KIRISTTAANETI DEꞌIYO DEꞌUWAA
Dumma Dumma Qaalaa Haasayiya Asay Deꞌiyo Moottan Hashetidi Sabbakiyoogaa
Asay Kawotettaa mishiraachchuwaa ba yelettido biittaa qaalan siyiyo wode darotoo sohuwaara ekkees. PHenxxaqosxxe gallassi 33 M.Ln “Sa7an de7iya zare ubbaappe yiidi, Xoossaa woosan sheekkida Aihudati” Ibraawettuwaa woy Giriikettuwaa mala, daro asay haasayiyo qaalaa erana danddayikkokka, Yihooway eti bantta “yelettido biittaa qaalan” mishiraachchuwaa siyanaadan oottidoy hegaassa gidennan aggenna. (Oos 2:5, 8) Ha wodiyan dumma dumma qaalaa haasayiya asay deꞌiyo heeran, he qaalatun kaalettiyo gubaaꞌetuyyo issi haggaazo moottay deꞌana danddayees. Hegaa mala gubaaꞌiyan deꞌiya aassiyaageeti asaa hanqqetissennan bantta moottan deꞌiya asa ubbawu mishiraachchuwaa yootanawu waanidi hashetana danddayiyoonaa?
Zorettite (Lee 15:22): Haggaazuwaa xomoosiya ishati zorettananne he moottan haggaaziya ubbawu haniya ogiyan sabbakanawu maayettana bessees. Haggaazo moottay guutta gidikko, hara qaalan goꞌettiya gubaaꞌeti he moottan deꞌiya bantta qaalaa haasayiya asati deꞌiyo keettaa intte haasayissennan aggidi baanaadan koyana danddayoosona. SHin, eta haggaazo moottay aaho heeran laalettidi deꞌiyo gishshawu ubbatoo wurssi oottana danddayennaba gidikko, keettaa aggidi biyoogaappe, koyiya ura demmiyo wode yootanaadan koyana danddayoosona. (od-AM 93 ¶37) Woy qassi intte gubaaꞌee eta qaalaa haasayiya ura koyi demmidi adrashaa yootiyoogan maaddanaadan oychchana danddayoosona. (km 7/12 5, saaxiniyaa) Issi issitoo, issi keettan deꞌiya asaykka dumma dumma qaalaa haasayiyaagaa gidana danddayiyoogaa hassayana koshshees. Hegaa mala haggaazo moottaa oottiyo wode, asaa adrashaa haratuyyo immiyoogaara gayttidaagan higgee deꞌikko, hegaa kaallana koshshees.
Hashetite (Efi 4:16): Intte gubaaꞌiyan haggaazuwaa xomoosiya ishay yootiyo kaaletuwaa loytti kaallite. Intte gubaaꞌiyaa kaalettiyo qaalaappe hara qaalan xannaꞌiyanawu koya ura xannaꞌissiiddi deꞌeetii? A qaalan kaalettiyo, matan deꞌiya gubaaꞌiyan woy citan deꞌiya uri xannaꞌissanaadan oottiyaakko, he xinaate sohuwaara diccana danddayees.
Giigettite (Lee 15:28; 16:1): Sooppe soo haggaaziyo wode hara qaalaa haasayiya uraa demmikko, ayyo mishiraachchuwaa yootanawu danddayido keenaa baaxetite. Intte heeran asay haasayiyo qaalay aybakko shaakki eridi, he qaalan giigida Geeshsha Maxaafaanne biidota intte moobayliyan woy hegaa malaban kasetidi dawunlode oottite. Amarida qaalatun asaa waati sarotanaakko tamaaranawu JW Language appilikeeshiniyaa goꞌettana danddayeeta.