haggaazuwan kaseegaappe daro asaa demmanawu nu alꞌꞌo saatiyaa goꞌettana danddayiyoo?—1 Qor. 7:29.
Haggaazuwan nu wodiyaa loytti goꞌettanawu nu hanotaa laammana koshshees. Leemisuwau, issi haggaazo qommuwan asa haasayissennan darotoo issi saatiyaa woy hegaappe daruwaa takkiyaaba gidikko, daro asaa demmada haasayissanawu ne hanotaa giigissana danddayay? Heeraappe heeran hanotay dummatees. Gidikkokka, kaallidi deꞌiya qofay neeni “carkko yimppiya” asa gidennan, haggaazuwan ne wodiyaa loytta goꞌettanaadan maaddana danddayees.—1 Qor. 9:26.
Sooppe Soo Biidi Haggaaziyoogaa: Daro layttawu, aassiyaageeti sooppe soo biidi sabbakiyoogan bantta haggaazuwaa doommiyoogaa meezetidosona. SHin daroti gallassi oottiyo gishshawu, daro asay son shemppiyo, omarssa heeran sooppe soo baada haggaazanawu ayssi malikkii? Gallassi ogiyan woy zalꞌꞌe heeran haggaaziyoogan loꞌꞌo ayfiyaa demmana danddayoos.
Dabaaban Markkattiyoogaa: Xarapheezaaninne gaariyan wottidi asaa bessiyo xuufiyaa gubaaꞌiyaa moottan asay shamꞌꞌi shamꞌꞌiyoosan wottana koshshees. (Isiine 2013 Nu Kawotetta Haggaazuwaa, sinttaa 5 xeella.) Dabaaban markkattanawu qoppido sohuwan asay kaseegaadan darennaba gidikko, Gubaaꞌiyaa Haggaazo Konttee xuufiyaa wottiyo xarapheezaanne gaariyaa asay shamꞌꞌi shamꞌꞌiyo hara sohuwan wottanaadan kuuyana danddayees.
Zaaretti Oychiyoogeetanne Xinaateta: Hara haggaazo qommuwan asa demmenna wodiyan, zaaretti oychiyoogeetukkonne xinaatetukko baanawu ne hanotaa giigissana danddayay? Leemisuwawu, Qeeraa gallassi maallado sooppe soo biidi haggaaziyoogan loꞌꞌo ayfee beettiyaaba gidikko, ne xinaatiyaa saateppe guyye woy omarssi xannaꞌissana danddayay? Aassiyaageeti corattidi zaaretti oychanawu issippe issisaa biyoogaappe biyaageeti bin amaridaageeti hara ogiyan haggaazana danddayoosona.
Nuuni ay ogiyan haggaazikkokka saatiyaa qoodana bessiyoogee tuma; shin nuuni keehi ufayttiyoy loꞌꞌo ayfiyaa demmiyo wode. Neeni issi haggaazo qommuwan darotoo haggaaziyo saatiyan loꞌꞌo ayfe demmana xayikko, hara haggaazo qommuwaa mala. Haggaazuwan ne wodiyaa loytta goꞌettanaadan nena kaalettana mala ‘kattaa Godaa,’ Yihoowa woossa!—Maa. 9:38.