Xoossaa Kawotettay Aybee?
Geeshsha Maxaafay yootiyoobaa
Xoossaa Kawotettay, Xoossaa Yihooway essido tumu ayso. ‘Xoossaa kawotettay’ saluwan uttidi haariyo gishshawu, Geeshsha Maxaafan ‘saluwaa kawotettaa’ geetettiis. (Marqqoosa 1:14, 15; Maatiyoosa 4:17) He kawotettay ubbaban asaa kawotettaappe aadhdhikkonne, asaa kawotettaa aysuwaara issi mala oottiya darobay deꞌees.
Haariyaageeta. Xoossay Yesuus Kiristtoosa Kawotu Kawo ootti sunttiisinne asaa kawotu ubbaappe aadhdhiya maataa awu immiis. (Maatiyoosa 28:18) Yesuusi ammanettiyaanne qarettiya Kawo gidiyo gishshawu, I he maataa loꞌꞌobaa oottana xallawu goꞌettees. (Maatiyoosa 4:23; Marqqoosa 1:40, 41; 6:31-34; Luqaasa 7:11-17) Yesuusi Xoossay kaalettin, saluwan uttidi aara “sa7an haarana” asata, zare ubbaappe dooriis.—Ajjuutaa 5:9, 10.
Haariyo wodiyaa. Sohuwaara sohuwaara laamettiya asaa kawotettaappe dumma hanotan, Xoossaa Kawotettay “mulekka kunddenna.”—Daaneela 2:44.
Haarettiyaageeta. Eta zaree aybanne gidin woy yelettido biittay awanne gidin, Xoossay koyiyoobaa oottiya asa ubbay Xoossaa Kawotettawu haarettana.—Daaneela 2:44.
Higgeta. Xoossaa Kawotettaa higgeti (woy azazoti) asay iitabaa oottennaadan diggiyoogaappe aaruwan maaddoosona. Hegeeti asawu loꞌꞌo eeshshay deꞌanaadan oottoosona. Leemisuwawu, Geeshsha Maxaafay hagaadan gees: “‘Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa.’ . . . Hegee ubbaappe gitatiya azazonne qassi ubbaappe aadhdhiya azazo. Qassi naa77antto azazoikka a mala; hegee, ‘Neeni ne shooruwaa ne huuphedan siiqa’ giyaagaa.” (Maatiyoosa 22:37-39) Xoossaanne shooruwaa siiqiyoogee, Kawotettawu haarettiyaageeti harata maaddiyaabaa oottanaadan denttettees.
Tamaarissiyoobaa. Xoossaa Kawotettay haarettiyaageeti kaallana bessiya maarata kessikkonne, asay he maarata waati kaallanaakko tamaarisees.—Isiyaasa 48:17, 18.
Oottanabaa. Xoossaa Kawotettay haariyaageeta maaddanawu, haarettiyaageeta qohiyaabaa oottenna. SHin he Kawotettay Xoossay A siiqiyaageeti Gannate saꞌan merinawu deꞌanaadan oottanawu gelido qaalaa gujjin, Xoossaa halchcho ubbay polettanaadan oottana.—Isiyaasa 35:1, 5, 6; Maatiyoosa 6:10; Ajjuutaa 21:1-4.