Sooppe Soo Haggaaziyo Wode Issoy Issuwaa Loytti Maaddiyoogaa
1. Issi uraara issippe sabbakiyoogan ayba goꞌꞌa demmiyoo?
1 Issi wode, Yesuusi 70 erissiyo ashkkarati sabbakanaadan “naa77aa naa77aa” oottidi kiittiis. (Luq. 10:1) Erissiyo ashkkarati sabbakiyo wode, ha giigissoy issoy issuwaa maaddanaadaaninne minttettanaadan oottidoogee sirissenna. Nuuni aassiya issi uraara sabbakiyo wode, waatidi issoy issuwaa maaddana danddayiyoo?
2. Nunaara haggaaziyaagee asaa haasayissiyo wode, waati ezggana koshshi, aybissi?
2 Ezggiyoogan: Nenaara haggaaziyaagee asaa haasayissiyo wode, loytta ezgga. (Yaaq. 1:19) Xiqisee nabbabettikko, Geeshsha Maxaafaa kessada kaalla. Nenaara haggaaziyaagee woykko keettaaway haasayiyo wode akko xeella. Neeni haasayaa loyttada kaalliyaaba gidikko, keettaawaykka hegaadan oottanaadan hegee minttettana danddayees.
3. Nunaara haggaaziya uray nuuni qofaa immanaadan koyana danddayiyoy awudee?
3 Awude Haasayana Koshshiyaakko Akeekiyoogan: Nunaara deꞌiya uray asaa haasayissiyo wode, haasayaa coꞌꞌu giidi kaalliyoogan a bonchoos. (Roo. 12:10) Nuuni haasayan kelttiyaa gelana koshshenna. Nunaara haggaaziya uray gaanau koyidobaa dogiyo wode woykko keettaaway palqqettiya qofaa woy oyshaa denttiyo wodenne nunaara haggaaziya uray maaduwaa koyiyo wode, hara qofaa denttennan a qofaa bolli gujjana danddayoos. (Lee. 16:23; Era. 3:1, 7) Nuuni haasayiyaaba gidikko, nu haasayiyoobay markkatiiddi deꞌiyoobaa kaafiyaagaa gidana koshshees.—1 Qor. 14:8.
4. Nuuni haggaazuwan ufayttanaadaaninne murutanaadan aybi maaddanee?
4 Naaꞌꞌa naaꞌꞌa gididi oottida 70 erissiyo ashkkarati sabbakiyoogaa wurssido wode “ufaissan simmidosona.” (Luq. 10:17) Ezggiyoogaaninne haasayana koshshiyo wodiyaa akeekiyoogan nunaara sooppe soo oottiya uraa maaddiyo wode, nuunikka haggaazuwan ufayttananne murutana.