Muruta Hanotan Ogiyan Sabbakiyoogaa
1. Yesuusa leemisuwaa kaallana danddayiyo issi ogee awugee?
1 Saꞌan haggaaziyo wode, Yesuusi ogiyaaninne harasan demmiyo asaa haasayissanau guyye gibeenna. (Luq. 9:57-61; Yoh. 4:7) I bau danddayettida keenan daro asau keehippe koshshiya kiitaa yootanau koyiis. Ha wodiyan, ogiyan sabbakiyoogee, asay Xoossaa aadhida eratettaa demmanaadan maaddiyo keehi loꞌꞌo oge. (Lee. 1:20) Asaakko shiiqidi haasayissiyoogaaninne akeekancha gidiyoogan murutana danddayoos.
2. Ogiyan sabbakiyo wode asaa shiiqidi maaddanau ay oottana danddayiyoo?
2 Asaakko SHiiqidi Haasayissiyoogaa: Issisan eqqidi woy uttidi aadhiya asaa haasayissanau naagiyoogaappe asaakko shiiqidi haasayissiyoogee loꞌꞌo. Haasayissana uraa pashkki gaada xeella; qassi siiquwaa qonccissiya hanotan shiiqa. Aassiya haratuura haggaaziyaaba gidikko, darotoo, barkka barkka asaa haasayissiyoogee loꞌꞌo. Yaatiyoogee, nu buzo allaalliyaa denttidi haasayiyoogaappe nu yootiyooban xeelaa wottanaadan maaddees. Asaakko shiiqidi haasayissiyoogee, koshshay deꞌiyoogeeta kaallidi maaddanaukka koshshiyaaba. Hanotay injjetiyaaba gidikko, zaarettidi aara waani gayttana danddayiyaakko haasayaa kuuyiyo wode kehatettan oycha. Issi issi aassiyaageeti ogiyan sabbakiyoy, darotoo issi heeraana; hegee kase haasayissido asatuura gayttidi eta koshshaa gujjidi denttettanau maaddees.
3. Ogiyan sabbakiyo wode, akeekancha gidiyoogaa waati bessana danddayiyoo?
3 Akeekancha Gidite: Ogiyan awan eqqana qassi oona haasayissana bessiyaakko kuuyiyo wode akeekancha gidana bessees. Ogiyaara aadhiya ubba asaa haasayissiyoogee koshshennan aggana danddayees. Akeekancha gidite. Leemisuwau, issi uri eesotiyaaba gidikko a aggi aadhiyoogee loꞌꞌo gidana danddayees. Hara baggaara qassi asaa haasayissanau injje gidida hanotau tishsha gidite. Zalꞌꞌe heeran sabbakiyo wode, zalꞌꞌanchata yiilloyennaadan wozannaama gidite. Darotoo, zalꞌꞌe keetta geliya asaa gidennan, yaappe kiyiya asaa haasayissiyoogee loꞌꞌo. Asay dagammanaadan woy yayyanaadan oottenna ogiyan shiiqidi haasayissite. Xuufeta asau immiyo wodekka akeekancha gidite. Issi uri darin koyennaba milatikko, maxeetiyaa immiyoogaappe trakttiyaa immana danddayeeta.
4. Ogiyan sabbakiyoogee ufayssiyaanne loꞌꞌo ayfe demissiya haggaazo qommo gididoy aybissee?
4 Ogiyan sabbakiyoogee, nuuni guutta wodiyan tumaa zerettaa aahuwan zeranau maaddees. (Era. 11:6) Nuuni demmiyo issi issi asati ubba, sooppe soo biidi haggaaziyo wode demmanau danddayennaageeta gidana danddayoosona. Nuuni danddayettida keenan daro asayyo markkattanau baaxetiyaaba gidikko, ogiyan sabbakiyoogee ufayssiyaanne loꞌꞌo ayfe demissiya haggaazo qommo gidana danddayees.