Keehippe Koshshiya Oosuwaa
1. Nuuni haggaazuwaa keehippe nashshiyoogee waatanaadan oottii?
1 Nu wodiyaa, nu wolqqaanne, nu aquwaa haggaazuwau goꞌettanaadan nuna ubbatoo minttettana koshshidoy aybissee? Hagaadan keehi koshshiya oosoy baynna gishshataassa! Haggaazoy darobaara gayttidabaa gidiyoogaa wotti dentti qoppiyoogee zaarettidi oosettenna ha oosuwaa nuuni keehippe oottanau koyanaadan maaddees.—Oos. 20:24.
2. Yihoowa gita sunttay bonchettanaadan sibikatee waati maaddii?
2 Yihoowa Sunttay Bonchettanaadan Oottees: Sibikatee Kiristtoos Yesuusi haariyo Yihoowa Kawotettay asaa kawotetta ubbaa xayssanaagaanne asaa metuwaa ubbaa giigissanaagaa qonccissees. (Maa. 6:9, 10) Nuna harggiyaappenne hayquwaappe ashshiyay Yihoowa xalla gidiyo gishshau i bonchettees. (Isi. 25:8; 33:24) Nuuni a sunttan xeegettiyo gishshau, nu loꞌꞌo eeshshaanne nuuni mishettidi oottiyoogaa beꞌiyaageeti Yihoowa bonchoosona. (1 PHe. 2:12) Ubbaappe Xoqqiya Godaa Yihoowa sunttaa kumetta saꞌan erissiyoogee keehippe ufayssiyaaba!—Maz. 83:18.
3. Kawotettaa kiitau loꞌꞌo zaaruwaa immiyaageeti ayba anjjo demmiyoonaa?
3 SHemppuwaa Ashshees: Yihooway “ooninne ba nagaraappe simmanaadan koyeesippe attin, ooninne xayana mala koyenna.” (2 PHe. 3:9) SHin, Yihooway suure giyoobaanne suure gidenna giyoobaa issi uri tamaarissennan asay waati erana danddayii? (Yona. 4:11; Roo. 10:13-15) Asay mishiraachuwaa siyidi, iitabaa oottiyoogaa aggiyo wode, eta deꞌoy kaseegaappe giiga gidees. (Mik. 4:1-4) Gujjidikka, eti merinaa deꞌuwaa hidootay diyoogeeta gidoosona. Nuuni sibikatiyaaninne tamaarissiyoogan minnidi oottiyoogee nunanne siyiyaageeta ashshees. (1 Xim. 4:16) Ha keehippe koshshiya oosuwan nuuyyo boncho maatay dees!
4. Nuuyyo danddayettida keena ubban Kawotettaabaa sabbakiyoonne erissiyo ashkkara oottiyo oosuwaa oottana koshshiyoy aybissee?
4 Matan gita waayee ha iita alamiyaa qoppennan xayssana. Yihoowayyo goynniyaageeti bashshaappe attana. Yaatiyo gishshau, ha wodiyan oosettiiddi deꞌiya sabbakiyoonne erissiyo ashkkara oottiyo oosoy keehi eesoyiya, xoqqa sohoy imettiyoonne goꞌꞌiya ooso. He oosuwau nu deꞌuwan xoqqa sohuwaa immiyaageeta gidoos!—Maa. 6:33.