Haymaanootiyaanne Yukireene Olaa—Geeshsha Maxaafay Yootiyoobay Aybee?

Haymaanootiyaa kaalettiya erettida asati Yukireene olaara gayttidaagan oottido kaallidi deꞌiyaabata beꞌa:

• “Raashiyaa Orttodookise haymaanootiyaa kaalettiya, Patriyarkkee Kirili, Raashee olaa denttidoogaa xeelliyaagan qaalanne qaattibeenna. . . . A Woosaa Keettay Yukireenebaa odiyo worddo oduwaa ketenꞌꞌidi, Putini eta oliyoogee bessiyaaba yaagiis.”—EUobserver, Laappune 7, 2022.

• “Patriyarkkee Kirili . . . ha olay nagaraara olettiyo oge yaagiyoogan, ba biittay olaa denttidoogee likke yaagiis.”—AP News, Laappune 8, 2022.

• “Yukireene Orttodookise Haymaanootiyaa kaalettiya, Kiyeven deꞌiya Metropolitan Epifanes I, ba asay ‘Raashetuura olettanaadan’ Saynno gallassi yootidi, eta anjjiis . . . [I] Raashiyaa wotaaddarata woriyoogee nagara gidennaagaakka yootiis.”—Jerusalem Post, Laappune 16, 2022.

• “Nuuni [Yukireene Woosa Keettatunne Haymaanoote Dirijjitetu Zoreta Keettay (UCCRO)] Yukireene Wotaaddaratanne nuussi exatidi olettiya ubbata kaafoos, Yukireene biittaa ashshanawu eti olettiyo wode eta anjjoosinne etassi woossoos.”—UCCROa Qofaa, Usuppune 24, 2022.

Ne qofay aybee? Yesuus Kiristtoosa kaalloos giya haymaanooteti bantta asay olettanaadan minttettana koshshii? Hegaa xeelliyaagan Geeshsha Maxaafay yootiyoobay aybee?

Haymaanootee olan hanno gakkanawu oottidobaa

Haymaanootee sarotettawu oottays giikkonne, olettin aynnekka baa, olettiyoogee loꞌꞌo, woy ubba olettana bessees giidi darotoo yootidoogaa taarikee bessees. Nu xuufetun kiyida amarida qofaa beꞌa.

• “Ze Krusedis—A ‘Trajik Illuzhin’” (Inggilizettuwan) Xoossawunne Kiristtoosawu oottoos giidi daro asaa buttidoogaan Rooma Kaatolike Woosa Keettay oyshettiyoy aybissakko qonccissees.

• “Ze Katolik CHerch in Afrika” (Inggizettuwan) haymoonootee issi zaree haraara olettennaadan, ubba zariyaa zaggidi buttennaadan waani diggibeennaakko qonccissees.

• “Oyshettiyay Haymaanootee?” (Amaarattuwan), “Rilijins Rolis in Mans Wors” (Inggilizettuwan), qassi “Rilijin Tekis Sayda” (Inggilizettuwan) giya huuphe yohoti Kaatolike, Orttodookisenne Protestantte haymaanootiya kaalettiyaageeti daro olatun naaꞌꞌu baggaakka waati kaafidaakko qonccissoosona.

Kiristtaane haymaanooteti olaa kaafana bessii?

Yesuusi ay tamaarissidee? “Neeni ne shooruwaa ne huuphedan siiqa.” (Maatiyoosa 22:39) “Intte morkketa siiqite.”—Maatiyoosa 5:44-47.

Yesuusi woygidee? “Ta kawotettai ha sa7aana gidenna. Ta kawotettai ha sa7aana gididaakko, tana . . . aatti [immena].” (Yohaannisa 18:36) “Biso shoddiya ubbai bison haiqqana.”—Maatiyoosa 26:47-52.

Hagaa qoppa: Kiristtaaneti Yesuusawu olettana, ubba qassi A naagana koshshibeennaba gidikko, hara ay gaasooninne olettana bessii? Beni wode deꞌida Kiristtaaneti Yesuusi oottidobaanne tamaarissidobaa waati kaallidaakko akeekanawu, “Kiristtaane Haymaanootee Olaa Kaafii?” giya huuphe yohuwa nabbaba.

Olaa denttettiya haymaanooteti waananee?

Geeshsha Maxaafay, Yesuusa kaalloos giidi I tamaarissidobaa kaallenna haymaanooteta Xoossay ixxiyoogaa tamaarissees.—Maatiyoosa 7:21-23; Tiitu 1:16.

• Xoossay hegaa mala haymaanooteta “sa7an worido ubbatu” suuttan oychchanaagaa Ajjuutaa maxaafay yootees. (Ajjuutaa 18:21, 24) Hegawu gaasuwaa eranawu (Amaarattuwan), “Gita Baabiloona Oonee?” giya huuphe yohuwaa nabbaba.

• Xoossay ixxiyo haymaanooteti ubbay bantta iita oosuwa gaasuwan, musida mittay “qanxxettidi, taman” yegettiyoogaadan xayanaagaa Yesuusi yootiis. (Maatiyoosa 7:15-20) Hegee waanidi hananaakko eranawu, “Worddo Hayimaanotiya Xayoy Matattiis!” giya xuufiya nabbaba.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images