Dabaaban Markkattiyo Ufayssiya Ooratta Hiillaa
1. Bantta haggaazo moottan asay shamꞌꞌi shamꞌꞌiyoosay deꞌiyo gubaaꞌeti ay oottanaadan zoree imettidee?
1 Bantta haggaazo moottan asay shamꞌꞌi shamꞌꞌiyoosay deꞌiyo gubaaꞌeti xarapheezaa woy gaariyaa goꞌettidi dabaaban markkattiyoogaa doommanaadan odettiis. Intte goꞌettiyoy gaariyaa gidikko, issi aassiyaagee gaariya matan eqqana woy uttana danddayees. SHin, xarapheezaa goꞌettidi markkattiyaageeti naaꞌꞌa gidana koshshees. Eti moocu giyaanne pashkki giya asa gidana koshshees. Asay xuufiyaa tishshi oottidi xeelliyo wode, aassiyaageetuppe issoy, “Geeshsha Maxaafay ha allaalliyaa xeelliyaagan ay tamaarissiyaakko qoppa eray?” yaagi oychidi tobbiyoogaa doommana danddayees. Hankko ishay woy naaꞌꞌaykka gaariyaa xeelliyoogaa aggennan markkattiyoogaa doommana danddayoosona.
2. Gaariyan woy xarapheezan xuufeta wottidi dabaaban markkattiyoogee loꞌꞌo ayfiyaa demissiyaaba gidiyoogaa bessiya issi leemisuwaa yoota.
2 Ha ooratta hiillay daro asay Geeshsha Maxaafaa xannaꞌiyoogaa doommanaadan maaddiis. Kolloojjiyaa tamaariyaa issinna anjjettiyo wode giigissiyo xuufiyaa Yihoowa Markkata xeelliyaagan xaafana koyaasu; shin a Kawotettaa Addaraashaa demmana danddayabeykku. Kaalliya saaminttan, Yihoowa Markkati kolloojjiyaa heeran xarapheezaa goꞌettidi dabaaban markkattiyaageeta beꞌaasu. Guyyeppe, Geeshsha Maxaafaa xannaꞌiyoogaa doommaasu; qassi haꞌꞌi a xammaqettada dabaaban markkattawusu.
3. Dabaaban markkattiyoogaa xeelliyaagan issotu issotuyyo aybi siyettii?
3 Dabaaban markkattiyoogee bana ufayssiyoogaa issi michiyaa yootaydda hagaadan gaasu: “Daroti ooratta maxeetiyaa ekkanawu xuufiyaa wottiyoosaa yoosona. Harati qassi, Yihoowa Markkatubaa kase mule siyi erokkona. Ha ooratta hiillay daroti tumaa siyanaadan maaddiyaaba gidiyoogaa akeekaas.” Hara michiyaa qassi, “Dabaaban markkattiyoogee ufayssiyaabanne ooratta markkattiyo hiilla; ayssi giikko, asay nuukko yiidi, daro dosennabaa xeelliyaagankka oychees” yaagaasu.
4. Saaminttan saaminttan sohuwaa, gallassaanne saatiyaa laammennan xuufiyaa issisan wottiyoogee loꞌꞌo gididoy aybissee?
4 Saaminttan saaminttan sohuwaa, gallassaanne saatiyaa laammennan xuufiyaa issi sohuwan wottiyoogee loꞌꞌo. Hegee asay xuufiyaa beꞌanaadan, qassi takkidi yayyennan oyshaa oychanaadan woy xuufiyaa ekkanaadan maaddees. Intte gubaaꞌiyan dabaaban markkattiyoogee doommettidee? Yaatikko, neenikka ufayssiyaanne muruta gidida he hiillaa goꞌettada “Xoossaa kawotettaabaa” asawu yootana danddayaasa.—Luq. 9:60.