Dabaaban Markkattiyo Ooratta Hiillaa

1. Koyro xeetu layttan deꞌida Kiristtaaneti leemiso gidiyaabaa ay oottidonaa?

¹ Koyro xeetu layttan deꞌida Kiristtaaneti oottidobay sooppe soo biidi sabbakiyoogaa xalla gidenna. Eti dabaabankka sabbakidosona. (Oos. 20:21) Leemisuwau, eti daro asaa demmanaagaa eridi beeta maqidasiyaa biidosona. (Oos. 5:42) Kiitettida PHauloosi Ateenan deꞌiyo wode, giyan demmiyo asau ubba gallassi markkattiis. (Oos. 17:17) Nuuni mishiraachuwaa asau yootiyo waanna ogee haꞌꞌikka sooppe soo biidi haggaaziyoogaa. Gidikkokka, nuuni sabbakanau kaamee eqqiyoosaa, zalꞌꞌe sohuwaanne cora asaa demmiyo hegaa mala hara sohuwaakka boos. Aassiyaageeti ubbay danddayettiyaaba gidikko dabaaban markkattanaadan zoree imettido gishshau, dabaaban markkattiyo naaꞌꞌu ooratta hiillan daroti haggaazana danddayoosona.

2. Hidaare 2011n doommido markkattiyo ooratta hiillay awugee?

² Asay Dariyo Gita Kataman Dabaaban Markkattiyoogaa: Laytta Maxaafaa 2013 sinttaa 16⁠ninne 17n qonccidaagaadan, Niyoorkke Sitin Hidaare 2011n ooratta hiillan dabaaban markkattiyoogee doomettiis. Daro qaalan giigida xuufeta he kataman asay shamꞌꞌi shamꞌꞌiyo ogiyan ishantti xarapheezaaninne gaariyan loꞌꞌiya ogiyan wottoosona. Yihoowa Markkati gelana danddayenna woy gelanaadan paqqadettenna sohuwan deꞌiya daroti, qassi darotoo son beettenna asaa gujjin shaꞌan qoodettiyaageeti he ogiyan simerettoosona. Keehi daro asay nu xuufiyaa ufayttidi ekkiis. Mata wode issi aginaa xallan 3,797 maxeetiyaanne 7,986 maxaafaa asay ekkiis. He ogiyaara aadhiya daroti Geeshsha Maxaafaa xannaꞌanau oychidosona. Waanna halchoy xinaatiyaa doomissiyoogaa gidiyo gishshau, xannaꞌanau koyiyaageeta kaallidi maaddanaadan eti immido adrashay sohuwaara eta heeran deꞌiya gubaaꞌiyau kiitettiis.

3. Markkattiyo ha ooratta hiillay harasan aakkiyoy ayba ogiyaanee?

³ Markkattiyo ha ooratta hiillan loꞌꞌo ayfee beettido gishshau, alame yuushuwan asay dariyo hara katamatunkka hegaadan oottanau qofettiis. Hegaadan oottana katamay awugaakko he biittan deꞌiya macara biiroy kuuyees. Darotoo he katamati daro asay simerettiyo, asaa issisaappe harasaa efiya kaame malabay woy cora ooso keettay woy asay deꞌiyo pooqeti deꞌiyoosa. Macara biiroy he sohuwan markkattana gubaaꞌetussi dabddaabbiyaa kiittees, qassi gujo kaaletuwaa immees. Darotoo hegaadan oottanaadan kumetta wode aqinyetinne dumma aqinyeti doorettoosona; issi issi heeran kaafiya aqinyetikka doorettana danddayoosona.

4. Gita katamatun dabaaban markkattiyoy ayba ogiyaanee?

⁴ Markkattiyo Ogiyaa: Gita kataman dabaaban markkattiyaageeti darotoo asay eta xarapheezaakko woy gaariyaakko yaana gakkanaashin naagoosona. Issi uri yiyo wode, i koyiyo xuufiyaa ekkanaadan shoobboosona. Ayyo oyshay deꞌikko aqinyeti ufayssan Geeshsha Maxaafaappe zaaroosona. I xuufiyaa ekkikko, aqinyeti dosan immiyo miishshaabaa denttokkona. SHin nu oosuwau miishshaa demmiyoy ayba ogiyaanakko i oychikko, xuufiyan deꞌiya adraashan miishshaa kiittana danddayiyoogaa qonccissoosona. Danddayettikko, “Issi uri ne soo yiidi oychanaadan koyay?” woy “Nuuni ha xuufiyaa immiyoogaa xalla gidennan, Geeshsha Maxaafaa miishsha qanxxissennan xannaꞌissiyoogaa eray?” yaagidi oychoosona.

5. Ha ooratta hiillan Markkattiyoogee issi azinaanne machiyo ufayssidoy ayba ogiyaanee?

⁵ Ha ooratta ogiyan markkattiyoogee keehi ufayssees. Issi azinaynne machiyaa hagaadan giidosona: “SHaꞌan qoodettiya asay galla galla simerettiyaagaa, xuufiyaa xarapheezaa matan eqqidi beꞌiyoogee alame yuushuwan deꞌiya asaa demmanau oosettiya gita oosuwan nuuni maalaalettanaadan oottiis. Ha cora asaa beꞌiyoogee, qassi Yihooway ubba asau qoppiyoogaa hassayiyoogee nu deꞌuwan haggaazuwaa kaseyanau murttido murttiyan genccanaadan minttettiis. Xuufiyaa mataara aadhiya asaa ubbaa wozanaa Yihooway qoridi, suure wozanay deꞌiyoogeeta koyees giidi qoppoos. Nunaara oottiya kiitanchatuura keehippe matattidabadan qoppoos.”

6. (a) Dabaaban markkattanau daro gubaaꞌetun giigiya hara ooratta hiillay aybee, hegee gita katamatun dabaaban markkattiyoogaappe dummatiyoy ayba ogiyaanee? (b) Dabaaban markkattiyo wode gubaaꞌeti maayetti oottana danddayiyoy ayba ogiyaanee?

⁶ Gubaaꞌee Giigissin Dabaaban Markkattiyoogaa: Gita katamatun dabaaban markkattiyoogaa xalla gidennan, daro cimati bantta gubaaꞌiyaa moottan markkattiyo hara ooratta hiillaa giigissiiddi deꞌoosona. Ha ooratta hiillan, aassiyaageeti bantta gubaaꞌiyaa haggaazo moottan cora asay simerettiyo sohuwan xuufiyaa wottanau gaare malabaa goꞌettoosona. Macara biiroy doorido kataman, asay shamꞌꞌi shamꞌꞌiyo issi sohuwan daro gubaaꞌiyaappe doorettidaageeti gita katamatun dabaaban markkattiyoogaappe hegee dummatees.—“Maayetti Oottiyoogee Koshshiyaaba” giya saaxiniyaa xeella.

7. Koshshiyaaba gidikko, gubaaꞌe moottan dabaaban markkattiyoogaa cimati giigissiyoy ayba ogiyaanee?

⁷ Gubaaꞌiyaa moottan daro asay simerettiyo sohoy deꞌiyaakkonne, qassi yan dabaaban markkattiyoogee loꞌꞌo ayfe demissanaakkonne cimati tobboosona. Kaame malabay dariyoosaa, asay dumma dummabau shiiqiyoosaa, asay dariyo ogiyaa, zalꞌꞌe heeraa, hosppitaaliyaa, kilinikiyaanne gita pooqee deꞌiyo heeraa, xuufiyaa wottiyo xarapheezaa woy gaare malabaa wottanau doorana danddayettees. Issi sohuwan, gallassaanne saatiyaa laammennan xuufiyaa hegaadan giigissiyoogee loꞌꞌo. Daro asay simerettiyo ogiyaa mala sohuwan guutta gaare malabaa goꞌettiyoogee keehi loꞌꞌo gidana danddayees. Hegaadan dabaaban markkattiyo wode maaddiya, Wochiyo Keelaanne Beegottite! maxeetiyaa, qassi hara xuufiyaa bessiyaabay giigiis; hegaa cimati Weyb sayttiyaappe dawunlode oottana danddayoosona. Ha oosuwaa oottiyaageeti gita katamatun dabaaban markkattiyaageeti oottiyoogaadan oottoosona; qassi haggaazuwaa xomoosiya ishay yootiyo kaaletuwaa loytti kaallana koshshees. Hara heeran deꞌiya, siyanau koyiya uri ba adrashaa etau immikko, eti Hayyanintta Kaallidi Maaddite (S-43) yaagiya qitsiyaa sohuwaara kunttidi gubaaꞌiyaa xaafiyau immana koshshees.

8. Dabaaban markkattanau gubaaꞌee giigissidobi deꞌennaba gidikko, hegaadan markkattana danddayiyo ogeti awugeetee?

⁸ Haggaaziyo Wode Dabaaban Markkattite: Issi issi gubaaꞌetu moottan hegaadan xuufiyaa giigissidi markkattanau asay dariyo sohoy deꞌennan aggana danddayees. Gidikkokka, he gubaaꞌetun deꞌiya aassiyaageeti haggaaziyo wode dabaaban markkattanau qoppanaadan minttettoos. Intte moottan giyay woy zalꞌꞌe heeray deꞌii? Qassi asay allaxxanau woy dumma dummabau shiiqiyo sohoy deꞌii? Deꞌiyaaba gidikko, dabaaban markkattana danddayeeta.

9. Asaa demmiyo soho ubban markkattanau nuuni akeekancha gidana koshshiyoy aybissee?

⁹ Yihooway “asai ubbai attanaadaaninne tumatettaa eranaadan” koyees. (1 Tim. 2:4) Yaatiyo gishshau, wurssettay yaanaappe kase Kawotettaa mishiraachuwaa nuuyyo danddayettida keenan daro asau yootanau baaxetoos. (Maa. 24:14) Daro heeran son asaa demmana danddayettenna. SHin dabaaban demmiyo wode nuuni etau markkattana danddayoos. Issoti issoti mishiraachuwaa siyana danddayiyoy nuuni dabaaban markkattiyoogaa xallaana gidana danddayees. Yaatiyo gishshau, asaa demmiyo soho ubban markkattiyoogan nu oosuwaa poliyaageeta gidoos.—2 Xim. 4:5.

[Sinttaa 5n deꞌiya saaxiniyaa]

Maayetti Oottiyoogee Koshshiyaaba

SHooro gidida dumma dumma gubaaꞌiyan deꞌiya aassiyaageeti issi issitoo dabaaban markkattanau issi ogiyaa, asay dumma dummabau shiiqiyo issi sohuwaa woy issi zalꞌꞌe heeraa goꞌettiyoogaa akeekida. Dumma dumma gubaaꞌiyan deꞌiya aassiyaageeti asay taraa naagiyo soho mala issi sohuwan maxeetiyaa wottidosona, qassi issi zalꞌꞌe heeran sabbakidosona. Hegee, aassiyaageeti haggaaziyoy issi mala saatiyaana gidana xayikkokka, zalꞌꞌanchatinne shooron deꞌiya asay issi issitoo yiillotanaada oottiis. Yaatiyo gishshau, dabaaban markkattiyo wode gubaaꞌiyau imettida haggaazo moottan haggaaziyoogee loꞌꞌo.

Aassiyaageeti shooro gubaaꞌiyaa moottan dabaaban haggaazanau koyikko, bantta gubaaꞌiyan haggaazuwaa xomoosiya ishau yootana koshshees. He ishay ba gubaaꞌiyan deꞌiyaageeti he moottan sabbakiyoogaa doommanaappe kase, hara gubaaꞌiyan haggaazuwaa xomoosiya ishay paqqadanaadan a haasayissana danddayees. Hara qaalaa goꞌettiya gubaaꞌee he moottan sabbakiyaaba gidikko, he heeran deꞌiya asaa yiilloyennaadan haggaazuwaa xomoosiya ishati tobbana koshshees. Maayettidi oottiyoogan ubbabay “wogaaninne maaran” oosettana danddayees.—1 Qor. 14:40.

[Sinttaa 6n deꞌiya misiliyaa]

[Sinttaa 6n deꞌiya misiliyaa]