Iray Bukkenna Adussa Iita Wodeta—Geeshsha Maxaafay Woygii?

• “Ha layttay wolqqaama hombbenne heezzantto mela bone yaagidi CHayna biittay irpportte oottiis.”—Zi Gardiyan, Masqqala 7, 2022.

• “Afirkkan amarida biittatun ichchashantto layttawukka iray bukkenna adussa iita wode gidana.”—UN Niwus, Naase 26, 2022.

• “Ichchashu xeetu layttan hani erenna ogiyan baggaappe dariya Awurooppaa biittatun iray bukkennan agganaagee odettiis—BBC Niwus, Naase 23, 2022.

Iray bukkenna adussa iita wodeti yaanaagaanne ubba qassi yaa iitanaagaa daro eranchchati yootoosona. Sinttappe loꞌꞌo wode yaana hidootay deꞌii? Geeshsha Maxaafay woygii?

Iray Bukkenna Adussa Iita Wodetanne Geeshsha Maxaafaa Hiraagaa

Geeshsha Maxaafay nu wodiyaabaa kasetidi yootiis:

• “Daro sohuwan koshai, . . yaana.”—Luqaasa 21:11.

Adussa wodiyawu iray bukkennaagee darotoo koshshaa kaalettees. Qassi, hegaa mala koshshay kaalettiyo hayqqoynne waaye Geeshsha Maxaafaa hiraagay polettanaadan oottees.—Ajjuutaa 6:6, 8.

Iray bukkenna adussa wodeti gujji gujji biyoy aybissee?

Iray bukkenna adussa wodeti gujji gujji biyo waanna gaasoy aybakko Geeshsha Maxaafay qonccissees. Hagaadan gees:

• ‘Ba hemetaa suurissanaagee aawu shene gidenna.’—Ermmaasa 10:23.

Hegaa giyoogee asi “ba hemetaa,” loytti giigissanawu woy bana ayssanawu danddayenna. Darotoo asay iitabaa kuuyiyoogee, adussa wodiyawu iray bukkennaadaaninne haattay qaxuwatanaadan oottees.

• Asay oottiyoobay kumetta saꞌan suuloy daranaadan oottiis; hegee qassi adussa wodiyawu iray bukkennaadan oottidoogaa daro saynisiyaa eranchchati maayettoosona.

• Yaaretiya asati oottiyoobaynne sinttana xeelliyaagan eti kaalliyo maaray worati xayanaadan, asay deꞌiyo moottay moorettanaadan; qassi meretan deꞌiya keehi alꞌꞌobata akeeki baynnan goꞌettanaadan oottees. Hegaappe denddidaagan keehi koshshiya haattaa malabata xayana danddayoos.

Gidikkonne Geeshsha Maxaafay hidootay deꞌiyoogaa yootees.

Sinttanawu ayba hidooti deꞌii?

Ha wodiyan deꞌiya haattaa metuwaa Xoossay xayssanaagaa Geeshsha Maxaafay yootees. Waatidi?

1. 1. Xoossay ‘Saꞌaa xayssiyaageeta xayssana.’ (Ajjuutaa 11:18) Haattaa qaxuwatuwawu gaaso gidida heeraa qohiyaabaa oottiya iitanne yaaretiya asata I xayssana.—2 Ximootiyoosa 3:1, 2.

2. 2. “Xuuggiya shafee dagattida haatta gidana.” (Isiyaasa 35:1, 6, 7) Xoossay iray adussa wodiyawu bukkennaagee gattido qohuwaa xayssidi, ha saꞌaa haattay kumido gannatiyawu laammana.

3. 3. ‘Neeni biittaa naagada haattaa ushshaasa; asaayyo kattay mokkanaadan oottaasa; yaatada daro dureyaasa.’ (Mazamure 65:9) Xoossay anjjin saꞌay ubba asawu gidi palahiya loꞌꞌo kattaaninne geeshsha haatta kumana.