Olaynne Asay Kobattiyogee Deꞌishinkka Sarotettaa Demmiyogaa
Kase wotaaddara gididi oottida Geeri hagaadan giis: “Taani Geeshsha Maxaafaa xannaꞌanaappe kase, meqettaa iitiyogee, naaqoynne metoy alamiyan keehi daridoy aybissakko erikke. Shin haꞌꞌi woppaa demmaas. Xoossaa Yihooway ha saꞌaa sarotettay deꞌiyo soho oottanaagaa erays.”
Hegaadan qoppiyay Geera xalla gidenna. Geeshsha Maxaafay haratakka waati maaddidaakko akeeka.
GEESHSHA MAXAAFAY YOOTIYOBAA: “Abeet Godau, neeni kehanne atto giyaagaa.”—Mazamure 86:5.
HEGEE WAATI MAADDII? “Ha xiqisee Yihooway maariyagaa gidiyogaa taani ammanettanaadan oottiis. Taani kase olettiyo wode oottidobaa ubbaa I atto gaanawu koyiyogaa erays.”—Welmaara, Kolombbiya.
GEESHSHA MAXAAFAY YOOTIYOBAA: “Taani ooratta salotanne ooratta sa7aa medhdhais; kasebai ubbai hassayettennanne qofettenna.”—Isiyaasa 65:17.
HEGEE WAATI MAADDII? “Taani wotaaddara gidada oottido wode tana gakkida azzanttiyabata qoppada unꞌꞌettays. Shin taani hassayiyo iitabata ubbaa Yihooway matan xayssanaagaa ha xiqisiyappe akeekaas. Hegaappe simmin he iitabata mule hassayikke. Hegee ayba malaaliya imotee!”—Zafiiro, Amarkkaa.
GEESHSHA MAXAAFAY YOOTIYOBAA: “I de7iyo laitta ubban xillotettai daayo; aginai xayana gakkanaassi sarotettai daro.”—Mazamure 72:7.
HEGEE WAATI MAADDII? “Taani he qaalatubaa darotoo qoppays. Matan olaynne olaa gaasuwan yiya iitaba ubbay xayana, qassi nu siiqiyogeeti qohettaneeshsha giidi hirggokko.”—Oleksanddiro, Yukireene.
GEESHSHA MAXAAFAY YOOTIYOBAA: “Haiqqida ne asai paxana. . . . Inttenoo, biittaa buhiyaa giddon de7iyaageetoo, . . . beegottitenne ufaissau yexxite.”—Isiyaasa 26:19.
HEGEE WAATI MAADDII? “Tutssi zariya buttidi xayssiyo wode ta soo asaa yara ubbay hayqqiis gaana danddayettees. Shin ha xiqisee taani etaara zaarettada gayttana danddayiyogaa ammanettanaadan oottiis. Eti hayquwappe denddidi ufayssan hombbociyogaa siyanawu yeemuwan naagays!”—Maariyo, Ruwanddaa.
GEESHSHA MAXAAFAY YOOTIYOBAA: “Iitaa oottiyaageeti guutta wodiyaappe guyyiyan de7okkona; . . . SHin ashkketi biittaa laattana; eti sarotettaaninne duretettaani ufaittidi daana.”—Mazamure 37:10, 11.
HEGEE WAATI MAADDII? “Olay eqqidaba gidikkokka, naaqoynne iita asay haꞌꞌikka xayibeenna. Ha xiqiseti tana keehi maaddidosona. Yihooway ubbabaa beꞌeesinne ta hanotaa akeekees. I waaye ubbay matan xayanaagaanne dogettanaagaa qaalaa geliis.”—Daalera, Tajikisttaane.
Ha maxeetiyan etabay odettido asati Geeshsha Maxaafay sarotettaa demmanaadan maaddido miilooniyan qoodettiya Yihoowa Markkatuppe amaridaageeta. Eti zariya, biittaa, yaraanne issi ura zaggidi ixxiyogaa waati xoonana danddayiyakko tamaaridosona. (Efisoona 4:31, 32) Yihoowa Markkati polotikan ooyyonne exatokkona, qassi danobaa oottokkona.—Yohaannisa 18:36.
Hegaa bollikka, Yihoowa Markkati siiqiya so asadan issoy issuwa maaddoosona. (Yohaannisa 13:35) Leemisuwawu, qommoora ibay odettido Oleksanddira olaa gaasuwa ba michcheera hara biitti baqatana koshshiis. A hagaadan gaasu: “Nuuni zawaa pinnido wode hegaa heeran deꞌiya nuna mokkanawu yiida Yihoowa Markkata sohuwara beꞌida. Eti oottidobay nuuni erenna biittan bete deꞌuwa meezetanaadan maaddiis.”
Ha wodiyan sarotettaa demmana danddayiyo ogiyabaanne sarotettay deꞌiyo alamee yaanaagaa Geeshsha Maxaafay yootiyo hidootaabaa neeni gujjada tamaarana danddayiyo nu shiiqotun nunaara shiiqanaadan shoobboos. Ne heeran shiiqiyo sohuwa eranawu, woy Merinawu Ufayttada Deꞌa! giya xuufiya goꞌettada issi Yihoowa Markkaara miishsha qanxxennan Geeshsha Maxaafaa xannaꞌanawu jw.org saytiya xomoosa.